1 1. በሄር ተኣምራትኻ ሰሚል ቃልስቱኹ ፡ እኺና ፡ ካራ ሰርዶ ፡ ኣርባኻ ንር ልኩክ ዓንቀይሊ ፡ ኣኽሊል ሽካ ለና ሽንግርኻ ንር ኣኾርሊ ሻኽርደሪ ፡ ቃልስትቲ ፡፡ 2 2. ጎድግርግንኻ ፡ ቅልው ላው ኣኻርኒኹድር ዋዕ ይረሪ ፡ ኣኻርቶኻ ጸዓርደሪ እርግቲ ፡፡ 3 3. ኣሪኹ ትእምርቲ -ኻ ፡ ሰሚል ቃልስቱኹ ፡ እናሐን ፡ ለናታ ኣኾትዲሽካ ጊኽዲ ፡ እን ኣኾትልኽር ለናታ ዘውዲ ህምበውሎም በሄር ሰራኹ ሰበራ ፡ 4 4. እን ኒሽማርድኻ ሲሶ መላእኽቲ ሰሚልድ ወተሩኹ ፡ ብሪልር ማልኹሎም ፡፡ እን ሰበራ-ኻ ፡ ኣኻርደሪ እን ንርኹራስ ዋሓጥሮሉ ማታንዮ ፡ እን ኣኻርደሪል ኣኺና ጃብል ደው ዩኹ ፡፡ 5 5. ኒ ናትክ ቆምያትሲ ግምቢ ሸኺኹድ ጋሴይሮሎም ህምባኹሉ ጅና ፡ ናሳኹራ ፡ ኣኻርቲ ፡፡ እን ንርውላድኻ መልካይዲ ኒዝፋንዲትል መንጠልሱኹ ፡፡ 6 6. እን እኺናኻ ፡ ስሕዲ ለና ሊኽዲ ወልትረንዲ ካራ ቂስድኖላ ፡ እን ጃር ደለምዳኹሊላ ኣካንሊ በረኺል እግርቲ ፡፡ 7 7. ሰሚላ ሐርብ ኣኺኹ ፡ ሚኪኤልዲ ኒመላእክትዲ እን ሰበርዲ ተሓረብኑኹ ፡፡ እን ሰበርዲ ኒመላእክትዲ ኻ ተሓረብንኹሎም ፡፡ 8 8. ቂልሲስኒሎም ኻ ፡ ኒደንቢ ናኣካን ሰሚል አርስላኒክ ፡፡ 9 9. እን ህንበክ እድንያት ሰሓትዳኹላ ህምባኹ ድያብሊስዲ ሰይጣንዲ ይስተው በሄር ሰበር ፡ እን እማኒኹ ምራዋ ማልስቱኹ ፡ ኒመላእኽቲኽር ኒዲ ማልሰትኑኹ ፡፡ 10 10. ሰሚልኻ ዋዕያኹ ደሃይድ ፡ እን ቂርዲ ገርክዲ ይና ጃር ጃብል ከሰሱሎም እርጋኹ ከሳሲራ ይናሻኑኹ ማልስቱኹ እማ ፡ ናን ደኣናዲ ስልጣንዲ ሕክምዲ ይና ጃሩኹ ኣኺኹ ፡ ምልክ-ኻ እን ቅቡኡኽ ግን ፡ ዩንሰናክ ዋስኹን ፡፡ 11 11. እን ገንሻል ጀላብዲ እን ቆል ምስክር ጃላብዲ ኻ ፡ ቂልሲስንኹሉ ፡ ናርሕስኽር ክራ ኣኽራሲክ እንከልኒላ ፡፡ 12 12. እማ እንትን ሰማያት ፡ ንርትል መንደርትደናኽር ፡ ፈርሓ ፡፡ እንትን ብረዲ በሓርዲ-ኻ ፡ ድያብሎስ ከላላ ዝበን ዋነትሉ ኣርኦ ፡ ተባኹ ሕርቅርቆትድ ገሞኩም ህምባኹ እማ ፡ ፍዳ ኣኽድኒኹ ፡፡ 13 13. እን ሰበር-ኻ ብሪል ማልስተት ፡ ቃለሰና ፡ እን ናሳኹራ ቁራ ኣኻርደረሪ ዳገንኹላ ፡፡ 14 14. እን እኺናት-ኻ ፡ ጋሽ እን ምራዊኹልድ ሺርዶ ዘበንዲ ዘበናትዲ ገፍዲ ዘበነዲ ቂቶ ፡ በረኺር እን ንር ኣካንሊ ባንጉርቶ ማታን ፡ ለና ክንፍፍ እን በሄር ንስሪሩኹ እውስትኹላ ፡፡ 15 15. እን ምራዋ-ኻ ፡ ኩራ ኣድሮላ ማታን ፡ እን እኺናት ንር ጉርጉርበት ኩራ ኣኸኹ ዓቅ ኒኣብሊድ ፍዱኹ ፡፡ 16 16. ብረኻ እን እኺነት እልልቲላ ፡ እን ብራ ንር ኣብሲ ብድሮ ፡ እን ሰበር ኒኣብልድ ፍዳኹሉ ኩረስ ወሓጥኹሉ ፡፡ 17 17. እን ሰብርኻ እን እኺናት ቆጥዕስኹላ እማ እን ትእዛዛት ጃሩውስ ተከዋው መስክር የሱስ ሸኽኖ ህምበነው ከብተው ንር ፈደንዲ ተሓረብሮ ፈሩኹ ፡፡ 18 18. ቑሻ ባሓሩሊኽር ደው ዩኹ ፡፡