1 እማ ገድም ይሁዳ ውረንኒ ኒመኽሰብ ሰመተርስና ውሪል ነፍዓኹን ። 2 ኒድክድ ገርኹ ግን፡ሰልፍድ ቆል ጃሩኹ ናድ ፋነይነድ እውስትኹሎም። 3 ናብጅኻን ናልድ እምንሰው ኣከግነንኻ ውረንኒ፡እን እምንሰገው ናኣክነማ እን ጃሩኹ እምነሲ ብላሽ እሳኹሉ ኣኾ። 4 ያእ ኢፋሉ፡እን ኩቆልድ ጨደቅቶ ፈረድሰንካኽር ረትዕቶ ግን ያኹ ክቱብሰና ጃር እምንዱኹ ኣኸት ኒውክ ኣዳምኻ ቡጛ ኣኸት አረርሰኩ። 5 እን ይና ዓመጭ ጭድቂ ጃብል ቋሊሳኹ ኣኾ ደንቢ ውራ ይንን፡ጃር ኒሓሩቆትሲ ገምደሰና ዓመጨንተመኒ፡ አዳምር ጋብሰና ጋበኩንኩም እንኩኹን። 6 ኢፋሉ፡ኣዋህበ ደአም ጃር እድንየት ፈረድሮላ። 7 እን እምኑኹ ጃር እንይብንድ ኒክብርድ ኮዶ ደምቢ ውሪኹ ደአም ኣን ሓራሙኹሰና ኣኾ ፈረድሳኹን። 8 ኣውሰና ደአም እንገለ ናልድ ጀኸነውድሰነና እን ገለኻ ትክያኹ እንትሮር መታንታ ምቁላ እስኒን ይናኽርሰና የውና እሰግናኽር፡ነድ ፍርድ ትክያኹ ግን። 9 ውረንኒ ደአም ናልድ ክድናኹሉማ ህንባኹንና፡ላሪ ድኳ ይሁድ ኣኺኒን ጸርኣውያን ናውክ ሓራም ኣንቀይሊ ኣኽነት ሰልፍ ሸከይኖ ህንብናኹን፡ 10 ኒሰናኽር ከተብሶ ህንባኹ “ላኹ ድኳ ጫድቕ እላ” 11 ላኹ ድኳ ፈጠናኹ እላ ላኹ ድኳ ጃርሲ ጀራባኹሉ እላ። 12 ናውክ ጀወሉኹ፡ናውክ ላገሽ ኣኽኖ ነፍዓገው ኣኽንኹ፡ትክያኹ ኣሳኹእላ። 13 ናጉርጉማ ብስታኹ አርብ ግን፡ናላንቅድ ምለናኹ ና ክንፉር ምጨተ መንደላዩኩ ሕንበኩሎም። 14 ና አብ እሸነዲ ምረትዲ እንታኽቶ ህምባኹ ግን። 15 ና ልኩክ ብር ብቅስኒል አሸሻኹ ግን። 16 ናጉግሊ ድደዲ ጅርበትዲ ህንበኩ። 17 ጉግ ሰላሙኹሲ አርእኒሉ። 18 ናዕል ጃብልኻ ጃርሲ ጒኢትና እላ 19 ኣኽን ግራ ኒው አብ አበስትሮ ንርዉክ እድንያኽር ጃር ፍርድ ኣንቀይል እንቶታዲ እን ፍትሕ ያኹሲክሉ እን ፍቲሕ ዓንቀይል ህንበውሲ ከም ጋበትሎም አርእንኹን። 20 ፍትሕታዲ ሓራምሲ ግን ኒ አርእሲሳኹ እማ፡ስኻ ሻኹክ ኒውክ ኒጃብል ፍትሕ ደርብድ ጨደቓዅ እላኒ። 21 ናን ላኪን ፊትሕዲ ነብያዲሲ ሰምዕሳኹ ጭድቅ ጃሩኹ ፍትሕ እንገት ወድሕስቱኹ። 22 ማለት ጭድቕ ጃሩዅ እምነድ የሱስ ክርስቶስድ እምነውድ ናድክድ ግን።ንድ ፈለለይና እላኒ እማ ። 23 ናውክ ሓራም እሲኒኹ ክብሪ ጃሩኹኽር ብኑኹ፡ 24 እን የሱሱ ክርስቶስድ አረርሳኹ በዳ ደኩና እንዳኸድ ገድድ ጨደቀናኹ። 25 ንድኻ እን እማና ሰብር ጃሩኹ እስተኹ ሓራምሲ ደክሮ ባርነዲንሉ ጃር ኒ ጭድቕሲ ቋሊስሮ መታን እምነትድ ኒክብርድ አረኪሰና እሰ ደውሲኹሉ። 26 ኒ ጫድቕ ኣኽሮ እምነት የሱስርኹልድ ኣኻኹሲኽር ጨደቕ ድሮ ናን እና ወክት ኒል ጭድቂ ወድሕድሮ ግን። 27 ሓበንስናኻ አዊል ህንባኹን ከብቲኹ፡አውር ፍትሕድ፡ክድመት ፍትሕድማ፡ኣኽላ፡ፍትሕ እምነትድ ደአም ግን ። 28 እማ ገድም አዳም ፍትሕ ክድመት እንገት እምነትድ ከም ጨደቕት ይነኩን እንኩንኹን። 29 - 30 ወሪ ይኸ ጃር ሁድር ጃር ካየማ ኣኾ፡ጃር ቆምያታኹር ኣኽጋኹማ።እን ሰመተርሳኹሲ እምነትልድ እንሰመትርስጋዅሲኻ እነትድ ጨደቐድኻ ጃር ላኹ ኣኽነዲ የዋ ቆምያታኹር ግን። 31 እማ ገድም ፍቲሕሲ ማ እምነትድ ፋሕስናኹኑ እንኩንኹን፡ያእ ይፋልና ፍትሕስታ ተብድናኹንሉ እንኩንኹን።