1 1. ዘንጊራ ታካኹ ፡ ሻንብቆራ እውስትኹለ ፡ ላኽ ኻ ፡ ጊ እማ እን መቅደስ ጃሩኹዲ መስዉኢራዲ ፡ እን ኒል ፍግም ያውሲኽር ፡ መካሪ ፡ ይኹለ ፡፡ 2 2. እን ፡ ከደንድ ህንበው ልን መቅደስኹድ ህምባኹ መንደቅ ላኪን እክድ እውስቱኹ እማ ፡ ባሪሉ መከርግሉኽር ፡ እን ሻትኪ ከታመትኻ ሰጅረንድ ሰጃ ኣርባ ዳድኖላ ግን ፡፡ 3 3. እን ለና ይምስክርኽር ፡ ስሚር ሰርኖ ፡ ስሕዲ ለና ሊኽዲ ወልትረንዲ ግርጋዲ ተነበይድኖ እውየሎም ግን ፡፡ 4 4. ኒን እን ኣዳራ ብሪኹድ ጃብል፡ ዳውየው ለና ኣውልዕዲ ለና ቀንደልዲ ግናው ፡፡ 5 5. ላኹር ጎትሮሎም ጀረበን ፡ ናኣብልድ ላኻ ፋኹ እማ ናኣፋይትስ ቃኹሎም ፡፡ ላኽር ጎትሮሎም ጀረባን-ኻ ፡ ኒሰና ክርዶ ኣስተሃላኹሉ ፡፡ 6 6. እና ነሄን እን ፡ ግርጋት ናትንቢቱት ስዋ ጣንብጊን ሰማስ ኣበድኖ ስልጣን ሻኽኑኹ ፡፡ ብርሊ ቀየርድኖሉ ዓቅ ኣኾርዲ ብረት ናው ጀረበነሰና ማዓትድ ኩድኖላ ስልጣን ህምባኹሎም ፡፡ 7 7. ናምስክርናስ ፈጸምነሪትኻ ፡ እን ቆርልድ ፋኹ ኣራዊት ናዲ ውግእ እሲሮኽር ቂልሲስሮለምኽር ኩሮሎምኽር ግን ፡፡ 8 8. ናግናዳትኻ ፡ እን ኣካን ናኣደራ ሰቀልስሪላ ፡ መንፋሳዊራ ሓሳብድኻ ሰዶምዲ ግብጽዲ ይስትረሪ በህሪ ከታማ ከብቲሮ ግን ፡፡ 9 9. ከውኻ ፡ እን ቆሚያዲ ፡ጨንስታትዲ፡ ቃንቃታትዲ፡ እክዲ ፡ እን ክከናዳት ናኹሲ ሰኻ ግርጋዲ ገፍዲ ቃላናኹሎም ፡ እን ናግናዳት ኣርብሊ ገምሮ ፈቀደኒኒ፡፡ 10 10. እና ለና ነብያት ፡ እን ብሪል መንደርተውሲ ጀረብዱኑሎም እርግኑኹ እማ ፡ እን ብሪል መንደርተው ናድ ፈርሓናኹር ባህር ያኹሎም ፡ ናሹር ናሹትላ እውን እንሻቅድኖ ግን ፡፡ 11 11. ሰኻ ካረዲ ገፍዲር ደምቢ - ኻ ፡ መንፈስ ርሑኹ ጃርልድ ትዉኹሎም ፡ ናልኩኩድር ዳው ይኑኹ ፡ እን ቃልናውሲሎምሊ-ኻ በሄር ጉኢ ገምኹሎም ፡ 12 12. ናራ ዓረጋ ፡ ያኹሎም በሄር ዳሃይ ሰማይልድ ዋስኑኹ ፡፡ ብካናድኻ ሰሚል ዓረግኑኹ እማ እን ና ኣፋይቲ ቃልንኹሎም ፡፡ 13 13. እን ሳዓት እንዲድኻ ተባኹ ኽንቀል ቃልና ብሪኹ ኣኺኹ ፡ ሽካር ናን እን ከተሚኹር ላብኹ ፡፡ እን ሓንቀል-ቃልና ብሪኹድኻ ለናታ ስሕ ከው ክውስትኑኹ ፡ እን ከብተውሲ-ኻ ጉኢ ሻኹሎም ሰሚኹ ጃርሲኽር ክብር እዉኒኹሉ ፡፡ 14 14. እን ሊነር ፍዳ ደኩኹ ፡ እናኻን ፡ እን ሲኾር ፍዳ እሽሾ እንተራኹ እንኩኹ ፡፡ 15 15. እን ለናተር መላኣኽር መለካት ናፍሑኹ ፡ ሰሚልኻ ፡ ሕክም እድንዪኹ ይና ጃርትሪ እን ቅቡእትሪ ኣኺቲ እማ ዲማ ዳይም ነገስሮግን ፡ ያኹ ዋዕያኹ ደሃያት ኣኺኹ ፡፡ 16 17 16-17. እና ጃር ጃብል ናዝፋናትሊ ኮፍይኖ ህምበው ለነራንዲ ሰጃ ሽማግለታት -ኻ ፡ ዎ ህምብራኽር እርግራኽርዲ ፡ ኒትክ ገረስራኽር ጃር ማልክ እን በሄር ኩስልጣንሲ ኣድራኹሉ ኣኽረውድር ነገስራኽር ኣኽረውድር ፡ ሓመድናኹንካ እንኩንኹን ፡ ይኑ ናብሶትድ ፍግም ይኖ ማልክድ (ጃርድ ) ፍግም ይኑኹ ፡፡ 18 18. ቆሚያት ሓረቅርኑኹ ፡ ኩቁጠዓኽር እንቱኹ ፡ እን ክረውሲ ፈረድረኹሉ ፡ ኩ ገንሺንሲ ፡ እን ናብያትዲ ሻትካንዲ ኩስኝሲ ጉኢተው ግናቲትዲ በህሪንዲ ፡ ና ዓስቢስ እውራኹርሉ ፡ እን ብራስ ዲሰውሲኽር ድሂስራኹርሉ ዘመን እንቱኹ ፡ ይኑኹ ፡፡ 19 19. እን ሰሚል ህንብረሪ ልን መቅደሱኽር ብድስትቲ ፡ እን መቅደስሊኽር ታቦት ኪዳን ቃልስቱኹ ምርክዲ ህድድናዲ ሓንቀልቃና ብሪኹዲ በሄር በረዲ ኻ ኣኺኹ ፡፡