6

¹ ሓዲስድ ኰዶ ይገሽ አወት መኸልትዅን፣ እነሓን፡ ሰጃ ሰረገላ ለጛ ጊሪ ነበክልድ ፋውሲ ቋልዅን፣ እን ጊትር አስራዲሪው እርግኑዅ። ² እን ሰልፋ ሰረገሊል ጣላ ፈርዳ እርጕዅ፣ እን ሊጘር ሰረገሊልኻ ፈርዳ አረባ እርጕዅ፣ ³ እን ሲዀር ሰረገሊልኻ ዋልዋ ፈርዳ እርጕዅ፣ እን ሰጀር ሰረገሊልኻ መኸት አፍሩስ ሒለቱ እርግኑዅ። ⁴ ኣን ይኸ፡ እን ይዲ ጋቡ እርጋዅ መልኣክሲ፡ “ዎ ይአደራ፣ ነን ውረኒ ግን?” ይዅንሉ።

⁵ እን መልኣክኻ ንሰና ይዅለ፣ “እና ነን፡ እን ብራ ኒድክዱዅ አደራ ገሸል ደውዮ እርጎ ፈው ሰጃ መንፈስ ሰሚው ግን። ⁶ እን አረባ ፈርዳ ሻዅ ግብለትል ኣኽታሲ፣ እን ዋልዋ ፈርዳ ሻዃ ኳሪ ለብ ኣኽታሲ፣ እን መኽት ኣፍሩስር ደቡብ ብሪል ኣኽታሲ ፍድኖ ግን።” ⁷ እን ኣፍሩስ ሒለቱ ፍነሪት፡ ብራ ኒትክ ጅልውድኖ ጥቢጢ ዩኑ እርግኑ። ኒኻ፡ “ኒልክ ብሪል ፈራ!” ይዅሎም፣ ናውር ኒልክ ብሪል ፈርኑዅ። ⁸ እንሲን ኒ፡ ሽⶖዅለ እማ፣ “እነሓን፣ እን ግብለትሊ ኣኽታሲ ፋው፡ እን ብሪል ይመንፈሲ ሀድእድኑዅ።” ⁹ ንሰና ያዅ ቆል ጃሩዅ ኰዶ ይል እንቱዅ፣ ¹⁰ “እን ባቢሎንልድ ወንተረው ሰልብስቲነ እርገው ሔልዳይዲ ጦብያዲ የዳዕያዲትልድ ደሀብዲ ወርከዲ አዳ፣ እን ግርጋ እንድሂሲ ኰዶ፡ ዮስያ ሰፎንያስዅሪ ልጝል ፈራ። ¹¹ እን ደሀብዲ ወርከዲት አዲ እማ፡ ናልድ ሻሽ ከደሚ፣ አድሮኻ፡ እን ከዳ አዋኻ ኢያሱ የሆጻዳቕዅራ ኣዀርሊ እሲሉ፣ ¹² ኒትኻ ጃር ጻባኦቱዅ ንሰና የኵ እⶖኵዅ ይሮ ድዊሉ፣ ‘እነሓን፣ እን ኒስⶖ ለጝካ ይስታዅ ግርዋ፣ ኒ፡ ኒኣካንልድ ለጝክክ ፍድሮ ግን፣ ልጝን ጃሩዅስኽር ገበርዶ ግን። ¹³ ኒ፡ልጝን ሻትክ ጃሩዅሲ ገበርዶ ግን፣ ክብርኽር ደበልትሮ ግን፣ ኒቂጦሪል ከፍ ዮ ሓከምሮ ግን፣ ኒቂጦሪል ኣኾ ኰዶ ከዳ ኣኽሮ ግን፣ እን ለጘርትካ ነበክልር ተዋፈቕና ዋኒሮ ግን።’ ¹⁴ እን ሻሽር፡ ሄሌምያዲ ጦብያዲ የዳዕያዲ ሄን ሰፎንያስዅራዲሲ ልጝን ሻትክ ጃሩዅሊ እልብርሳዅ ኣኽሮ ግን። ¹⁵ እን ሺራዅል ህምበው እንትድኖ ግን እማ፡ ልጝን ሻትክ ጃሩዅ ገበርሱ እⶖጕሲ ካቢድኖ ግን፣ እንትጝር ጃር ጻባኦቱዅ እጝሻቐትለ አርእትኖ ግን። እንታ አደራ ጃርሲ ኒትክድ አደድስደነንሉ፡ ነን ናውክ ኣኽሮ ግን።”