ፊዃ -12 ጃርሲ ግራ ኣዳምቲ ጓቊትና ጀረብደላ ¹ እንሲን ከላእ ከው እኺርኺርሲ ደረረኩኑ ኒዲ እን ኩልኩልስኑዅ።በደሮኻ ኒታለይቶትሲ ጋቢሮ ተርሲዅ እማ ፈሪሳና መኰት ዓቁልድ ፈጠና ናወራትልድ ፈጠነና ይኹሎም። ² ብተጋዅ ወሪ ኤርእስተጋዅ ስቱርድ ትብቶ ከብታዅ እላ። ³ ንዳ ኒውክ ጭልምል ይድናዅ በርህል ዋስስትሮ ግን፡እን ወዳንሊ ሕሹኲ ይድናዃ እራሪል ሰበክሮ ግን። ⁴ እንተት ይማሲኻ እንስኺ ኩኒልድ ደኩኖ ላሪ ሃቢሮ ገረሰገውሲ ጓቊትገሎም የኩንኩም። ⁵ አውቲ ጓቊትደነት ድውየኩም እንክዎ ገሃነም ለኺል ማልዶ ገረሳዅሲ ጓቊታ።የዋ ኒት ካያ ጓቊታ የኩንኩም። ⁶ አጝኳ ጀከላ ሌጛ ሰላዲረድ አኽለማ ናክስትና ደኣም ጃር ጃብል ናልድ ላሪ ድኳ ምኺርሰላ። ⁷ እንትጝር ሽብክ እንታአኾሩ ከብተጊ ሺብስቶ ህምበኲ አረጋ ላሪ ጓቊትጋ ጀከል ገሪውልድ እንትን ኪደነኲ፡ ⁸ እን ከዋ ጃብል ኤምናኹለ አዳሚንዱኹራኽር መላእኽቲ ጃሩውድ ጃብል ኤምንዶሉ ግን። ⁹ እንከዋ ጃብል በረያኹለኻ መላእኽቲ ጃብል በረይስሮ ግን። ¹⁰ ኣዳሚንዱኹራስ ልኼኹድ ባርስትሮሉ ግን፡እን መንፈስ ሻትክሲ ጀኸኹዳ ባርስተለሉ። ¹¹ አይሁድ ቤት ጸሎትልኽር ዲቢልኽር አስያመልር አድነሰነኩም “አዋሃብነ ወንተስኖ ወሪ ይኸ አዋሃብነ ጋቢኖ ይድኖ ሳድድስጋ” ¹² ውረድ እንሲንዲ ወክትሊ መንፈስ ሻትክ ውራይድ ነት ድዊሮኩም ግን። ¹³ ላዅ እን ከወልዳ “መምህር ይዳንሲ ላውሲ ፍድሮለ ጋቢለ” ይኹሉ። ¹⁴ ኒኻ “እንታነበክል በነንታ አውኒ ሰየሞለ” ይኹሉ። ¹⁵ እን ኤሪውሲኻ ከዋ መናበረት ገድ በጀኽኒልድ አኽላ እማ ህርፋንልድ ፈጠነኩም ይኹሎም። ¹⁶ ንድ ደምቢኻ ድግምድ ነዋዮ ጂጝስቲኹሎም “”ላግርዋ ገዱዅ ኒከረመና ገሪዅ ፍሪትኹሉ. ¹⁷ እና ይኤርሲ ኒል እክባ አካን ሻኽሊ ውራ ሃቢንዮ ሀመትሊ ቱዉዅ። ¹⁸ አን ሃበውሲክ ይላውድ አርእዅን።ይልጝንትስ ፋሕሰናልድ እዳነው እሲሪ፡ናትክ ይኤርዲ ይገድዲት ኒል እክብሪ። ¹⁹ ይርሒታ “ዎ ይርሒ ገሪ አመታትድ ዓቕተውኪ ገድ እክብሶኪ ህምበኲ።