ፊዃ-14 ¹ ሰንበርድ ሳንስዓ ቁሮ ፈሪሳን ኤደራዲ ትውዅ፡ትዎሰናኻ አትቋመቱኑሉ እርግኑዅ። ² ላግርዋ ኒጐድጉ ጓዅድ እንታኸቶ ህምባዅ ኒጃብል አንጦጠሉዅ። ³ ኢየሱሳ እንምሁራን ፍትሑዲ ፈሪሳንዲት “ሰምበርድ አቢስና ትክያዅማ አኽላ” ዮ ወንቀርኹሎሞ። ⁴ ናዋ ሳቆብኑዅ ኒኻ ኒናንድ ተመዶ እቢሶ ስብድኹሉ። ⁵ እንደ ሸኑራ አውኒ ግን እንተልድ ኒዅራወሪ ኒቢራ አቢል ለበንሉ ሰምበርድ ፍደጋዅሉ። ⁶ ላርኻ ወንተስድኖሉ ገረስኒ። ⁷ ምድሊ ሽጝስተው ክብያ ቂጦታትሲ ፍሪረውሲ ቋለሰናኻ ነዋዮ ጂጝስቲኹሎም። ⁸ ድግምዳ ነዋ ይኹሎም “ላ አዳም ክኻንሊ ሽጘንካ ላዅ ኩልድ ኩጛዅ ሽጝስቶ ዋነን ⁹ እን ኩዲ ኒዲት ሽጛዃ አካንሲ ባሪሉ ይጊንካ እንትኻ ስማርዱ አካን ለጥ ያኹል ፈርግሪን አካን ጃብሪኹል ከፍ ይግ። ¹⁰ እማ ሽጝስትረሰና እን ሽጛዅካ ኒላውድ ላዅ ነራ አካን ክብያዅል አኺ ይራሲክካ ለጥያ አካንሊ አኺ። ¹¹ እንሲን ናድካ ጃብል ሳብስቲቶ ውረድ እን ኒሹት ለጥሳዅ ሳብስቲሮ ግን እን ንሹት ክብሰዃ ቃበብስሮ ግን። ¹² ይኸ እን ግርዋ ሽጛዅሲሉኻ ምድ እስረን ወሪ በዓል እስረን ኤዊ አርእኹን ናውር ሽጝግኒንካ እድኹር ወንተስና አኽጊንካ ኩት እንከልውሲ ወሪ ኩሻንሲ ወሪ ይኸ ኩወንድዲ ኩአግዋርዲ ገዱዲት ሽጝግ። ¹³ በዓል እስረን ድቡራንዲ ደልጓሳንዲ ዓረፍዲት ሽጚ። ¹⁴ ውረድ ነን ወንተስናዅካ ሻኽኒ ጉኑ ወንተስድኖካ ግን እማ እንሲን ሸተክታ ይኹሉ። ¹⁵ ላግርዋ ገዱዅ እን ኒል ዓገሉ እርገውልዳ ኒስ ዋሰሰና እን ሲመር ጃሩዅል ሳንሰዓ ቋዅ ሻትክ ግን ይኹሉ። ¹⁶ ኢየሱስ ላግርዋ ገዱዅ ምድ በሄርኮት ስኲሶ ከው ገሪውሲ ሽጙዅ። ¹⁷ ምድ ወክት አኾሰናኻ እን ሽጝስተውሲ ኒውክ ደለሙዅ እማ ሽጝድኖሎም ዮ ኒንሽቕሲ ፈሱዅ። ¹⁸ ደአም እንትግኒን ናውክ ላኰድጝድ ምስምስድኖ ተርሲኒዅ፡እንሰልፍዅ ኪድጝ ጅበ ህምበኩን እማ ምስምስቶለ ሺወኩንካ ይኹሉ። ¹⁹ እን ሊጘር ኮዶ እንኳ ሽምር ቢል ጅበ ህምበኩን እማ ወጠንድየሎም ፈርድያ ግን ምስምስቶለ ሺወኩንካ ይኹሉ። ²⁰ እን ሲኾርኽር እዂና እሲነዲን እንትያ አከለለ ይኹሉ። ²¹ እን ንሽቃ ወንተሮ ኔስ ናትክ ኒ ኣደረድ ድዊኹሉ፡እንሲን እን ልጝን አደራ ሓረቕሮ እን ንሽቃስ ፈሪ ወለይዲ መሔገያተልኽር ደገጊር ቀዓሪተልኽር እማ ድቡራንዲ ደልጓሳንዲ ዓረፍዲ ቀሻይምዲት ናቕሲ ይኹሉ። ²² ኒደምቢ እን ንሽቃ ኒኤደረስ ኩምራድሰነክ እሲኹን ደአም ኣካን ከብተዅ ህምበኲ ይኹሉ። ²³ እን አደራኻ እን ንሽቀስ “ደርፍፈልር ኬለባተልኽር ይልጝን እንታኽሮ አርዳ ግርዋስክ ሃብሬኹሲክ ሃብረ ናቕሲሎም” ይኹሉ። ²⁴ ውረድ እንሽጝስቶ እርገውልድ ኒኾርሲክ ላዅ ናልድ ይሳንስዒልድ ታመላ የኩንኩም ይኹሎም። ²⁵ እንሲን ከው ገሪው ኒዲ ፈሩኑ ግልጭዮ ²⁶ “ላዅ ይት ተለይሮ ጀረበን ኒገነዲ፡ኒኽርዲ፡ኒእዂናዲ፡ኒቁርዲ ኒሻንዲት ኒሹት ከብተጊኽር ይልድ ክብሰ እንከላዅ ይዲ አኽሮ ገረሰላ። ²⁷ ኒመስቀሊ ምኹሮ ተለየጋኹለ ይታለይቶራ አኽሮ ገረሰላ። ²⁸ አወያዅ ግን እንተልድ ልጝን በሄርኮት ገበርዶ ጀረበሰና በደሮ ውሪካ ሰላዲ ዓቕተትሉ ሺበጋዅ። ²⁹ አከገጛ ተርሰ ገፍል ባረሰና ናውክ ቋለውክሉ፡ ³⁰ እና ግርዋ ኒን ገበርዶ ተርሰ ገፍገፍል ባራዅ ቀሺም ግን ዩኑ ቃበበነኩሉ። ³¹ ወሪ ይኸ አወያ ንጉስ ላንጉስዲ ተሓረብሮ ጀረበን እን ለጘረጝን ሲሕ ግርወዲ እንተራኹሲሉ በደሮ ሽካ ሲሕድ ጨመድሮሉ ገረሳዅ አከን ሰልፍ ትክሰ ኰድጘዅ ይኹሎም። ³² አከገጛ ስጙት ዋኑ ንሽቕ ፈሶ አረክ ሺወኩሉ። ³³ እን ኒገድሲ ቃበበጋዅ ይታለይቶራ አኽሮ ወጀበለሉ፡ ³⁴ ሽዋ ትክያዅ ግን ደአም ኒታሚትሲ ድሂሰን ውረድ ግን ኒታሚትና፡ ³⁵ ከደን ማልሰኲ ግራ ብረድር ጀኻሪስኒልር ነፍዓላ ግምሽ ግን።ዋሳ እንቁዋ ዋስኒ-ኻ ይኹሎም።