ሰሰር ፊዃ (ፊዃ-9) ኒታለይቶትሲ ኪሰሪ በሸርድድኖ እንሸቐት ¹ እን ሽካ ለጘት ላት ሽጘኻ መጃኒን አወይሲ ምግዱራን ሲኽር እቢስድኖ ሒል እዎሎም፡ ² ሲመር ጃሩዅሲ በሸርድድኖኽር ምግዱራንሲኽር እቢስድኖ እንሸቑኹሎም። ³ እን ና ጉግሊ ግምቢ አኽን ሕሽኩልሲ ሳንስዓ አከጝር ሰወልዲራ አከጝር አድጋ ለጛ መስደርያት አከጝር አድጋ። ⁴ እን ትውድና ልጝሊኻ አኻ ኒልድ ፈርትናሲክ። ⁵ እንከለብርግነኩም ኮላ እን ድገትልድ ፍድኖ ናድ ሳምዕ አኽሮኩም እንተልኩኮልድ ዕሳሲ ከፍከፋ። ⁶ ናዋ ድገትልድ ድገትል ጅልዉኑ ኪሰሪ ወንጌሉዅሲኽር አበሸርዱኑ ናትክ ሽኹሽተውሲኽር እቢሱኑ እርግኑዅ። ⁸ ኒወረ ሄሮዱስትል ገእየት ⁷ 7-8.ሄሮዱስ ቴትራርክ ነስ ናትክ ዋሰሰና ላዋ ዮሓንስ ጠመቕደንታ ክሪልድ ጔ ህምባኽው ላዋ ኤልያስ ቋልስቱዅ የው ዋስነዲን ተሓደቡዅ።እማ ⁹ ዮሓንስቲ አኾርሲ ቀረጪስዅንሉ እና ኒድ እናሃቢነ ወሪሰው ኣን ዋሰው ደአም አውኒ አኽራዮ ቋልዶሉ ጀረቡ እርጉዅ። ¹⁰ ኒታለይቶት ወንተርነሰና እን እሲነውሲ ጂጝስቲኒዅሉ።ኒኻ ቤት ሳይዳ ይስትረሪ ድገትል ናቱ ጭምዊትዅል አድዅሎም። ¹¹ እን ከዋ ኒስ ዋስነሰና ለሄክንዅሉ ኒኻ ከለብሮሎም ሲመር ጃሩዅድ ጋቢዅሎም።እንሽዅዳ ሻውሲኽር እቢሱዅሎም። ¹² ኩርጚተሰናኻ እንሽካ ለጛ ኒል ስኩር ይኖ ይን ህምብናዅ ከደን ግን እና ይናገቢል ህምባድገትልር ቀሻዊተልር ክድኖ ሙነትር ኤርድኖ ስብዲሎም እና ከውሲ ይንኽውሉ። ¹³ ኒኻ “ቊስታዅ እንትን እወሎም ይዅሎም።ኔስካ ከውድ አካ ነብራ ፈርኖ ጅበግነን ይነዲ አጝኳ ሳንስዒዲ ለጛ ዓሰዲ አኽገት ላሪ ሻኽኒ” ይንዅሉ። ¹⁴ ናዋ አጝኳ ስሕልድ አወይሲ እርግኑዅ እማ አጝ አጝኩረጝንድ ተር ስድነ ዓገለሎም ይኹሎም። ¹⁵ 15.እንዳኻ ሃቢነዅ። ¹⁶ 16.ኒኻ እን አጝኳ ሳንስዓዲ ሌጛ ዓሳዲት አዶ ዕልልሲ ዓስተርሊ በልሰ ገውሮ ሸረረፎ እን ከዋ ጃብል ሱኩስድኖሎም ኒታለይቶትድ ላምስዅሎም። ¹⁷ 17.ናውኻ ቑኖ ብትኑዅ እትኑዅ እንከብተውድኻ ሽካለጛ ስግርፍኦታት እንሰኽኖ ጉድኑዅ። ¹⁸ ኒቱ ጸለዩኻ ኒታለይቶት ኒዲ እርግኑዅ “እና ከውአዊ የናዅንለ” ዮ ወንቀርዅሎም። ¹⁹ ናዋ ላው ዮሓንስ ጠመቕደንታ ላውኻ ኤልያስ ላዋትኸ ላዅ እን እሚኒ ነቢታተልድ ጐዅ ግን የነኩካ ይንዅሉ። ²⁰ ኒኻ “እንትጛ አውኒ ይደናዅንለ” ይዅሎም።