ፊዃ-11 ¹ ኒኻ ላአካንሊ አኾ ጸለዩ ግጁዅ ዱጘሰናኻ ላዅ ኒታለይቶትልድ ድዊ ይናኣደራ አበዲ እንቲ እንጫ ዮሓንስ ኒአጋርሲ ክንሳዅድሰና ውራ ጸሎት ክንሰለና ይዅሉ። ² ኢየሱስ “ጸሎት እስዱኑ ዎ ይናኽር ኩሱጝ ሸተክኒ፡ ³ ኩሲመር እንትኒ፡ ⁴ ይናግርጊ ሳንሳዓስ ናኽና ይነት ጂብዳዅሲና ሃብነ ባርናኹሰና እንቲኽር ይናዓግብሲ ብሕል ይና፡ምቁሊልድ ደኤንዲና ግን ግራ ሸርሊ ቱስግና ይድኖ ሺዋ ይዅሎም። ⁵ ኮዶኻ ኤዊ እንተልድ ኒማዳ፡ ⁶ ቂራ ነበክ እንቶሉ እንቲ ይማዳ ላዅ አን እንከላዅ እንቶለ ህምበኲ ላሪ ሱኩሳኹሉ ሻኽሊ ኒ እማ ሴዃ ሳንስዓ አዳኽዲለ የንሉ፡ ⁷ እንዲንኻ ዓንቀይረድ አኾ ፈሪ ዕላጅ አኽግለ እድ መርሖረድ አበስቱዅ ይቑር ይዲ አርግል ገንጅኖ ህንበኑኲ ጔ ላሪ እውየካ ገረሰሊ ዮ ወንተስኹሉ። ⁸ ኒማዳ አኽነዲን ጔ እውገንሉኽር ገንጃ ገብጊንሉ ጔ ኒጀረበሰነክ ኡወኩሉ። ⁹ ሺዋ እውስትሮኩም ግን ጀረባ ኤርትኖ ግን ቈርቁሓ ብስትሮልኩም ግን። ¹⁰ ውረድ ሺዌኹኲ ከለብረኲ እን ቀርቃሐዅካ ብስተኩሉ። ¹¹ እንተልድ አወያ እኽር ግን ኒዅራ ሳንስዓ ናኽለ የንሉ ክርጛ እዋኹሉ ወሪ ዓሳ ሺወንሉ ምራዋ እዋኹሉ። ¹² ወሪ ይኸ ቤጫ ሺወንሉ ሺቛ እዋኹሉ። ¹³ እማ እንትን ድኳ ምቑል አኽዱኑ እንተቑርድ ትክያዅ እውን ኤርእድናኽር እን ዓስተርሊ ህምባዅ እንታኽር አለማ እን ሺወውድሉ ትክሰ መንፈስ ሻትክ እወጋኹሎም ማ ተካኹንኩም። ¹⁴ ኢየሱስ ላዅ ልጉምልድ ጅኒን ፍዱ ግጁዅ እንጅኑን ፈሰናኻሉ እን ግርዋ ልጉም ጋቢዅ እን ከዋ ፈከርዶሎም። ¹⁵ ላው ናልድ ደኣም ብኤል ዘቡኡልድ መጃኒና አደራ ግን መጃኒንሲ ዳገናዅ ይንኹሉ። ¹⁶ ኮዶ ላዋ ይኸ ወጠንድኖሉ ዓስተርልድ ላ-እሻረት ሺዊኒኹሉ። ¹⁷ ኒኻ ናእከይሲ አስተብሃልዶ ኒሹር ኒሹ ሲሬዅ ሲመር ድደኲ ኒሰና ልጝን ልጝኝ ዳግ ጓዅ ለበኲ። ¹⁸ ሸጣን አወይሲ ጓን አዋሃበ ግን ኒሲመር ተብሮ ገረሳዅ? ናን እንትን ኣዋሃብዲነ ግን መጃኒንሲ ቤኤል ዘቡልድ ፍደኲ ይደናኹንለ። ¹⁹ ኣን ቤኤልዜቡልድ መጃኒንሲ ፍዳኽር አከን እንታ ቁር ውረድ ግን ናውፍደናኹሎም።