4

¹ እን መልኣክ ይዲ ጋቡ ግጃዅ ወንተርዅ እማ፡ ኣዳም ገኝጃዅሲ ጕዳዅሰና ነቕነቖ ጕድዅለ፣ ² “ውራ ቋልዳዅን” ዮኻ ወጝቀርዅለ።

ኣን ይኸ፡ “እነሓን፡ ደሀብድ ከደምሳዅ ቲዃ ገምዲሰና ኒኣዀርሊ ደድዅ እራኳ ሻዅዲ ለጘታ ቲዃ ለጘታ ቱቦታት ሻውዲት ቋልዅን።

³ ኒገቢልኻ ለጛ ካና ወኸቱ ህምበነኵ፡ እን ላሪ እን እራኳ ደድዅድ ላው ገፍድ፡ እን አሪርኻ ኒሸጝገብ ገፍድ፣” ይዅን።

⁴ እን ይዲ ጋቡ ግጃዅ መልኣክስኻ፡ “ይአደራ፣ ነን ውረኒ ግን?” ዮ ወጝቀርዅንሉ።

⁵ ኒ ይኸ፡ “ውረኒ ኣከነት አርእለማ?” ይዅለ።

ኣንኻ፡ “አርእሊ ይአደራ!” ይዅንሉ።

⁶ እንሲን ኒ ንሰና ይዅለ፣ “እና ኒን ዘሩባበልትል እንታዅ ቆል ጃሩዅ ግን፣ ‘ይመንፈስድ ግራ፡ ሒልዲ ደቕብዲሲ ኣኽላ’ የኵ ጃር ጻባኡቱዅ።

⁷ “ዎ ጊራ በሀር፣ እንቲ አውኒ ግን? ዘሩባበልዲ ጃብል ሸካ ኣኽቶ ግን፣እን ክርጛ ስንጥትሪት ፍዶሰና፡ ‘ጃር ገውርኒት! ጃር ገውርኒት!’ ይኖ ጨርሕድኖ ግን።”

⁸ ንሰና ያዅ ቆል ጃሩዅ ኰዶ ይል እንቱዅ፣ ⁹ “ሰረት እና ልጝን ሻትኵዅ ናንትት ዘሩባቤልዱ ሰረትንዅሉ፣ ኒናንትት ኰዶ ተመምድድኖሉ ግን። እንሲን እንትን ጃር ጻባኦቱዅ እንተል እኝሻቐትለ አርእትኖ ግን። ¹⁰ “እን ግናቲት ጋራት ግርጉሲ ቃበባዅ አውንኒ? እን ብራ ኒልክሊ ጅልወው ዕልል ጃሩ፡ እን ዘሩባቤልዲ ናንተል ህምባዅ ኳና ቀየሲሰነስ ፈርሓትድ መኸልትድኖሉ ግን።”

¹¹ ኒድ ደምቢ እን መልኣክሲ፣ “እን ቲዃ ገምዲሰና ላው ሸጝገብሊ ህምበው ካን ወኸቱ ውረኒ ናው?” ይዅንሉ።

¹² ኰዶኽር፡ “እና ለጛ ቱቦራ ደሀቡውድ ገባ ህምበው፡ ለጛ ለጝክክ ደሀቡ፡ ደድ ደሀብ ጅብረው ውረኒ ናው?” ይዅንሉ። ¹³ ኒኻ፡ “ወረኒ ኣከነት አርእለማ?” ይዅለ።

ኣንኻ፡ “አርእሊ ይአደራ!” ይዅንሉ።

¹⁴ እንሲን ኒ፡ “እና ለጛ፡ እን ብሪጃር ኒትክዅ አድረስ አገልገልድድኖ ሸመትሶ ህምበው ግን” ይዅለ።