ፊዃ-13 ጥዕስትና ጀረብደት ¹ እን ግርጋት እንዴላ ላው እንትኖሉ እን ጲላጦስ ገሊለሩሲ በረኾ ናብርሲ ናሰደቀትዲ ሐበበሬውድ ጋቢኒኹሉ። ² ኒኻ ክልብርሰ “እና ገሊለሩ ኒስ ተካ ጅርበት ኤርኹሎም እን ኤሪው ገሊለሩልድ ትክሰማ ጂበው ተካኹንኩም?” ³ ኣኽላ እንትጝር እንታለፈክሊ ወንተርግደነን ናውክ ናሰና ድትኖ ግን የኩንኩም። ⁴ ወሪ ይኸ እን ሰሊሆምትል ኳና ለቦሎም ክረው ሽካ ሰኾታ ግርዋ ኢዮሩሳሌምትል ህምበውልድ ጂበውማ እርግኑዅ ተካኹንኩም? ⁵ ኣኽላ እንትጝር እንታዓገብድ ብሕልታ ሺወግደነን ናሰና ናውክ ድትኖ ግን የኩንኩም ይኹሎም። ⁶ እና ድግም ኒስ ጂጚስቲኹሎም፡ላግርዋ ኒጀርዲንሊ ካና በለሲሪ ሰጘቲሉ።ፍርር ጀረበኻ ንርትል እንቱዅ ደኣም ላሪ ድኳ ኤርለላ። ⁷ እን ጃርዲንሲ ተከወንታስኻ ይሲኾር አመራ ግን እና ካናትል ፍርር ጀረበ ወንተተርዅን ላሪኻ ኤርሊላ።አካንሲ ግምሽ ሻኽሮ ህምብረሪ ግን ቀረጪላ ይኹሉ። ⁸ ኒኻ “ሸልላትድ ግኽደ ጀኸራ ብቑስየላ ግን እማ ላአመረስ ህምብቶ ባሪላ”ይኹሉ። ⁹ አማር ፍሪትረጛ ኣጃ ፍሪተግረጛ ቀረጭስርን ዮ ወንተስኹሉ። ¹⁰ ሰንበርድ ጸሎት ልጝሊ ክንሱ እርጉዅ። ¹¹ ኒላ ላእዂና ሽካሰኾታ አመራ ሽኹስትረሪ ዲዊቲሉ።ኒኒ ንርዕድር የውል እርግነዲን ሉምይሮ አኽገትክ ናዕ ይቶ ገረድሩ ሰጘላ። ¹² ኢየሱስ ቋለሰነላ ሽጘ ኩሹዅዲልድ እቢርዱዅ ይኹላ። ¹³ ናንሲኻ ገምዱኹላ፡ንርድ-ንርዳ ናዕ ይቲ፡ጃርሲኻ ሓመድቲ፡ ¹⁴ እን ጸሎት ልጝን ኤደራኻ ኢየሱስ ሰምበርድ እቢስነዲንላ ሐረቕሮ እን ከውሲ እንታ ወራትሲ እሲትኖ ወልታ-ኳራ ህምበኩኩም ትልልስትኖ ሰምበርድ እንትጋ ይኹሎም። ¹⁵ ኢየሱሳ እንትን ቡጙት ነበንቲ እንተልድ ላዅ ሰምበርድ ኒቢረስ ወሪ ድዃረስ ዕቆትልድ እንኮ ዓቁ ጅእሰሮ ሚጥንሊ አዶወረደጋዅማ አኾ? ¹⁶ ነስ ዋስነሰና እን ወነኑሉ ግጅው ስማርኑዅ ከዋ ናውክ እን ኒ እሰ ጋርድ ፈርሕኑዅ። ¹⁸ ኮዶኻ “ሲመር ጃሩዅ ውረስ ተካዅን፡ውረኻ ተኪሲንሉ።” ¹⁹ ላግርዋ ኒከረመኒል ፈደሪ ፈደና እድሪሪት ተከዅ።