ፊዃ-16 እምንሰጋ ሙነሰንታ ¹ ኒታለይቶስኻ ላግርዋ ገዱዅ ላ ሙነሰንታ ንሽቃ ሰጘኩሉ።ላዋ እናሙነሰንታ ማልሲ ድሂሰኩካ እንኩዅ ይኖ ድዊኒኹሉ። ² ኒኻ ሙነሰንተስ ሽጘ እና ኩሰበትድ ዋሰው ውራንግን ንድደምብክ ሙነሰንታ አኽቶለ ጀረበሊካ እማ ላዅ ኩወራትድ ሺብ ስኩሲለ ይኹሉ። ³ እን ሙነሰንታኻ ኒለበከድ “ይአደራ ይወራትልድ ፍድሮለ ግን ናን ውራ ሃቢን ጐድያ ኒሒል ሻኽሊ ሺውያኻ ስማረኩን፡ ⁴ ነትድ ዳገንሰሰና ናዲቢል ከለብረውለ አርድያ አን እሰውሲክ ይላውድ አርእኹን” ዮ ሃመቱኹ። ⁵ ንድኻ እን ይኤደሪል እድኹ ሻውሲ ላት ሽጘ እንጃበረስ “እንቲ ወንተስረው ውሪከው ህምባኹን ይኹሉ። ⁶ ኒኻ ሊኽ ጀን ደድ ይኹሉ።ኒኻ እህኒ ኩወረቀት እድኹሩዅ ኤድሮ አጝኩረጝን ይሮ ከተቢ ይኹሉ። ⁷ ኒደምቢ እን ሊጘርሲ “እንቲኻ ውሪከው ግን ኩእድኹ” ይኹሉ።ኒኻ ሊኽ ዕበላ ጀሩጉዅዋ ይኹሉ።ኒኻ “ኩወረቀት እድኹሩዅ ኤዲ እማ ሳዀትረጝን ይሮ ከተቢ” ይኹሉ። ⁸ እን አደራ እና ሙነሰንተስ ኒደይዓትድ ሳቢኹሉ።ውረድ እና እርድ ቁር እን በሪህ ቁርልድ ትክሲነ በሰረነኲ፡ ⁹ አንኽር ይየኩም ማልሲ ዱጝድነሰና ንዲሚ ልጝንትተል ከለብርየኩም ናድ እስዲነ እንከለውኩም ጀረባ የኩንኩም። ¹⁰ እን ከለለውሲ እምንሳዅ ኤርሳዅ እን ገሪውልኽር እምንሳዅ ግን እን ከለለውሲ ሐላል አኽጋዅ ገሪ ውሊኽር ሐላል አረርሰላኒ። ¹¹ እማ ማል ህሽኪቡሊ ሐላሉ አኽገው አውኒ ግን ማል ሐላሉሲ እንታዓይብ ይኹኩም። ¹² ማል ኤሪውድውድ አምንሰግደናኽር አኽድኖ ደምቢ እንታማልሲ ኤውኒ ኡሮኩም? ¹³ ለጛ ኤርደትድ እንሻቅስሮ ገረሳዅ እላ ውረድ እን ላዅሲ እንከሎ እብ ላዅሲ እንጠርዶ ግን ወሪ እን ላኹድ እንሻቅሶ እን ላዅሲ ቃበብሮ ግን።ጃርዲ ገዲት እንሻቅስትኖ አከለኩም። ¹⁴ ፈሪሳን ገድ እንከለው ነስ ዋስነሰና ቃበብኑኹሉ። ¹⁵ ኒኻ ከዋ ጃብል ሻትካን ተክዲነ ቋልስትደነኲ ጃር ደአም እንታ ለፈክሲ አርኡዅ።እን ከዋ ጃብል ጀንጀንሳዅ ጃርጃብል ፈንፈንሳዅ ግን ይኹሎም። ¹⁶ ኮዶኻ ኦሪትዲ ነቡዋትዲ ዮሓንስትል አኽራሲክ ግን ኒደምብክ ደአም ሲመር ጃሩዅ ሰበክሰኲ እንኩዅ።እንትዎዋ ናውክ ሒልድ ግን። ¹⁷ ደአም ኦሪትልድ ላሪ ሻሮት ለብረሪትልድ ዓስተርዲ ብረዲር ደኲና ስዳወኲ። ¹⁸ እን ኒ እዅነት ደቀሮ ኤሪ እዂና ዔሳዅ ደነየኲ ንራጝልድ ደቀርስረሪት ዔሳዅር ደነየኲ። ¹⁹ ግርዋ ብታዅ ሐራይር ሰረውዲ ጀገራትዲ ሰራዅ ዲማ ታሚትድ መንደርታዅ ሰጘኲ። ²⁰ ኒጭምድላ ኣልኣዛር ይስታዅ ግርዋ ለከንድ እንታኽታዅ ዓጨቢዅ ሰጘኲ። ²¹ እን ብታኹድ ግባርልድ ለበውሲ ቁሮ ብትሮኽር ሰውሁ ሰጘኲ ግሽጝ እንተረካ እን ኒለከንሲ ላንሹሉ ሰጘኲ። ²² እን ሐግልኻ ክሩዅ መላእኽት አብርሃምር ሕብጥሊ ገእሲኒኹሉ።እን ገዱዅር ኒሰና ክሩዅ እማ ደብቲዅ። ²³ ሽኦልትል አላለ ዩኻ ምጨትድ ቀመድሶ ኒዕልልሲ አወት በርሰ እንደራ ሺሽዶ አብርሃምቲ ኒሕብጥላ አልኣዛርቲ ቋልዅ እማ። ²⁴ አብራሃምቲ ሽጞ ሰኻንቲለ ኒአጫብዕሲ ዓቆል ጠቦቕስ ይላንቅስ ቀሽቀሽድሮለ ኣልኣዛርቲ ፈሲለ ውረድ እና ሃልሃልቲል ሓው የኩን እንኩኹን ይኹሉ። ²⁵ አብርሃማ እንቲ ይኹራ ብሪል ዋንትሩ ታሚቶካ ሰጘኲ።ኣልኣዛራ ሓገስቶ ሰጘት አልብዲ ናን ደአም ነት ኒደፍኤት አሩዅ እንትኻ ጀረስትረኲ እንኩሩዅ። ²⁶ ኮዶ ይኸ ነት እንተል ደኩሮ ጀረበው ዋነግኒን እንተልድር ነት ይነል ካርዶ ጀረበው ዋንተግኒን ይና ነበክል ቅራር ከላእኮት ህምበኲ ይኹሉ። ²⁷ እማ ዎ ኤበ አን አጝኳ ሻን ሻኹን። ²⁸ ናውር እና አካን ምጨቱኹል እንትግኒን ፈሀምድኖ ይኽርድ ልጝሊ አልኣዛርቲ ፈስቶሉ ኩዓይብ ይኹሉ። ²⁹ አብርሃማ ሙሴዲ ነቡዋትዲ ህበነኩሎም ናት ዋሲኒን ይኹሉ። ³⁰ ኒኻ “አኽላ ይኽር አብርሃም ክረውልድ ላዅ እንተረገንሎም ኤምነኒ” ይኹሉ። ³¹ ኒኻ ሙሴዲ ነቡዋትዲት ዋሰግነን ክረውልድ ላዅ ጓጝር ኤምነኒ ዮ ወንተስኹሉ።