9

¹ ቆል ጃሩዅ እን ብራ ሓድራክሩዅድ ዓዶ እንቱዅ፣ ደማስቆር አወይስኽር ገምሮ ግን፣ እን ዕልል ከው ናትከውዲ ነገድ እስራኤልዱውዲኽር ጃርሊ መኸልተኵ። ² እን ሸልል ሃማትሩዲ፡ ልውሩ ኣከነጝር ጢሮስዲ ሲዶናዲር አወይሲ ገምሮ ግን። ³ ጢሮስ ንርሹሺ መሐገይ ሒለቱዅ ገበርቲ፣ ወርከስ ብቲሰና፡ ደሀብስኻ ዕሳስ ደርቡዅሰና እክብቲ። ⁴ አደራ ደአም፡ ንር ርድቕሲ ንርትልድ አድሮ ግን፣ እን በሓርሊ ህምባዅላ ሒልስኽር ድሂስሮ ግን፣ ለኸድኽር ሓውይቶ ግን። ⁵ ኣስቃሎን ኒስ ቋልዶ ጒኢቶ ግን፣ ጋዛኻ ጅርበት ብቶ ግን፣ ዔቅሮንኽር ኒሰና ጀረብቶ ግን፡ ንር ሳዳኽር ግምሽ ኣኽሮ ግን። ጋዛ ንር ሲምሲ ብቶ ግን፣ ኣስቃሎንኻ ድመን ኣኽቶ ግን። ⁶ ከው ናት-ናቱሩ ጅንስ ኣኸው ኣሽዶድቲ ሻኽድኖላ ግን፣ ኣጛ፡ ፍልስጥኤምዲ ከበርስነስ ድሂስያ ግን። ⁷ እን ብርሲ ናአብልድ አድያ ግን፡ እን ገበብሳዅ ነብረስኻ ናእንኵክልድ ፍድያ ግን። እን ከብተውኻ ይና ጃሩ ኣኽድኖ ግን፣ ያሁዳ ብሪልኽር መርሓት ኣኽድኖ ግን፣ ኣቃሮንኻ ይቡስዱውሰና ኣኽቶ ግን። ⁸ ኣንኻ እን ይልጝን ላው ሸጝገብሊ ሰከንያ ግን እማ፡ እን ወረረንቲ ሒለቱልድ ተከውየላ ግን፣ ናንዲ ደምቢ ዓመጨንታ ይእክሊ እንትሮ ኣኽላ፣ ውረድ፡ ኣን ተውሀትድ ተከዋክርሎም ኣኽነዲን። ⁹ እንቲ ጽዮንድቝራ! ገሪዅ ፈርሒ፣ እንቲ ኢዮሩሳሌምድቝራ! እልል ዪ፣ እነሓን፡ ኵሲም ጫድቕዲ ደአንዱረዲ በኪትዲ ድዃራ ገነብሊ ጨዓንሶ እንተራዅኪ እⶖኵዅ። ¹⁰ ኣንኻ፡ ኤፍሬምትልድ ሰረጌላታትሲ፡ ኢዮሩሳሌምትልድኻ ኣፍሩስሲ፡ ድሂስያ ግን፣ እን ኒድ ሓረባናዅ እኝሽኽር ከርቲሮ ግን። ኒ፡ቆምያትድ ሰላም ድሪስሮ ግን፣ ኒሕክምኻ በሓርልድ በሓርሊ ኣኽታሲክ፡ እን ወረቢልድኻ ብሪ ግንድል ኣኽታሲክ ኣኽሮ ግን። ¹¹ ኵድኻ፡ እን ኣን ኵዲ ትዋዅ መእኰት ብሩዅ ሰበትድ፡ እን ዓቝ እጝጋዅ ጎቝል ህምበው እን እኝሸውሰው ኵስ ፍድየሎም ግን። ¹² እንትን ሳደድ መንደርትደናኽር ንሽዊል ህምብደናኽር፣ እንታ መሐገይሊ ወንተራ፣ ለጛ እሽባ እሰ ወንተስየልኩም ኣከት፡ ናን ድኳ ድወኵንኩም እⶖኵዅን። ¹³ እን ብራ ያሁዱዅሲ እን ይቀስቲርሰና ሰደድየሉ ግን፡ እን ከው ኤፍሬምሩውድር እንታኽየሉ ግን፣ ዎ ጽዮን፡ ኵእቝርሲ ጕድያ ግን፣ ኵእቝርዲ አወይሲ ጕድየሎም ግን፡ ዎ ግሪክ፣ ንርቲ ሰፍ ሓርቡዅሰና እስየላ ግን።

¹⁴ ጃር ናአወይሲ ወድሕስትሮ ግን፣ እን ኒእኝሽኻ ምርክሰና ተልዋሕርዶ ግን። አደራ ጃርኽር መለከትሲ ጣዕምብሮ ግን፣ እን ውልዋል ግብለቱዅል ዓኝቀይል ኣኾኻ ፈርዶ ግን። ¹⁵ ጃር ጻባኦቱዅ ክልውሮሎም ግን፣ ናኣፋይትኻ ድድኖ ግን፣ ክርጝ ወጝሺቢውድር ለተቕስድኖ ግን። ጅእድኖ ግን፡ እን ወይኒ ጀኦ ሸከራዅሰና ጨርሕድኖ ግን፣ ዋንጫ እን ሳደቒሰና ቍጪንሊ ነጨግስሮ እንሳኽሳዅሰና፡ ናውር ኒሰና እንሳኽስኖ ህምበነኵ። ¹⁶ እን ግርጋ እንድሂሲ ጃር እን እክ ኒውሲ፡ እን ማል ኒውሰና ሃበ ደአንድሮሎም ግን። እን ሸሺሊ ህምበው ከብሰና፡ እን ብሪል ተልዋሕዋሕ ይድኖ ግን። ¹⁷ አወይው መለምልዲ ረቐብደውዲ ኣኽድኖ ግን! እን አር ኣባጥሕሲ፡ እን ወይኒ ሓዳይስኻ እን መለምል እጝቃቓሲ፡ መለምል እሲሮሎም ግን።