2

¹ ሓዲስ ኰዶ፡ ይገሽ አወት መኸልትዅን፣ እነሓን፡ ይጃብል ግርዋ ገመር ኒድ ዓቀነናዅ ሸኻዅ ቋልዅን፣ ² ኣን ይኸ፡ “አወት ፈርቶ ግን?” ይዅንሉ። ኒኻ፡ “ኢዮሩሳሌም ንር ሺርጝዲ ንር እዳናርዲ ውሪከው ኣኸት ቀየስያ ፈረኵን እⶖኵዅን” ይዅለ። ³ እን ይዲ ጋቡ ግጃዅ መልኣክ ፈሩዅ፣ አሪዅ መልኣክ ኰዶ ኒዲ አረርስጚሮ እንቱዅ፣ ⁴ ንሰናኻ ይዅሉ፡“ጋጚ፡ እና በጥሕሲ ንሰና ይሉ፣ ‘ኢዮሩሳሌም እን ንር ዓጝቀይል ህምበው ከውዲ ማልዲር ብጅኽልድ ጐዅ፡ ከለብ እጝግግረሪ ዕርዲረሰና ኣኽቶ ግን፣ ⁵ ኣን ይላውድ ንር ላው ሸጝገብል ከለብ ለኺዅ ኣኽየላ ግን፣ንር ነበክልር ንር ክብር ኣኽያ ግን’ የኵ ጃር።

⁶ “ለዃ! ለዃ! ብሪ ግብለትልድ እግራ” የኵ ጃር፣ “ኣን፡ እን ሰጃ ወላውል ሰሚውሰና ዳሕ ሲዅንኩም” የኵ ጃር።

⁷ “ዎ ጽዮን፡ እን ባቢሎንድቝረዲ መንደርትራኽር፣ እግሪ።” ⁸ ጃር ጻብኦትዅ ንሰና የኵ እⶖኵዅ፣ “እን ካብር፡ እን እንተት ወረረውሊኩም እኝሻቖለ ደምቢ፡ እን እንተት ተመዳዅ ኒይዕልዅ ስርጒት ተመደኵ፣ ⁹ እነሓን፣ ኣን ይናንሲ ናል ጕድያ ግን፣ ናገኝሺጝር ወረርድኖሎም ግን፣ ኒድ ደምቢ፡ ጃር ጻብኦትዅ እኝሸቐትለ አርእትኖ ግን።

¹⁰ “ዎ ጽዮንድቝራ፣ ኣን እንተረኵን እⶖኵዅን፣ ኵነበክልኻ መንደርትያ ግን እማ፣ እልል ዪ፣ ፈርሕኽር” የኵ ጃር። ¹¹ “እን ግርጋ እንድሂሲ ገሪው ቆምያት ጃርሊ ጨግዕስትድኖ ግን፣ ይእክኽር ኣኽድኖ ግን። ኣን ኰዶ እንታ ነበክል መንደርትያ ግን፣ ጃር ጻብኦትዅ እኝሻቓትለኽር አርእትኖ ግን። ¹² ጃር እን ብሪ ሻትክሊ፡ ብራ ያሁዱዅሲ ኒርስቲርሰና ሃበ ለውሮሉ ግን፣ ኢዮሩሳሌምትኻ ሓዲስድ ፍሪርዶላ ግን። ¹³ ጃር ኒመስከብ ሻትክልድ ጐ ህምበኵ እማ፣ ስኻ ሰራዅ ኒውክ ኒጃብል ሰቖብን።”