ሽከር ፊዃ (ፊዃ-10) ለጘትረጝንዲ ለጛ ታለይቶትሲ ኪሰሪ በሸርድድኖ እንሸቐት ¹ ንድደምቢ ይና ኣደራ አሪው ለጘትረጝንዲ ለጛ ፍሪሩዅ።እን ፈርዶ እርጋ ኣካናት ደገጊት ሌጝ ሌጛሲ ኒጃብል እንሽቑዅሎም። ² “ከረመን ከብስተው ገሪው ግን አረስኻ እቑቱ አኽኑዅ ንዳ እንከረመኒ አደርስ ከበው ኤረስ ፈስሮ ሺወሉ፡ ³ እናሓን ፈራ በግሰና አትኳላ ነበክል እንሸቐኩንኩም እንኩኹን። ⁴ ወሪ ሕሽኩል ወሪ ማር ወሪ ሻፍ አድጋ ይኸ እንታ ጉግል ላዅሲ ሰላም ይጋ። ⁵ እንትን ቱውድና ልጝልክ በደርድኖ እና ልጝንሊ ሰላም አኽኒ ያ። ⁶ ኒል ወርኪዅራ ዋነን እንታ ወርክናር ኒል ገምሮ ግን አከገጛ እንተል ወንተርዶ ግን። ⁷ ከደመንተድ ኒስድቕ ጨበረኩሉ እማ ልጝንተል ደላህ መላህ ይግድኒኻ ፈርትናሲክ ኒል ኣኻ። ⁸ ኤተይድና ኮልክ ከለብረነንኩም ኡውናዅሲኩም ቋ። ⁹ ኒል ዲወውሲክክም ምግዱራንሲ እቢሳ ሲመርጃሩዅ እንተል ስኩረኲ እንኲዃ” የሎም። ¹⁰ ላኮል አተይድኖሰና ከለብረግነንኩም ቃዕረትሊ ፍድኖ፡ ¹¹ እን ይናሉኩኰል ተከና ዕሳሲ ከፍከፍነኩንኩም ደአም ሲመር ጃሩዅ እንተል ሱኩረት ኤርኣ የሎም። ¹² ፍርድ ግርገድ እንጫ ኮልድ ሶዶምሲ ስዳውሮ ግን የኩንኩም እንኩዅን። ¹³ አጀዋ ኩራዚ ወመላልኪ በት ሳይዳ እን እንተል እስተው አምራት ጢሮስዲ ሲዶናዲትል አኸው አከን እማና አክያስዲ ሽባርዲት ሰርኖ ናዓገብድ ብሕልታ ሺዊድንድ ሻኸው ግን። ¹⁴ ፍርድ ኳሪል እንታዅልድ ጢሮስዲ ሲዶናዲሲ ትክሰ ስዳውሮ ግን። ¹⁵ እንትኽር “ዎ ቅፍርናሆም ዓስተርሊ አኽራሲክ ማ ክብይቶ? እንቲ ሱቈት ኩልኩልትቶ ግን። ¹⁶ እን እንተት ዋሳዅ ይት ዋሱዅ እን እንተት ጉሻዅ ይት ጉሻዅ ግን እን ይት ጉሻዃ እን ይት እንሸቃኹሲለ ግን ኒጉሻዅ ይዅሎም። ¹⁷ እን ለጘትረጝንዲ ለጛ ታለይቶት “ዎ ይና አደራ ኩስጝድ መጃኒንኽር ይነልድ እግሩኑ እርግኑዅ” ዩኑ ፈርሕኖ ወንተርኑዅ። ¹⁸ ኢየሱስ “እን ሸጣን ምርክሰና ዓስተርልድ ለቡንሲክ ቋልዅን። ¹⁹ እናሓን ምራውዲ ሺቑዲ ዳድትኖ ግን ኒልካ እንታ ኣባይ አወይሲ ሒል ኡዎኩም ህምበኩን ላሪ ድኳ ሃሽከበለኩም። ²⁰ ደአም እንታ ሱጙጝ ከተብስት ነገሳ ግን ግራ መጃኒን ይና ምራድሲ እሲኒዅ ይድኖ ፈርሕጋ ይኹሎም። ²¹ እንሰከር ወክታትሊኻ ኢየሱስ መንፈስ ሻትክድ ፈርሖ “ዎ ኤበ ዓስተርዲ ብረዲር ኤደራ እና ጋራት ነስ ኤርኤውልድኽር ኩመኤኰት አኽኒ።የዋ ኤበ ኩምራድ አኽኔዲን ግን። ²² ይኽርትልድ ኒውክ እውስቶለ ህምበኲ።ደኣም ኡዅራስ አውኒ አኸት እኽር አኸገት ላዅ አርእለሉ እኽርስኻ ኡኽረዲ እን ኡዅራ ኒድ ጋልህድሮሉ ጀረበዅዲ አከገን አርኣዅሉ እላ። ²³ እንሲን ኒታለይቶትሲ መኻልቱ “እና እንትን ቋልደናዅሲ ቋላ ዕልል ሻትካን ግን። ²⁴ ውረድ ገሪው ነቢታትዲ ሰየምዲ እና እንትን ቋልደነውሲ ቋልድኖ ሽንህኑዅ ቋልኒኻ እና እንትን ዋስደነውሲኽር ዋስድኖ ተምነተኑዅ ተምነትኑዅ ደኣም ዋስኒ” ይዅሎም። ²⁵ እናሓን ላዅ ፍቲሕ መሄርሶ ህምባዅ ወንቀርዶሉ ጔ “መምህር ውራ እሰን ግን ንብረት ዲመሩዅሲ ለዋኽርዮ ወንቀሩዅሉ። ²⁶ ኢየሱሳ ኦሪትል ውራ ከተብሶ ህምባዅን ውራ አንበብድራዅን ይዅሉ። ²⁷ ኒኻ ኩጃርሲ ኩለበከዲ ኩርሕዲ ኩሒልዲ ኩአርእጝድኽር እንከሊሉ።ኩጨራስር ኩሹርሰና እንከሊ ዮ ወንተሱዅሉ። ²⁸ ኒኻ “ትክያዅ ወንተስሩዅ ፈሪ ኒሰና እስ ይዅሉ። ²⁹ እንዲጛ ኒሹት አመክነይድሮ ጀረበ “አውኒኻኒ ይጨራ” ይዅሉ። ³⁰ ኢየሱሳ ነዋ ይዅሉ “ላግርዋ ኢዮሮሳሌምትልድ ያሪሆትል አኽራሲክ ገሙ ስኳን ናንትተል ለቡዅ፡ኒን ኒሻኻ እራኲሲክ ወረርኖሉ ከታከትኖ ክርጋዅር እሲነሉ ባርኖ ፈርኑዅሉ። ³¹ ሃደፍዳ ኒድ ላቐሺራ ገማዅ ገማዅ እንቱዅ ቋሎኸሉ ሸሊቶ ደኩዅ። ³² ኒሰና ላዅ ሌዋዊራ እን አካንሊ እንቱዅ ቋሎኸሉ ዕጭጭዮ ደኩዅ፡ ³³ ላዅ ሳምሪዅ ኒድ ደኩ ቋሎሰነሉኻ ሰኻንዲዅሉ። ³⁴ ኒል እንቶኻ እን ለከንሲ ደዲ ሚዲሲ እጝቃሶ እንሸዎ ኒድዃሪል ጨዓኖ ትልለናዅድ አካንሊ አድዅሉ እማ ዓወንዅሉ። ³⁵ አመሪትላ ለጛ ቅርሽ እን ልጝን ኤድረድ እዉዅሉ እማ እንቲ ዓወኒሉ ይውንትሪላ እንቲ ድሂስረውሲክ ኡውሪካ ይዅሉ። ³⁶ እና ግርዋ ሱኳን ናንትተል ለባዅድ እና ሴዃ ትልድ አዊን ኒወንዳ ተካዅንካ ዮ ወንቀሩዅሉ። ³⁷ ኒኻ እን ሰኸንቶ ትክሴኹሉ ዋ ይዅሉ።ኢየሱስ “ፈሪና እንቲኽር እንዳሃቢ” ይኹሉ። ³⁸ ፈሩኻ ላድጌትል ዔሩዅ፡ላእዂና ማርታ ይስትረሪኻ ንርልጝሊ ከአብርቲሉ። ³⁹ ኒኒ ንርሻኒ ማርያም ሰጘቲላ ንርኻ ኢየሱስር ገቢል አኽሮ ኒ ጋበውሲ ሸኑርዱ እርግቲ። ⁴⁰ ማርታኻ ወራት በጀኾላ ስቆት ኤወት ይሩ እርግቲ ኢየሱስትል ስኩት ይሮኻ “ድዊ ይአደራ እና ይሻኒ እንሽቕሲየ ስቆትር አወትር ያኽርሲ ባርድሪትለ ኩት ላሪማ ዓጀብደለካ ካቢቶለ ውራ ጉኡኢ የለላ” ይቲሉ። ⁴¹ ኢየሱሳ “ዎ ማርታ ዎ ማርታ እንቲ ገሪ ወራትድ ሓገስትረኲር ሃለክስረኲር እንኩሩዅ። ⁴² ደአም ጀረብዳ ወራት ላዅ ግን ኒታ ማርያም ፍሪርዶ ህምበቲ ላዃ አደለላ” ይኹላ።