ፈደና ኒኒ በኮልደሰና በሄር አኽቲ ጀከል ዓስተሩ ንር ለንክከል ናልጝንትስ ገበርኑዅ። ²⁰ ኮዶኻ ሲመር ጃሩዅሲ ውረድ ተኪሲንሉ፡ ²¹ እን ላእዂና እቁቱገ ዓቁ መኰቱ ኤድሮ ሰኳ ርብዒት ላቕ ብልኩሮላ ይሮ መጭመጭሮ ሕበርደሪት ተከኲ። ²² ኒኻ ኢየሩሳሌምትል አኽራሲክ ፈሩ ደገጊትልኽር ቀሻዊተልኽር ክንሱንሲክ ደኩ ሰጘኲ። ²³ ላግርዋኻ ድዊ ያኣደራ እንደኤነው ኡቕቱ መናው ይኹሉ። ²⁴ ኒኻ “እን ደንኣብ ሽብውድ ቱትኖ ለመለም የኩም።ውረድ ገሪው ንርድ ትውድኖ ጀረበኑኩ አከለሎማ የኩንኩም። ²⁵ እን ልጝን አደራ ጔ እድሲ ኣበደሰና ከደን ኣኽድኖ “ዎይናኣደራ ብዲና ይድኖ እድሲ ቆርቊሕትኖ ግን ኒኻ ኣዊልድ እንትን ኤርእሊኩም ይሮኩም ግን። ²⁶ እንሲን እንትጛ ውራኩዲ ቁኑኽር ጅእኑኽር እርግንማ እንትኻ ቃዓሪትል ክንስሩ እርግለማ ይትኖ ተርሲትኖ ግን። ²⁷ ኒኻ እንትን ጂባ ከደምዱኑ ሰጝደናኽር ኒራ ስርግያ ይልድ፡ኤዊልድ እንትድነት ኤርእሊኩም” ይሮ ግን። ²⁸ አብራሃምዲ ይስሓቅዲ ያዕቆንዲት ናትክ ነቡዋትዲት ሲመር ጃሩኹል ቋልድነሰነሎም እንትን ከደንሲ ዳገንስትኖ ግን ኒላ ስረናዲ እርኩኳ ሕርቂቕዲ አኽሮ ግን። ²⁹ ብርክስጚልድር ኳሪ ለብልድር ሰሔትልድር ኮደይድር እንትኖ ሲመር ጃሩዅል ዓገልድኖ ግን። ³⁰ እንሲን እንጃበር ሰጘው ደምቢትድኖ ግን፡እን ደምቢራ እርገዋ ጃቢትድኖ ግን ይኹሎም። ³¹ ኒል እንትኖኻ ላው ፈሪሳንልድ “ሄሮዱስ ኩሮካ ጀረበኲ እንኩዅ እማ ፈሪ ነትድ ፊ” ይንኹሉ። ³² ኒኻ ፈራ እንጫ ባይሖታስ ንኪዲ አመሪዲ መጃኒንስኽር ፍድያ ግን ሹኹሽተውሲኽር እቢስያ ግን ሲኾር ኳሪላ ድጞ ፈሪያ ግን። ³³ ደአም ንኪኽር አመሪኽር አመሪንግራኽር ይወራትሲ ተርስያ ወንተርድያ ግን ውረድ ነቢ ኢየሩሳሌምይልድ ኤሪራ ክርዶ አከጋ ወራት ግን” የላ። ³⁴ ኢየሩሳሌም ነቡዋትሲ ኩራኽር እንኩል እንሻቕሶ እንተውሲ ይኸ ክርጝድ ከትከትራኽር እን ዲርዋ ንር ጫቊትሲ ንርካንፍፍ ዓንቀይ እንኩልኩልደሪርሰና አንውሪከዶል ኩቑርሲ እንኩልኩልያ ጀረቢኹን እንትጛ ጉሽድኑዅለ። ³⁵ እንታልጝን ባርዲልኩም እንትጛ እንጃር ሱጙድ እንተራዅ ገውርሳዅ ግን ይደና ወክት እንትራሲክ ቋልትኖለ አኽድኒ የኩንኩም እንኩኹን።