ፊዃ-2

1 እማ ገድም እንቲ ፈረድራኽር አዳም አኽረኽርክ ኣክረን ፡እን ፈረድራኹሉ እስራኹሉ አኽርነዲን እን አሪውድ ፈረድራኹድ ኩሹቲ ኮነንዳኹሉ እንኩሩኹ እማ ሰበብ ሻኽላ። 2 ይንታዲ እን ነወያኹ እሰውድ እን ፍርድ ጃሩኹ እማና ኣኸት አርእንኹን። 3 እንፋ እን ነስ ተከው እሰውሊ ፈረድራኽር፡ኩላውድኽር እስራኹሉ ኣዳም እን ፍርድ ጃሩኹልድ ሽልቁርዳኹርማ ተካኹንካ እንኩኹን። 4 ወሪኸ በከት ጃሩኹ፡ኑዛዘትል ወንተረትካ አርእን ብነድ ኒተጀርና በከቱኹዲ ምኹረንታ ኒኣክነዲ ኒዓቅልዲትማ ቃበብራኹን እንኩርኹን። 5 ኣኽን ግራ ኩተብዲ ኩተናዘዝና ለበኪኹ ብነዲ እን ግርጋ ሓሩቆትሩኹዲ ወድሕስትና እምንዱኹ ፍርድ ጃሩኹዲ ገማኹ ሓሩቆት ኹኣኽርሊ እክብራኹ እንኩሩኹ። 6 ኒ አዪ ኣዳምቲ ኒግብርሰና ኡሮሉ ግን። 7 ማለት እትክያኹ እሱኑ ሰብር እሲነ ግርመዲ ክብርዲ ድሂስና እንገት ጀረበው ዲመር ርሕ ኡሮሎም ግን። 8 እን ዓመጭነስ አዘዝተው ግራ እምንሲ አዘዝተገው ቀየርሰውሲ ላኪን ሓሩቆትዲ አምርዲ ገምሮሎም ግን። 9 እከይ እስረሪ ኒውክ ሪሕ አምሩኹ ጭንቀትዲ ጅርበትዲ ገምሮላ ግን፡ሰልፉ አይሁድድ ኒሰናኽር ጸርኣዊረድ፡ 12 10 ትክያኹ እሰኹድ ላኪን፡ግርመዲ ክብርዲ ሰላምዲ እውስትሮሉ ግን።ሰልፍ አይሁዳውረድ ኒሰናኽር ጸርኣዊረድ። 11 ፈለለይና እላኒ። 13 - 14 ጃር ጃብል እን ፍትሕ እሰው ግን ደአነው ግን ግራ ፍቲሕሲ ዋሰው ጫድቃን ኣኽኒኒ እማ እን ፍቲሕ እንገት ሓራም እሰውክ ፍትሕ እንገት ድድኖ ግን።እን ፍቲሕ ክሙኑ ሓራም እሰውክ ናዉክኻ እን ፍትሕድ ፈረድስድኖግን። 15 እን ፍቲሕ እንገው ቆምያት ናሕልና ሰምዕዱሎ ናሓስብኽር ኒሹር ኒሹ ሸከዩ ወሪ ገበቡሎም እን ክድመት ፍትሕሑኹ ናለበኪል ክቱብ ኣከት ቋሊሰነኩ እንኩኑኹ እማ እን ፍቲሕሊ ህምባኹ ናምራድድ ቀሰብስኖ እሰገው ኣኽኖ ደምቢ፡ ናውክ ፍቲሕ እንገው ኣከነንኽር ድኳ ናሹቲ ፍቲሕ ግናው። 16 እን ይወንጌልሰና እሰ ጃር ምስጢሪ ኣዳምሩኹሲ እየሱስ ክርስቶስድ ፈረዳኹላ ግርገድ ኒሰና ኣኽሮ ግን። 17 ኣኽን ግራ፡ይሁዳ ይስትረን ፍትሕድ እምንደን ጃርድኽር ሓበንስረን፡ 18 ኒ-ፍቓድ አርእረን እን ኒፍትሕልድ መሄርስሮኽር እን እምንሲ መርመርዶ ፈለይረን፡ 19 መርሓይ ዓረበውድ ጭልምሊ ህንበውሲ ቲኳ ኹኣኽኘድክር እምንስረን፡ 20 እንቲ ሃስሳንሲ ለበኪሰንታ ቆሊዕድ ክንሰንታ እንፍትሕልኽር መሰል አምርዲ እምንዲ ህምባኹካ ግን። 21 እማ ገድም እንፋ አሪውሲ መሀርድራኽር ኩሹቲኻ መሀርደለማ፡እንፋ ስዋጋ ይሮ ድውራኽር ኩላውድማ ስውራኹን። 22 እንቲ ፋይትጋ ይራኽር ኩላውድማ ፋይትራኹን።እንቲ ጣኦትሲ ፈንፈንትራኽር ኩላውድማ ሻትክ ልጝን ስውራኹን። 23 - 24 እን እንታ ሰበት ሱጙ ጃሩኹ ቆምያታ ጃብሊ ጃኽስታኹ ያኹ ከተብሶ ህምባኹ፡እንፋ ፍትሕድ ዋርዲትራኽር ፍቲሕሲ ፋሕስነድማ ጃርሲ ጀረብድራኹኑሉ። 25 ሰመተርስና ፍቲሕሲ ተከውረን ነፍዕረሪ ግን እማ ፍቲሕሲ ዳድረንኻ እን ሰመተርስና ሰመተርስና ብና ግን ኣካኹ ። 26 እማ ገድም እን ሰመተርሳኹ እን ፍቲሕ ጀረባኹ ስርዓትሲ ተከወኑ እን ኒሰመተርስና ብና ሰመተርስጋኹሰና ኣኾ ሺብተለሉ። 27 እን ኒስልፍልድ ሰመተርስጋኹ ኣኩ ፍቲሕሲ ተከዋኹ፡ኩት ፊደልድኽር ሰመተርስነድኽር ፍቲሕሲ ፋሕስራኽር ፈረድሮካ ግን። 28 ቋልስታኹድ አይሁዳዊራ ኣክና ይሁዳ ኣኽላ እማ እን ቋልስታኹድ ስኺል እስትረሪ ሰመተርስረሪ ሰመተርስናኽር ሰመተርስና ኣኽላኒ። 29 እን ኒ-ጅወድ አይሁዳዊራ ኣኻኹ ላኪን ኒ አይሁዳዊራ ግን፡እን ሰመተርስናኻ ሰመተርስና ለበኪኹ መንፈስድ ግን ግራ ፊደልድ ኣኽላኒ።እን ሳቡርኽር ጃርልድ ግን ግራ ኣዳምትልድ ኣኽላኒ።