ፊዅቊኽር ጅኢኽር ፈርሒኽር የላ ግን ዩዅ። ²⁰ ጃርኻ “ነበንታ ሀስስ ኩርሒት ንኪ ቂር አድኖላ ግን እና እንቲ እንኩልኩልዶ ህምብረው አውሲአኽሮ ግን” ይኹሉ። ²¹ እን ኒሹሺ ገድ እክባዅ ጃር ጃብል ገድ እንግጋኹድ ሰና ግን ይኹሎም። ²² ኒታለይቶትሲኻ “እንታ መናብረትድ ውራ ቁኖ ውራኻ ሰርኖ ይዱኑ ሳዳድስጋ። ²³ ውረድ ፊኹት ቊስታዅልድር ሰረኒልድር ትክሶ ኪደኲ። ²⁴ ኳኹርሲ ቋላ ፈደኒኽር ከበኒኽር ሐበሲትኽር ሻኽኒ ጃር ቊሰኩሎም።እንትን ዳአም ትክስዲነ ናልድ ኪደነኩ። ²⁵ አውኒ እንተልድ ሳደድሶ ኒሺርጝል ላሰድር ኰዳዅ። ²⁶ ንድኻ ግናይራይ ወራት እሲትኖ ገረሰግደናኽር አኽድኖ ደምቢ ውሪዅ ነስኮት ሐገስትደናዅን። ²⁷ ዕምቦብ አዋኸ ለገደት መርኪሳ ከደመገውር ሸፈጠገውር ሰለሙን ድኳ ኒሳቡርዲክ ናሰና ሰርላ። ²⁸ ጃር ኔስ ንክኻ ህምበው አመሪኻ መለሊዖትሊ ማልሳሻንካስ እናሃበ ሰሳዅ እንትን አሰል እምነት እጝገው እግዳ እንተት አዋሃበ ትክሰ ሰሰጋኹኩም። ²⁹ እማ እንትጝር ውራ ቁደነትር ውራ ጅእደነትር ረገስትጋኽር ረመጭስጋኽር። ³⁰ ኔስ አረሜን ካያ ጀረበነኩሎም እንታኽር ኔን ናውክ ጀረብደትኩም አርኡዅ። ³¹ ኒሲመርሲ ጀረባ ግን ግራ ኔን ናውካ ኮስትሮኩም ግን። ³² እንታኽር ሲመር እውሮኩም ኒንግስ ግን እማ “ኦ እቑቱ ሞራ ላሪ ጓቚትጋ። ³³ እንታ ጠምዓትሲ ክድኖ ድቡራንድ እወሎም ስዋና አረረጋዅል ቁንቁና ቋጋዅል በለጋ እንድባ ዓስተርኹል ተባብ እሳ። ³⁴ ኩእንድባ ህምባዅል ኩለበካ ኒል ግን። ³⁵ እንታሕቀቅሲ ደበልታ እንታቲዃኻ ትልጭ ይን። ³⁶ እን ና አደራ ክኻንልድ አውን ወንተረት ጨበረውድሰና እንቶ እድሲ ቀርቀሖሰና ንርድ-ንርድ ብደውሰና ኣኻ። ³⁷ እን ናኤደራ እንተሩ ሐሶሰዮ አረርሰው ንሽቕ ሻትካን ግን።ደበልቶ ነብሪል ሱኩስሮሎም እንሻቕሮሎምር እንተራኹድሰና ግን እምንድክ ይየኩም። ³⁸ እን ሊጘርድ ወሪ ሲኾር ሰዓት ቂር ገፍል እንቶ እና ኺነ ኤረረንሎም ሻትካን ግን። ³⁹ እንትን ኒስ ኤርኣ ልጝን አደራ ስዋና ውራ ወክት እንተረት ኤርኤን ሐሶስይርድ ኒልጝን ግኽስቲራሲክ ስቖብጊድ። ⁴⁰ ኣዳሚንዱኹራ ውሪ ወክትሊ እንተረት አርእድኒ እማ ደለማ። ⁴¹ ቤጥሮሳ “መምህር እናድግም ኒስ ይነድ ካያ ማ ይራኹንሉ ወሪ ናድክድ” ይኹሉ። ⁴² ይናኣደራኻ ኒወክትድ ኡውሮሎም ናምድሲ ዕያል አደራ ፍሪራዅ ንሽቃ እሙንዲ ለበኪዅዲ አውኒ ግን። ⁴³ ኒአደራ እናሃቡ ዲዋዅ ንሽቃ ሻትክ ግን። ⁴⁴ ናድካ ኒገድ አወይሲ ሰየምደትሉ እምንድክ የኩንኩም። ⁴⁵ ደኣም እን ንሽቃ ኒለበከድ ይአደራ ሺሸኲ እንኩዅ ዮ እን ንሽቕሲ ጠዓምብሮኽር ቁሮኽር ጅእሮኽር ሸከርዶኽር ተርሰን። ⁴⁶ እን ኒጨበረጋ ግርግልር ኒአርእጋ ሰዓትልኽር እንቶ ዋኺትሮሉ ግን እን አምነገውዲ ጣልማንዲኻ አኽሮ ግን ኒበና። ⁴⁷ ኒኤደራ ምራድሲ ኤርኦ ዋኑ ደለመጋዅ ወሪ ኒምራደሰናክ ኒወራት እሰጋዅ ገንጂና ገሪ ሒልድ ወንቀርስሮ ግን ወሪ ትክሰ ጠዓምብስትሮ ግን። ⁴⁸ ደኣም እን ንሽቃ ላሪ አርእጊ ዋኺሳ ጋር እሰጝር ኒአርእምብነድ ስዳዋ ጣዓምባ ጠዓምብስትሮ ግን።እን ከላእ ኡውስታኹሉኻ ገሪው ወንቀርስሮ ግን ይኸ እንትክሰ ተፋነይሳዅ እሽባ ወንቀርስሮ ግን። ⁴⁹ እና ብሪል ለኻ ገምድያ እንቶህምባኽር ግን።ኣንጀረባዅ ሻኽሮ ግን፡ናን ናን አጐድስረን ውሪኮት ነገስሪድ። ⁵⁰ አንጠመቕሳዅሉ ጅርበቱዅ ጥምቀት ህምበኩለ ኒል አኽራሲካ ይሰብር ገሪዅ ሽብውደኩለ እጝኩዅ። ⁵¹ አን ብሪል ደባን (ሰላም) ገምድያ እንቶ ህምባኽርማ ተካኹንኩም? አኽላ ሲድያ እንቶ ህምባኽር ግን፡ ⁵² ንደምብክ ላዕያሊ አንኳ ዋንተነንላ ሴዃ ለጛትልድ ሲሪድኖ ግን ሌጛኻ ሴዃትልድ ሲሪድኖ ግን። ⁵³ እኽር ኒእኹረስ ኡኹራኻ ኒኽርሲ ወነንዶ ግን፡ገናኻ ንርቁረት እቑራኻ ንርገነት ወነንቶ ግን።ንዃዂኻ ንርኹረድ ቊትልድ እን ስርጉኻ ንር ንዃዂትልድ ሲሪቶ ግን ዩዅ። ⁵⁴ እን ከውሲኻ ኳሪ ለብድ ብኳና ቋልድነሰና አሸሽድኖ ስዋ እሲሮ ግን ይደነኲ ኒሰናኻ አከኲ። ⁵⁵ ኮዲሲ ወልወል እሰጛ ሸበላ አኽሮ ግን ይደነኲ ኒሰናኻ አከኲ። ⁵⁶ ነበንቲ ቡጙት ዓስተርዲ ብራዲር በደልስነስ ፈረግዱኑ አዋ ሃብዲነ ግን እና ኣኻ ወራታትሲ ኤርእምብደናዅን? ⁵⁷ ውሪዅ እንተላውድ እምን ፈረድኒ? ⁵⁸ ኩሸከየንታዲ ፈራዲሪል ፈርዱ እን ፈረዶንታኻ እን ተከወውሊ ደኩሶ እውጊንካ እንተከወንትኻ ዕቆትሊ እንሸውግኒንካ ጉግሊ ዋንትሩ ኒዲ ኤረክስረሰነክ ሃቢ። ⁵⁹ አከገጛ ዕቆትሊ ትውረሰና ሰላዲራ ግናይሊ አኽታሲክ ፈደይግሪ ፋግረት ድወኩንካ እንኩዅን ይኹሉ።