ቤጥሮሳ “እንቲ እንጃር መሲሕ ግን” ይዅሉ። ²¹ ኒኻ ላዅድ ድወግኒን ተብዶ ጋቢዅሎም። ²² ኣዳሚንዱዅረስ ገሪጅርበት ኤርዶሉ ግን።በህሊንዲ አቅሸታ በህሊንድኽር ከታበንድኽር አከጝር ቃበብስሮኽር ኩውስትሮኽር ግን ሴዃ ኳራ ደምብኻ ጉሮ ግን ይዅሎም። ²³ ናተካ ላዅ ይጉርበት እንትሮ ጀረባዅኽ ኒሹት ግርግሺባ መስቀልኒዅ ምዅሮ ተለይንለ። ²⁴ ወረድ ኒርሒት ደኤንድሮ ጀረባዅ ድሄስሮላ ግን እን ኒርሕት ይመታን ድሂሳዅ ደኤንድሮላ ግን። ²⁵ ላግርዋ ኒርሒት ድሂሰን ኒትክ እርድስኻ አረረን ውራ ነፍዕረሉ። ²⁶ እን ይድር ይጋበሲኽር ስማራዅ ኣዳሚንዱዅራኽር ኒሳቡርድኽር ኒኽርድ ሽኻርድኽር ሻትካን ኒመላእኽትዲክ እንተራከክ ኒድ ስማርድኖ ግን። ²⁷ ዳኣም እና ነት አንጦጠለውልድ ላው ሲመር ጃርዅሲ ቛልግኒ ኒኾርሲክ ክረግነት የኩንኩም። ²⁸ ነዋዮ ጋበ ሰኾታ ኳሪ ደምቢኻ ቤጥሮስዲ ዮሓንስዲ ያዕቆብዲት ኒዲ ኤዶኻ ጸሎት እሲሮ ጊሪል ኒዲ አዶ ፈሩዅሎም። ²⁹ ጸለዩኻ ሕብር ኒገሹዅ በደልሱዅ ኒታኲጝር ጫዕደሪት ብልታውሩዅ። ³⁰ እናሓና ለጛ ግርው ሙሴዲ ኤልያስዲ ኒዲ ጂጝስቱኑ እርግኑዅ። ³¹ ሳቡርድ ቋልስትኑዅ እን ኢዮሮሳሌምትል አኽሮ ህምባዅ ኒክረድ ጋቡኑ እርግኑዅ። ³² እንሲን ቤጥሮስዲ ኒዲ እርገውዲ ገንጃ ተቖሎም እርግነዲን ጉኖሰና ኒሳቡርዲ እን ለጛ ግርው ኒዲ ህምበውስኻ ቋልኑዅ። ³³ እን ግርው ኒልድ ፈሩኑኻ ቤጥሮስ ያዅክ ኤርእም ብስቴሉ ኢየሱስቲ “ዎ ያደራ እና ይና ነት አክና ትክያዅ ግን ሴዃ ኤብሉራ(ዶል) ላዅሲ ኩዱ ላዅ ሲኻ ሙሴሲ ኮዶ ላዅሲኻ ኤልያሲ እስኒን” ይዅሉ። ³⁴ ነስ ይኸ ላቡኳና እንትሮ ሻሚስቲሎም ኒል ቱዉኑኻ ጓቚትኑዅ። ³⁵ እን ቡኳኒልድ “ኒን እን አን ፍሪራዅ ይዅራ ግን ኒት ዋሰሉ ይረሪ ጋባኻ ዋስስትቲ። ³⁶ እን ጋባ ዋስስትሩኻ ኢየሱስ ኒቱ እርጉዅ።ናዋ እንቋልናዅሲ ላዅድ ድወግኒ ሰቖብኑዅ። ³⁷ ኒ አመሪትል ጊሪልድ ገምኖሰና ከውከላእ ኒል እንኩልኩልስኑዅ፡ ³⁸ እን ከዋ ነበክልድ ላግርዋ “መምህር ይዅረስ ቋሊለ ላዅ ኒ ግን” ዮ ዋዕ ዩዅ። ³⁹ መጅኑን ሻከኩሉ ንርድ-ንርድ ገዓረዅ ፈንሽሽስኽር ፍዲሰኹሉ ቂልስራሲክ አንገርገርዶኻ ባረኩሉ። ⁴⁰ ኩታለይቶትሶ ፍድኖሉ ሺዊኹንሎም ናዋ ገረስኒሉ ይኹሉ። ⁴¹ ኢየሱስ ነበንቲ እምነት እንግገው አሰል ሸንካያን አውን አኽራሲክ እንተዲ መንደርትያ አውን አኽራሲክ ዓቕል እሲንኩም።