3

¹ እን ከዳ አዋዅ እያሱት መልኣክ ጃርዅድ ጃብል ደውዮ ዋኑ ቋሊስዅለ፡ ሼጣን ኰዶ ሸከይሮሉ ኒላው ገፍድ ደውዮ እርጕዅ። ² ጃርኻ ሼጣንሲ፡ “እንቲ ሼጣን ጃር ገንሕንኵት፣ እን ኢዮሩሳሌምቲ ፍሪራዅ ጃር ገንሕንኵት፣ ኒን ላኺልድ መንተልሳዅ ገኣ ኣኽጋዅማ?” ይዅሉ።

³ ኢያሱኻ ሰረን ዓማቕረው ሰሮ እን መልኣክ ጃብል ደውዮ እርጕዅ። ⁴ እን መልኣክኻ እን ኒጃብል ደውዮ ርገውሲ፡ “እን ሰረን ዓመቕረውሲ ኒልድ ፍደሎም” ይዅሎም።

ኢያሱትኻ፡ “እነሓን፣ ኵሓራምሲ ኵልድ ሺርድዅን፣ ሰረን መለምልኽር ሰስዅንካ” ይዅሉ።

⁵ ኣን ይኸ፡ “ኒ ኣዀርሊ ሻሽ ላጭሕ እሰሉ” ይዅን። ናውር፡ ሻሽ ላጭሕ ኒኣዀርሊ እሲኒዅሉ፣ እን መልኣክ ጃርዅር ኒገቢል ደው ዮ እርጕዅ። ⁶ እን መልኣክ ጃርዃ ኢያሱት ንሰና ዮ መዀዅዅሉ፣ ⁷ “ጃር ጻባኦቱዅ ንሰና የኵ፣ ‘ይደርብድ ወንተተርደን፡ ይትእዳዳትሲ ኰዶ ተከውረን፡ይልጝንሲ መንገድቶ ግን፣ እን ይደሪበትልኽር መድ አርቶ ግን፣ እና ነት ደውዮ ህምበውድ ነበክል ኣካን እውየካ ግን።

⁸ “ ‘እማ ዎ ኢያሱ ከዳ አዋዅ፣ ዋሲ፣ እን ኵጃብል ደውየው ኵጨርኽር፡ እን ንደምቢ እንትሮ ፈረውድ እሻራት ግን፣ እነሓን፡ እን ይገኝጂና ላጝከስ ነቕስየሉ ግን። ⁹ እነሓን፡ እን ኣን ኢያሱር ገሻል ገምዳዅ ክርጛ፣እና ላ ክርጚል ለጘታ ዕልል ህምበኵ፣ ንርትል ይኸ፡ወቀጦ ሰአልያ ግን፣እና ብሪዅ ሓኵርሲ ላኳሪል ሺሽድየሉ ግን’ የኵ ጃር ጻባኦቱዅ።

¹⁰ “ ‘እን ግርጋ እንድሂስ፡ እንተልድ ላዅክ እንታ ካን ወይኒሩዲ በለሱዲ ዓጝቀይል ኒጨረስ ሽጝሮ ግን፣’ ” የኵ ጃር