ፊዃ-1

1 ጳውሎስ ገንሺን የሱስ ክርስቶስሩኹ ሃዋርያ ኣኽሮ ሽጝስታዅ ወንገል ጃሩዅድ ፈለይሳኹ። 2 ጃቢሶ ነብያትድ እንሻትካን ክቱባንሊ ሳዲሳዅሉ፡ 3 ኒዅራ ሰበትድ ስኸድዳዊትር ፈደንልድ እዃርሳዅ፡ 4 ኒ እየሱስ ክርስቶስ ይና አደራ ክሪልድ ኒጉነድ፡መንፈስ ሻትክድ ጃርዅራ አኸት ሒልድ ወድሕስታዅ፡ 5 ኒሱጙ ሰበትድ ናድካ ቆምያተል አዘዝትና እምነቱዅ ተከልኖ ኒድ ገዲ ሃዋርያዲ ከለብርናኽር። 6 እንትንኻ ናዲ እየሱስ ክርስቶስድ ሽጝስትድናኽር ግን። 7 ሮሜትል ህምብዳናኽር ሽጝስትድናኽር፡ሻትካንዲ እንከልስዳናኽርዲ ጃር ናትክሲ ይናኽር ጃርልድኽር ይናደራ የሱስ ክርስቶስዲ ገዲ ሰላምዲ ዋኒንተት። 9 10 8 እንተ እምነት ኒድክ እድንየትል ወሪስትነዲ ናድካ ጃብ ናድካ ሰበትድ ይጃርሲ የሱስ ክርስቶስድ ሓመደኩንሉ እንኩኹን። 11 - 12 እንተት ሃናእስነድ ገለ እውን ምንፈሳዊሪዅ በንየኩም፡ቋልየኩም ሰፍለልታዅን እንኹዅን።ማለት እን ይናሹር ይናሹትል ህምብረሪ እምነት እንተሪዲ ይሪዲ እንተልኽር እንተዲኽር ደፍእኖል መታን ታዲ ደው እንገት ከም ሓሰበትኩም ጃር ፍቓድድ ጠፍሓንታ አዪ ደርብድ ደንጎባ እንተል እንትያ ይጠሎዲ ዲማ ከምሓሰበትኩምኽር እን ወንጌል ኒዅሪዅድ ይመንፈስድ አገልገልዳዅሉ ጃር መስከርዶለ ግን። 13 እንትን ይሻን እን አሪው ቆምያተል እሰሰና እንተልኽር ፍራ አሪያታዲ እንተል እንትያ ይኮድጛስ ቀረጨት ናን ኣኽራሲክኻ ገብስተት አርእትኖ ጀረበኩን እንኩኹን። 14 ጸርኣዋንዲ አሪው ቆምያትዲ ለበኪውዲ ሃስሳንዲት እድዅ ሻዅን፡ 15 እማ ገድም ይሹሩዅድ ሮሜትል ህምብደናኽርሲ ወንጌል ድውየኩም ደለሞ ህምባኩን። 16 ወንጌል ሰልፍድ አይሁድሩውድ ኒሰናኽር ጸርኣውያንዱውድ እምናኹድኽር ኒትክ ሒልጃሩዅ እምናኹድ ግን እማ ወንጌልድ ስማረሊኒ። 17 እን ክቱብ ጫድቕ ላኪን እምነትድ ግን ኒ መንደርታዅ ይዅሰና እን ጫድቕ ጃሩኹ እመትልድ እምነትል ኒድ ወድሕስታዅ ግን። 18 ሓርቆት ጃሩዅ ሰሚልድ ዓገብል ኒድክል ዓመጭነዲትልኽር እን እምነትሲ ዓመጭድ ሰሰው ከውሊ ወድሕስታዅ። 19 ጃር በርህድዅሎም እማ እን ጃር ሰበትድ አርኣኹ ናል ዋድሕ ግን። 20 መሰምስ እሰናዅ ብድኖር መታን እንእድጛ መሀድስሩንጉሲ ተርሰ ኒክድመትድ አርእስታዅ ቋልስታዅ ኒባህሪኻ እንዲመሩኹ ኒሒልዲ ኒ መለኮትዲ ትክሰ ቋልስታዅ፡ 21 ኣኽንግራ ጃርሲ አርኡኑሉታ ጃርሰና ሀቢነ ከበርድገውሉኽር ሓመድገውሉኽር ኣኽነውድ ናምኹድ ብላሽ ኣኽኑኹ፡እን ፈጠናጋኹ ናለበካኽር ጨልመቱኹ። 22 - 23 ለበኪው ግን ዩኑ ሀሰስኑኹ እማ እን ደኳጋዅ ክብር ጃሩኹሲ ተካ ደኳዅ ኣዳምሩኹዲ ጀከልዲ ሰጃልኩክ ሻው ሕያይትዲ ለመም የውዲ ሻውሊ ቀየርንኹሉ። 24 - 25 እን እምንዱኹ ጃርሲ ብንሊ ለወትንኹሉ፡መሀዳኹ አብሊ ኒ ዲመሲ ገውርሳኹ ግን ኣሜን።ምሁድሲ ኣምላኽድነዲንኽር አገልገልድናዲንኽር ካርኻ ስኻ ናሹር ናሹሩኹሲ ጂብድድኖ ናለበካ ምራድድ ምቁለድ ደኩሶ እውኹሎም። 26 እማ ገድም ጃር ጂብኻ እንከሊሲ ደኩሶ እውኹሎም፡ናኡሰው እንጉቡእ አረሪሰና ናኹሲ ጉቡ እንጋዅ አረሪሰኒል ለወትንዅሉ። 27 እን ናነሰኸውኽር ኒሰና እን ናጉቡእ አርስና ኡሰሪዲ ባርኖ ናሹር ናሹትል ናኣኾር ምራድድ ሓውይኑኹ፡ግርው ግርወል ስርዕ እሲኒኹ፡አጅር ና ከትኒኹሲኻ ናኣኾርሊ ከለብርኑኹ። 28 እን ጃርሲ ናአምርሊ ሻኽድኖሉ ሓሰብገውሉ፡ጃርኽር ኒሰና ጉቡእ ኣኽጋኹ እሲድኖ ጂባኹ አምርድ ደክሶ እውኹሎም። 29 ዓመጭዲ ጂበዲ ሀርገፍገፍ ይነዲ ምቁሊትና እንተኻኹሎም ገሪው ቀንአት ኩና ዋኻ ተንኮል እከይ 30 ሕሹኹሽኹ የው ፡ልኸው፡ጃርሊ እንጠርሰው፡ገፍዐው፡ከበርሰው፡ጀሀርሰው፡እከይ መሀደው፡ናዋልደንሲ አዘዝተገው፡ 31 ደንቆሮታት፡ጠለመው፡ሻም እንግገው፡ሰኸንተገው፡ 32 ነን-እን ነስ ተከው እሰውሲ ክራ ወጀበትሎም እን እምንዱዅ ፍርድ ጃሩኹሲ አርኡኑሉታዲ እን እሰውሲሉድኽር ሕበርሰውሲክር ግራ እሰውሲሉ ካያ ኣኽላ።