1 እማ ገድም አብራሃም ይናኽር ስኸድ ውራ ኣሮ ይኖግን፡ 2 አብራሃም ግብርድ ጨደቐኹ ኣከንታዲ ገለ ዋርዲታዅሉ አርድድ ሻኹ ግን፡ጃር ጃብል ላኪን ኣኽላኒ። 3 እን ክቱብኻ ውራ ያኹን፡አብራሃም ጃርድ እምንኹ እማ ኒንጭድቒ ኣኾ ሺብስትኹሉ። 4 እን እሰኹሲኻ ኒፈክ አዳኹሰና ኣኾግን ግራ ገድሰና ኣኾ ኣኽላ ሺብስታኹሉ። 5 እን ሓራሙኹሲ ጨዳቕዳኹድ እምናኹድ ግራ እሲጋኩድ ላኪን እን እምነት ጭድቕድ ሺብስተለሉ። 6 ዳዊትኻ እን ጃር ግብር እንገት ጭድቕ ሺብስታኹሉ አዳም ገድኹ ግን ያኹ ሰና ፡ 7 እን ናዓመጭ ባርስታኹሎም ናሓራምኽር ሰስታኹሎም ግዱ ግን። 8 ጃር ኒሓራምሺ ሺባጋኩሉ ኣዳም ገዱኹ ግን። 9 እማ ገድም አብራሃምቲ እን ኒእምነት ጭድቕድ ኣኽሮ ሺብስትቲሉ ይነክኩን እንኩንኹን እማ እና ገድናር ኒን ሰመተርሰውድ ካየማ ንር እማ ሰመተርስገውድኽር ግን። 10 ኣዋሃብረግን ሺብስትረሪሉ ሰመተርሶ ዋኑመንሪ እማ ሰመተር ስጊ፡ሰመትርስጊ ዋኑግን ግራ ሰመተርሶ ዋኑታ ኣኽላ። 11 እን ጭድቒ ሺብስትሮሎም መታን ይኖ ሰመትርስግኒ ዋኑኑ እምነውድ ናድክድ ናኽር ኣኽሮር መታን ታዲ እን ማሕተም ሰመተርስጊ ዋኑ አረረሪላ ጭድቕ እምነትሪ ሰመተርስኒኹ አርእሲስና ከለብሩኹ ። 12 እኽር ሰመተርሰውዱኹር ኣኽሮ መታን ማለት፡እን አብራሃም ይነኽር ሰመተርስጊ ዋኑ አረሪላ እመንት ንር ፈለኺል ፈረውድኽር ግራ ሰመተርስኒልድ ፈረው ካያ ኣኽላ። 13 እን አብራሃምቲ ወሪ ኒፈደንሲ እዲነት ለዋኹ ኣኽሮር መታን እውስትረሪሉ ሳዳ፡ጭድቕ እምነትኹድ ግን ግራ ፍትሕድ ኣኽላ እማ። 14 እን ፍትሕልድ ኣኸው ወረስነን እምነት ብላሽ ኣኽርድ እን ሳዳኽር ጠለምስርድ። 15 እን ፍቲሕ ሓሩቆትግን ናዕሳኹ እማ እን ፍትሕ እንጋኹሊ ላኪን ኒል ፋሕ ስናኽር እላኒ ። 16 እማ ገድም አብራሃምር እምነትልድ አኻኹ ኒውክ ኒፈደንኽር ግን ግራ ፍትሕልድ አኻኹ ካያ ኣኽላ።እን ሳዳ ተብቶ ገድድ ኣኽሮር መታን እምነትድ ግን ኣኻኹ።አብራሃምኻ ናድካ እኽር ግን። 17 እን ገሪው ቆምያተር እኽር እሰካ ህምባኹን ያኹ ክቱብ ህምባኹ እን እምንድኹድ ጃብል ክሪውሲ ጉዳኹሎም እን ዋኒገውስኽር ህንባኹድሰና እሰ ሽጛኹሉ ጃር። 18 እን ይስታኹድሰናኽር ኹፈደን ንሰና ኣኽሮ ግን ሳዳ ዋኒጋኹሊ ገሪው ቆምያትድ እኽር ኣኽሮ ሳደድ እምኑኹ። 19 ሊኽ አመሪኹ ኣኩ ክራ ኒፊኹትኹዲ ክራ መህጸን ሳራሩኹዲት ቋሉ እምኒል ቂልስላ። 20 ላኪን ጃርሲ ሞሳ እዉ እምኒል ሒሊቱኹ ግራ እንሳዳ ጃሩኹሲ ኒእምና ብነድ ሰጋእጋ ይላ። 21 እን እዋኹሲሉ ሳደድ እሲሮሉ ከም ገረሰት ትክሰ ፈሀሞ እርጉኹ። 22 እማ ገድም ጭድቕድ ሺብስትኹሉ። 23 - 24 ኒንኻ ይና መታንኽር ግን ግራ ኒመታን ካያ ከም ሺብስትገትሉ ከተብስላ።ይነድ ናን እየሱስ ይናደረድ ክሪልድ ጉደትሉ እምናኽርስኻ ሺብስተኩና። 25 ኒን ይና ሓራም ሰበትድ በዳ እውስቱኹ ይና ጭድቕድኻ ጊኹ ።