ፊዃ-15 ኒዓገብድ ጥዕሳዅሲ ብሕል የኩሉ ¹ ንድ ደምቢኻ ናውክ ወርኮታተውዲ ዓገቡዲ ዋስድኖሉ ኒል እንትኑዅ። ² ፈሪሳንዲ ከታበንዲኻ አበዲ እናግርዋኒን ውረድ ግን ዓገቡሲ ኒከለብራዅ? ናዲኽር ቋኹን ዩኑ ትርቁምቁም ይኑዅ። ³ ኒኻ እና ድግም ኒስ ጂጝስቲኹሎም። ⁴ አውኒ ግን እንተልድ ሊኽ በጋ ዋንትረንሉ እማ ናልድ ላሪ ድድረንሉ እን ሰስረጝንዲ ሰሰት ጊሪል ባሮ እን ድድረሪት ኤርዳሲ ክላ ጀረቢሮላ ፈረጋዅ። ⁵ አሮሰነላኻ ፈርሖ ከስል ሙኹሮላ ⁶ ኒልጝል ወንተሮኻ ኒማስዲ ኒአግዋርዲት ሽጞ እን በጋ ድድሮለ እርግረሪት ኤርኹንላ እማ ላዃ ይዲ ፈርሓ ይኩሎም። ⁷ ሲመር ጃሩኹልር ኒሰና ግን ብሕልታ ጀረብደገውሎም ሰስረጝንዲ ሰሳ ሻትካንልድ ላዅ ዓገቡዅ ኒለበኪል ወንተራኹድ በዓል በሄርኮት አኽሮ ግን የኩንኩም። ⁸ ወሪ ይኸ አወይረሪ እዅና ሽካ ቅርሽ ወርኪው ሻኽረሪ ላሪ ናልድ ድድረንላ ኤርታሲክላ ቲዃስ ትልጭስረ ንር ልጝኝ ገሰሰግረሪ ኤርታሲክላኻ ትክስረ ጀረበግረሪ። ⁹ ኤርዶሶነላኻ ንርመቀልስኻር ንርአግዋርስኽር ሽጝሮ እን ድድሮለ እርግረሪት አርኹንላ እማ ላዃ ይዲ ፈርሓ የቲሎም። ¹⁰ ኒሰናኻ ንሽቕ ጃሩውድ ጃብልር ላዅ ዓገቡዅ ኒላ በኪል ወንተራኹድ ኒሰና ፈርሐት አከኲ የኩንኩም። ¹¹ ናዋ ዮኻ ጂጝስቲኹሎም ላግርዋ ላጛ እቊር ሰጘነኩሉ። ¹² ናልድ እን ሽጓዃ አበ ይበነስ ናኽለ ይኹሉ።ኒኻ ኒ-ማልድ በነ እውኹሉ፡ ¹³ እን ቁራኻ ኒማል ከለብሮ ሺሽዶ ፈሩዅ ኒላ ፋይቶታትዲ ኒማልሲ ድጙዅ እን ኒ እርጋ ብሪላ ትግር በሄርኮት አዅዅ። ¹⁴ ክመውሲክ ከፍከፎሰናኻ ማሕገድል ገሙዅ። ¹⁵ እንሲን እን ኮቁርልድ ላዅዲ ምቓቓ አኽሮ ዋስስትጚዅ ወንኪርሲ ምቃቕሪሮሉኻ ኒኪድጝል ፈስዅሉ። ¹⁶ እንሲን እን ወንኪር ቋውልድ ሐጅር ገርበሹልድ ቁሮ ሰውሁ ሰጘኲ ደአም ላዅ እዋዅሉ አርላ። ¹⁷ እንሲን ኒለበኪል ወንተሮ ይኽርድ አርስ ሳንሳዓስ ብትኖ ማለነኩሉ እንኩኑዅ አንኻ ነት ከአርድ ክረኩን እንኩዅን። ¹⁸ ጔ ይኽርሊ ወንተረን ኪደኩለ ነዋኻ ይሪሉ “ዎ ኤበ፡አን ጃር ጃብልር ኩጃብልር ጂብድኹን። ¹⁹ ኩዅሪሰና ሃብረ ቋልቶለ ወጀበለለ።ላዅ ኩኤረሰሰና ከለቢለ ይሪሊ” ይዅ። ²⁰ ጔኻ ኒኽርሊ ወንተሩዅ ኒኽርኻ ቅብልድ ሺራዅልድ ቋለሰነሉ ሳኻንተሉ ጋጙ ከለብሮሉ ሻኾ ሰለምኹሉ። ²¹ እን ኒዅራኻ “ኤበ ጃርጃብልር ኩጃብልር ዲብዶ ህምባኽር ግን ይምቊልናርድር ኩዅራ ይስትያ አከለለ” ይኹሉ። ²² ደአም ኒኽርኻ ኒአረስሲ ሽጞ ታኲን ሽርው ናቅስድኖ ሰሰሉ እና ይኹረስ ኒጭብዕሊ መርወድ፡ኒልኲሊኻ ሻፍ ቱሰሉ። ²³ ልዊ ስዀት ኤድኖ በረኻ ቁንጝር ፋርሕንጝር። ²⁴ ይኹራ ክሮ እርጋዅ ጒዅ ድዶ እርጋዅ ኣርስዅ ይኹሎም ፋርሕድኖኻ ተርሲኒዅ። ²⁵ እን ኒዅራ ቅዳዃ ሰገሮ እርጎ ልጝሊ ሱኩሮሰና ከለንፉት ጠዓምበውዲ ፊቑሮውዲ ጎሊተውዲት ዋሱዅ። ²⁶ እን ኤረስልዳ ላዅሲ ኒል ሽጞ “ውራ ተካ ጋርኒ ኒን ብርጃር ዳሕነማ” ዮ ዋንቀሩዅሉ። ²⁷ ኒኻ “ኩዳን ወንተሩዅ እማ ኩኹር ልዊ ሳዃ ባራኹኹሉ” ይኹሉ። ²⁸ ነስ ዋሰሰናኻ ሐርቕሮ ልጝሊ ቱነስ ጉሹዅ። ²⁹ ኒኽራ ቱሮ ሺዊዅሉ ኒኻ ኤበ አን ነስካ ኤመታታ ኩዓንቀይሊ ኣኾ ኩምራድሲክ እሱኽር ኩምራድድ ፈሩኽር ኒኾርስክ ላኳራ ነገልዳይ ኡሮለ ኤርድላ ይማስዲ ፋርሕያ። ³⁰ እና ኩዅራ ኒጛ ፋይቶታትዲ አኾ ማልሲ ማዕበኹድ ወንተሩዅ ይሮ ልዊ ሳዀት በራኽርኹን፡ዮ ወንተስኹሉ። ³¹ ኒኽራ “ኒሰና ኣኽላ ጠያቡካ እንቲ ዲማ ይዲ ህምብረኲ እን ይማል ናውክ ኩማል ግን፡ ³² እና ኩዳንኻ ክሮ ሰጛዅ እቢሩዅ ድዶ እርጋዅ አርስነዲን ቁኖኽር ፋርሕኖኽር ትክያዅ ግን” ይኹሉ።