ንድ ሰበትድ ፈረድኖኩም ግን የኩንኩም። ²⁰ እን መጃኒንሲ ጃር ናንድ ፍዳኽር አኾደምቢ ሲመር ጃሩዅ እንተል እንቶ ህምበኲ። ²¹ ግርዋ ሒለቱዅ ደበልቶ ኒልጝን ተከው ኒ እራኲ ድደለሉ። ²² ኒልድ ሒለታዅ ታሓረቦ ሄለል የንሉ እን ኒ ኤምኖ እርጋ ስላሕሲ ባሪሶሉ ኒእራኩሲ ኒዲ በንስጘኲ። ²³ እን ይዲ አከጋዃ ይኣባይ ግን እንይዲ አኾ እንኩል ኩለጋዅካ ፋሕ ሰኲ። ²⁴ ሰጣን ላግርዊልድ ፈሰና ፊዃ ጀረበ አክራብድ ጅልወኵ በሰናኻ ይልጚ ንርትልድ ፌሪትል ወንተርያ ግን የኲ። ²⁵ ወንተረሰናኻ ገሰስቶኽር ሰርገይሶኽር ኤረረኩሉ። ²⁶ እንሲን ፈሮ ኒልድ ጂበው ኤሪው ለጘታ ሸዋጢን ኤዶ እንተረኲ ኒል ትውኖኻ መንደርተነኲ።እንግርዊ መናብረትኻ እንጃበሪዅልድ ደምበራ ትክሰ ጂበኲ። ²⁷ ናሃበ ጋቡሎማ እንከወልድ ላእዅና ደሄይሲ ክብሰረ እን ኩት ምኹራ ካድዲ ኩት ነብሳ እንጉግዲ ሻትካን ግን ይቲ። ²⁸ ኒኻ ክልብርሰ “ሻትካንባ እን ጋብ ጃሩሲ ዋሰውዲ ተከወውዲ ግን”ይኹላ። ²⁹ ከው ኒል እርገው በጀኹኑ ፈርነሰናኻ ነዋ ይሮሎም ተርሲዅ “እና አሰል ነን አሰል ምቊል ግን ሻሮትር ጀረበነኲ እንኩኑዅ።ደአም እን ሻሮት ዮናስሩዅ አከገን ኤሪዅ እውስተለሎም። ³⁰ እን ዮናስ ነነዌሩውድ ሻሮት አኻኹድሰነሎም ኣዳሚንድኹራኽር እና አስል ነድ ሻሮት አኽሮ ግን። ³¹ ንግስቲ አዜብ ሰለሙንዲ ጋብ ለፈኩሲ ዋስቶ ብሪ ግንድልድ እንትረሪ ፍርድ ግርገድ እና አሰል ኒዲጉሮ ሄለል ይቶሎም ግን እናሓና ዮናስትልድ ኩጛዅ፡ ³² ነነዌር ከዋ ዮናስር ስብከትድ ናለፈክሊ ወንተረው እና አሰል ነዲ ጉኖ ለታቕድኖሎም ግን እናሓና ዮናስትልድ ኩጛዅ ነት ህምበኲ የኩንኩም። ³³ “እን በሪህሲ ቋልድኖ ላኲ ቲዀስ ትልጭሰ መሔገይል ወሪ ሕንኩል ዓንቀይ ገምዳዅ እላ ክብያኹል አከገን። ³⁴ ኩዕል ኩገሮብ ቲዃ ግን፡ኩዕል ሽርዋ አከን ኩገሮብር ባርህ ግን።ኩዕል ሽርዋ አከገጛ ኩገሮብር ጨልመተኲ እማ፡ ³⁵ እን ኩል ህምባ ቲዃ ድድጊን ፈጠኒ። ³⁶ ንድኻ ኒውክ ኩገሮብ ላገፍድ ጭልም እጝጋዅ አከን እንቲዃ ትክሰ በርህዳሰና ኩገሮብር ኒውክ በርህ አከኲ”። ³⁷ ጋብኻ ላፈሪሳዊራ ኒዲ ምዳትሮ ሺዊኹሉ።