7

¹ ዳርዮስ ሰየምሶ ኒሰጀር አመሪል፡እን ኪስለው ይስታዅ ሰሰር አርቢል፡ ሰጀር ኳሪል፡ቆል ጃርዅ ደካርያስሊ እንቱዅ፣ ² እን ከው ቤት-ኤልዱ፡ ሻሬሳርዲ ሬገ-ሜልክዲ እን ናዲ እርገው ከውዲት ጃርሲ ሺዊድኖ እኝሻቕንዅሎም፣ ³ ናውኻ፡ ከድ እን ልጝን ጃር ጻባኦቱዅዲ ነበዋትዲት፡ “እን ገሪ አመታትሊ እሰዅሰና፡ ኣⶖኰር አርቢል ሹምጝር ጎሀይጝርማ?” ይኖ ወጝቀርኑዅ።

⁴ ኒድ ደምቢ፡ ንሰና ያዅ ቆል ጃር ጻባኦቱዅዱዅ ይል እንቱዅ፣ ⁵ “እን ከው በለዱ ናትክዲ ከድዲት ነወይሎም፣ ‘እን ደኰው ለጘትረጝን አመታትሊ፡ እንትን ሹምድናዅዲ ጎሀይድናዅዲ እምንድክ ይድመኒ? ⁶ እንትን ቍዱኑዅር ጅእዱኑዅር እርግድናዅ እንተሹሺ ኣኽጋዅማ? ⁷ ኢዮሩሳሌምዲ ንር ላው ሸጝገብሊ ህምበው ዕርዲራታትዲ፡ ሰላምዲ ተባብዲሲ መንደርቱኑ፣ ግብለትዲ እን ኳሪ ለብ ገፍድ ህምበው ጊታ ዕቅጭዲትል ከው ሰከኑ እርጋ ወክትሊ፣ ጃር እን ጃበር ነበዋትድ እሰ ጋበዅ ቆል ኒን ኣኽጋዅማ?’ ”

⁸ ንሰና ያዅ ቆል ጃሩዅ ኰዶ ሓዲስ ዘካርያስሊ እንቱዅ፣ ⁹ “ጃር ጻባኦቱዅ ንሰና የኵ፣ ‘እምንዱዅ ፍርድ ፈረዳ፣ እንተሹር-እንተሹትልኻ ራሕመንትዲ ሰኸንተንትዲ ኣኻ፣ ¹⁰ መብልዳነዲ የቲምዲ ሰደተንያዲ ድቡርዲት ዓመጭጋ፣ እንታ ለበከድር እኺርኺርሊ ምቝላ ሓሰብጋ።’

¹¹ “ናው ደአም ዋስድኖ ጀረቢኒ፣ ናተቢ ዓደድኻ ናየውሲ ይል ጅልውድኑዅ፣ ናእⶖቍቕስኽር ኣበድኑዅ። ¹² ናለበከስ ሸሺሰና ተብድንዅሉ፣ ጃር ጻባኦቱዅ እን ጃበር ነበዋትድ ኒመንፈስድ እሰ እኝሻቓዅ ቆልሲ ወሪ ፍቲሕሲ ዋስኒ፣ ንድኻ ጃር ጻባኦትዅ ገሪዅ ቀጠብሱዅ።

¹³ “ ‘ኣን ሹⶖሎም ዋስኒ፣ ኣጝር ሽጘነንለ ዋሰሊ’ የኵ ጃር ጻባኦቱዅ። ¹⁴ ኣንኻ፡ ናው አርእግነው ቆምያታ ነበክል ውልዋልድ ዳሕ ሲዅንሎም፣ እን ብራኽር ናደምቢ ላዅ ድኳ ኒድ ደኳጋዅዲ ኒድ ወንተረጋዅዲ ኣኽራሲክ በረሱዅ፣ እን ብራ ታሚታዅሲ እና ነወያዅድ ግን ናው በረስድናዅሉ።’ ”