5

¹ ሓዲስድ ኰዶ መኸልትዅ፣ ኒል ይጃብል እሽብሳዅ ክታብ ዋዋዅ ቋልዅን። ² ኒኻ፡ “ውራ ቋልዳዅን?” ዮ ወጝቀርዅለ። ኣጝር፡ “ኒሺርጝ ለጘረጝን አመት፡ ኒእዳናርኻ ሽካ አመት ኣካዅ እሽብሳዅ ክታብ ዋዋዅ ቋለኵን” ይዅንሉ።

³ ኒ ይኸ፡ ንሰና ይዅለ፣ “እና ኒን ብራ ኒውክሊ ገምሮ ፈራዅ እሸና ግን፣ ስዋዅክ፡ እን ገሽ ላዅሊ ከተብሶ ህምባ ዓደድ ድድሮ ግን፣ እን ብንድ ሸርውኽር፡ እን አሪዅ ገሽሊ ከተብሶ ህምባዅሰና ድድኖ ግን። ⁴ ጃር ጻባኦቱዅ፡ ‘ኣን እሸና ነቕስያ ግን፣ ኒኻ፡ እን ልጝን ስዋኒዅዲ ይስⶖድ ብንድ ሸራዅዱዅዲት ቱሮ ግን፣ ንርትልኻ ኣኽሮ ግን፣ እን ልጝንዲ ካንዲ ክርጝዲትር ድሂስያ ግን የኵ።’ ” ⁵ ኒድ ደምቢ፡ እን መልኣክ ይዲ ጋቢ እርጋዅ ይል እንቶ፣ “ኵገሽ አወት መኸልቲ፣ እና እንተራዅ ውረኒ ኣከት ቋሊ” ይዅለ።

⁶ ኣን ይኸ፡ “ውረኒ ግን?” ይዅንሉ። ኒኻ፡ “ከየሊሰና ኤፉ ግን” ይዅለ። ኰዶኽር፡ “ኒን እን ከው ብራ ኒልክሊ ህምበውድ ሓራም ግን” ይዅለ።

⁷ ኒድ ደምቢ፡ እን ኤለሙነድ ከደምሳዅ እብዳና ብስቱዅ፣ እን ከየሊሰና ኤፉሩዅ ዓኝቀይሊኻ ኢዂና ከፍ ይሮ እርግቲ።

⁸ ኒኻ፡ “ኒኒ ቀሓብና ግን” ዮ እን ከየሊሰና ኤፉሩዅሊ ወንተሶ ቱስዅላ፣ እን ከየሊሰና ኤፉሩዅስኽር፡ እን እብዳና ኤለሙኒዅድ ጨቐጦ አበድዅሉ።

⁹ ኒደምቢ፡ ይገሽ አወት መኸልትዅን፣ እነሓን፡ ለጛ እኲን ፍኑዅ፣ ናካንፍፍሊኻ ውልዋል እርጕዅ፣ ናካንፍፍኻ ካንፍፍ ራዛሩሲ ተኵ እርጕዅ፣ ናው፡ እን ከየሊሰና ኤፉሩዅሲ ሰመዲ ብረዲር ነበክል ክብሲኒዅሉ።

¹⁰ እን ይዲ ጋቡ እርጋዅ መልኣክስኻ፡ “እና ከየሊሰና ኤፉሩዅሲ አዊል አደናዅንሉ እⶖኵንዅን?” ይዅንሉ።

¹¹ ኒኻ፡ “ልጝን ከደምድኖሉ ባቢሎን አደኖ ፈረነኵሉ እⶖኵኑዅ፣ እን ልጝን ገበርሶሰና፡ ኒል ቱስድኖሉ ግን”