ኩዅረስ ነት ናቕሲሉ ይኹሉ። ⁴² እንተሩኻ እንጅኑን ለብዶ ነግነግድዅሉ እንሲን ኢየሱስ እንጅንሲ ዋኺቱዅሉ እንቁረስ እቢሶኻ ኒኽርድ እውኹሉ። ⁴³ ናውካ ጃር ሒልድ ፈከርስኑዅ። ⁴⁴ ናውክ እን ኒ እሰውድ ፈከርሱኑኻ ኒታለይቶትሲ ⁴⁵ ኣዳሚንዱዅረስ ከዋ ናንትተል ደኩስኖ ሻኺስድኖሉ ግን እማ እና ጋበት እንተለበኪል እንኲረላ ይዅሎም። ⁴⁶ ናዋ እና ጋብነስ ኣስተብሃልድግኒ፡ትብቶሎም እርግነዲን ፈሄምስሮሎም ገረስላ ወንቀርድኖሉኻ ደይዕኒ፡ጓቒትኑዅ። ⁴⁷ ናልድ አዊ ኩጘታ ሃመትሊ ቱውኑዅ። ⁴⁸ ኢየሱሳ ናለፈካ ሃመትሲ ኤርእነዲን “ላቁራ ግናይራይሲ አዶ ኒገቢል አንጦጠልድዅሉ። ⁴⁹ እናጅና ግናይሲ ይሱጝድ ከለብራዅ ይት ከለብረኲ፡እን ይት ከለብታዃ እን ይት እንሸቓዅሲ ከለብረኲ።ውረድ እን እንተልድ ሽጓዅ ኒ ግን በሄር ይዅሎም። ⁵⁰ ዮሓንሳ “ዎ ያደራ ላዅ ኩሱጝድ መጃኒንሲ ፍዳዅ ቋልንዅን፡ይነልድ አኽጋዅ አኽነዲጛ ገብንዅንሉ” ይዅሉ። ⁵¹ ኢየሱሳ ባራ ሃበጋሉ እንተት እንጠራጋዅ አከን እንተዲ ግን ይዅሉ። ሳምሪሩ-ደኩነስ ገብነትሉ ⁵² እና እርድልድ ፈራ ግርጋ ስኩርነዲጛ ኢየሩሳሌምትል አኽታሲክ ብርፍ ዩዅ። ⁵³ ኒጃብልኻ ኒልካዅ ደለምድድኖሉ ንሽቕ ፈሱዅ።ናዋ ላድ ድገ ሳምሪውዱዅል ኤተይኑዅ። ⁵⁴ እን ኮቁራ ኢዮሩሳሊምትል አኽራሲክ ፈሩ እርግነዲን ከለብርኒሉ። ⁵⁵ ኒታለይቶት ያዕቆብዲ ዮሓንስዲ ኒስ ተካ ወራትሲ ቋልነሰና “ዎ ይና አደራ እን ኤልያስ ለኻ ዓስተርልድ ገሞ ድሂስሮሎም ጀረብራኹማ ይንዅሉ። ⁵⁶ ኒኻ ናል ግልጭዮ “አወያ መንፈስ ክምዲነት አርእግድናኽርማ? አዳሚንድዅራ ደኤንድሮ እንቱዅ ግራ ድሂስሮ እንቶ እላ” ዮ ዋኺትዅሎም፡ ⁵⁷ ኤሪ ኮላ ፈርኑዅ። እምንዱዅ ታለይቱራ ኢየሱስሩዅ አክና ጀረብደት ⁵⁸ ጉግድ ፈሩኑኻ ላግርዋ “እንቲ ፈርዳዅልክ ተለየካ ግን ያደራ” ይኹሉ። ⁵⁹ ኢየሱስ “ቈንሸል ናግፍፍ፡ጀከል ዓስተሩኽር ናልጝንቲ ሻኽኑዅ።ኣዳሚንዱዅራ ደአም ኒአኾርድ ድኩርታዅ ድኳ ሻኽላ” ይዅሉ። ⁶⁰ ላዅሲኻ ይኸ ጒ ተለዪለ ይዅሉ ኒኻ “ዎ ያደራ በደሮ ይኽርሲ ደብያ ባሪለ” ይዅሉ። ⁶¹ ኢየሱሳ “ክሪው ናክረውሲ ደቢድኖሎም ባሪ እንቲ ፈሪ ሲመር ጃሩዅ አበሸርዲ” ይዅሉ። ⁶² ኮዶ ይኸ ላዅ “ዎ ያደራ በደሮ ይከው ስብድድኖለ ባሪ” ይዅሉ። 63. “እርባነስ ሻኾ ደምቢራ ህምባ ጋራትሲ መኻልታዅ ሲመር ጃሩዅድ ወጀበላ” ይዅሉ።