አጃ ዮኻ ቱዎ ምድሊ ዓገሉዅ፡ ³⁸ እን ፈሪሳዊራኻ እንቃርጊ ጨመዳዅሲ ቋለሰና ፈከርደዅሉ። ³⁹ እንሲን ይና አደራ “እንትን ፈሪሳን ግባርዲ ኒድጅእደናዅ ጉናዲት አወይረድ እንቃስደነኲ እንታ ዓይቀረዳ እን ሙቑላዲ ሃሽከብነዲሲ እንታኾሰና ግን። ⁴⁰ ነበንቲ ሃስሳን እንከደኑዅሲ እንዳሃበዅዓንቀይረስ እሰጋዅማ። ⁴¹ ዓንቀይረድ ለጭሕዳ ኒውክ ጨረይሮኮም። ⁴² እንትን ፈሪሳን ኣጀዋ ውረድ ነናዕልድር ጤናኣዳምልድር አኻ አምሪልድር ሽከርሲ ፍደናኽር ፍትሕዲ እንከሊ ጃሩዅዲትላ ሓሰርሰግደናኽር ኒሰ ባርግድኒ እንዲስር እሲትኖ እርጉኹኩም። ⁴³ እንትን ፈሪሳን ጸሎት ልጝንተል ቂጦታት ሽኻሩሲ ፍሪርደናኽር ዕርዲሪል አከጝር ደባንማ ይስትትኖ እን ከልደናኽር አጀዋ። ⁴⁴ እንትን አርፍፍ ኤርእስተገውሲ ከው አስተብሃልድጊ ዳዶ ደኰሰነሎም ግን፡እማ አጀዋ። ⁴⁵ ላዅ ፍትሕ መሄርሰውልድ “መምህር እንደዋ ይሩ ይነትር ጀኽረኩና እንኩሩዅ” ይኹሉ። ⁴⁶ እንትን ፍትሕ መሄርስደናኽርር አጀዋ ከውሲ ክብየጋ ምዅር ምቑስደናኽር ግን እማ አጀዋ።እን ምዅርሲ እንተሹሺ ጭብዕታድር ተመደግደኽርሉ። ⁴⁷ እንተን እን አርፍ ነቡዋተው እንተክል ኩወውዱሲ ጨይረድደናኽር አጀዋ። ⁴⁸ እንታክላ ኩኑኹሎም እንትጛ ናኤርፍሲ እንተገበር ነድ ንድ ሳምዓንዲ እን ናጋርሊ ሕበርስዲነኽርዲ ግን። ⁴⁹ ንድ ሰበትድ ጃር ኤምር ነቡዋትዲ ታለይቶትዲት እንሸቕየሎም ግን።ናውኻ ገሪውሲ ናልድ ኩድኖኽር ዳገንድኖኽርሎም ግን ዩዅ። ⁵⁰ እን እርድ መሄድሳ ግርጊልድ ተርሰ ቡቕተ ብር ነቡዋተው አቤልዲ ብርልድ እን ጸሎት ልጝንዲ ሰደቐትዲር ነበክል ኩናዅ ዘካርያስር ብርሊ አኽታሲክ እን አሰል ኒልድ ጀረብሲሮ ግን። ⁵¹ የዋ እና አሰል ኒልድ ጠርቕ ሺውስቲሮ ግን የኩንኩም። ⁵² እንትን ፍትሕ መሄርስደናኽር መርሖራ ክኒሩዅሲ አድናኽር እንተሹሺ ትውና ጉሽድኖ ኤሪውስኽር ትውግኒን ገብደናኽር አጀዋ” ይኹሎም። ⁵³ ኒልድ ፈሩኻ ከታንዲ ፈሪሳንዲ ገሪ ጋራትድ ወንቀሩኑ ተብድኑኹሉ። ⁵⁴ እን ወንተሱሎም እርጋ ጋበላ ከታ ኒድ ሸከየናዅ ኤርድኖሉ አትቋመቱኑሉ እርግኑዅ።