ፊዃ-17 ኰድጛ ለበኪሳዅ ¹ ኒ ታለይቶትሲ ዓንቆሪትና እንትጊ ከብተጋዅ ግን እን ኒ ሰበትድ ዓንቆሪትና እንተራዅ ደአም፡ ² መላሉ።እና ግናቲትልድ ላዅሲ ከቲስኒልድ መጥቃን ድዃሪዅሲ ኒክርሚል እንሸውኖ በሓርሊ ማለነንሉ ኪድርድሉ። ³ እንተሹት ፈጠነኩም ኩዳን ዓገበንካ ዋኺቲሉ ጥዕሰጛ ብሕል ይሉ። ⁴ ግርግል ለጘታዶል ዓገበንካ ለጘታዶላ ብሕል ይለ ዮ ወንተተረንካ ባሪሉ ይኹሉ። ⁵ ኒታለይቶታ እምነት ኰዲና ይናአደራ ይንኹሉ። ⁶ ይናኣደራኻ እድሪ ፍሪኮት እምነት ክምደነን እናባንበት ምኩስትሮ ፈሪ በሓርሊ ተከልሲ ይደነንላ አኽርድኩም። ⁷ ኤውኒ ግን እንተልድ ላዅ አረሳ ወሪ ምቃቃ ዋነንሉ ዔረሰና አሸሽሮ ደኲ ቁቶ ዓገሊ ያዅ? ⁸ ሙነትሲ ሱኩሲለ አን ቊሪስክር ጅእሪስክር ድበልትሮ እንሽቕሲለ ኒደምቢ እንትኽር ቁታኽር ጅእታኽር የጋኹሉ? ⁹ ወሪ ኒ እንሽቃስ ኒጀረበሰነክ እሲነዲንሉ ሓመዳኹሉማ ተካኹንኩም? ¹⁰ እማ እንትጝር ኒሰና ይስታዅሲኩም እስዲነሰና ይን ላሪ ነፍዓግናኽር ንሽቕ ግንያ እን እሲኖሉ ሻዅ ወራትሲ እስኒኹን ያ ካያ። ¹¹ ኢየሩሳሌምትል አኽታሲክ ፈሩኻ ሰማርያዲ ገሊላዲር ነበክድ ደኩዅ። ¹² ላድገትል አተዩኻ ሽካ በርሰትድ ዓደረው ሃደፍ ይንኹሉ። ¹³ ሺራኹል አኽኖኻ “ዎ ኢየሱስ መምህር ሰኸንቲና ዩኑ ጨርሕኑዅ። ¹⁴ ቋሎሰናኸሎም ፈርድኖ አቕሸትድ ቋልስታ” ይኹሎም።ፈሩኑኻ እቢርኑዅ። ¹⁵ ላዅ ናልድ እቢረት አርእስተሰነሉ ጃርሲ ሐመዱ ደምቢራ ወንተሩዅ። ¹⁶ ኢየሱስቲ ሐመዱኻ ኒጃብል ገሽድ ለቡዅ፡ኒኻ ሳምራዊራ እርጉዅ። ¹⁷ ኢየሱሳ ክልብርሰ “ውራ እን ለጭሐው ሽካ አኽገውማ?እንሰሳ አዊል ህምበናኹን? ¹⁸ እና ኮኹራ አኽጋዅ አኽገት ጃርሲ ሐመድሮ ናልድ ወንተራዅማ አርስላ” ዩዅ። ¹⁹ ኒታ ጒ ፈሪ ኩ-አማነት ደኤንድኹካ ይኹሉ። ²⁰ ፈሪሳን ሲመር ጃሩዅ አውን ግን ኒ እንተርና ይነሰነሉ ሲመር ጃሩዅ ሻሮት ቋልስታኹድ አኽላ ኒእንተርና፡ ²¹ እናሓን ወሪ እንጨሓን ያኹሉ እላ ሲመር ጃሩዅ እነሓን ነት እንተዲ ህምበኲ ዩ ወንተሱኹሎም። ²² ኒ ታለይቶስኻ ላ-ግርጋ ኣዳሚንድዅረስ ቋልትኖ ሸንህደነው ግርጋት እንትሮ ግን ደአም ቋልደኒሉ የኩንኩም። ²³ እነሐኒ ነት ወሪ እንጨሐኒ እንጨደት የነንኩም ፈርገሎምር ዋስገሎምር። ²⁴ ምርክ ብሪ ሸልድ ሸሊ ተልዋሕ ያዅድሰና አዳሚንድዅራኽር ኒ እንተርና ኒ ሰና አኽሮ ግን። ²⁵ በደሮ ደአም ገሪዅ እና አሰል ነድ ሳደድስሮኽር በረይስሮኽር ግን። ²⁶ እን ኖህር ግርጋት ሰና አኽሮ ግን። ²⁷ ኖህ መርከብል ትዋ ግርግል አኽታሲክ ቁኑኽር ጅኡኑኽር ክኻንዱኑኽር ክኻንቱኑኽር እርግኑዅ።ስዋ ብሄርኮት ና አወይሲ ለቦኻ ታረቕድኹሎም። ²⁸ ሎጥር ወክትድር ኒሰና አኹዅ ቁኑኽር ጅኡኑኽር ክዱኑኽር ጅቡኑኽር ተከሉኑኽር ገበሩኑኽር እርግኑዅ፡ ²⁹ እን ሎጥ ሶዶምትልድ ፈ ግርግልኻ ዓስተርልድ ላኻዲ ረመጭዲ ገሞ ኒትክ ድሂስኹሉ። ³⁰ ኣዳሚንድዅራድ እንተርናኽር ኒሰና አኽሮ ግን። ³¹ እን ግርጋትሊ እራሪል ዲወዅ እራኳ አድሮ ዮ ልጝሊ ገምጊን ሰገሮ ዲወዅር ዔርጊኒ። ³² ሎጥር እዂነት አልብዳ።ኒፊኹትሲ ተከውሮ ጀረባዅ ድሂስሮላ ግን ኒ ፊኹትሲ ድሂሳዃ አርዶላ ግን። ³³ እን ግርገር ቂርሊ ለጛ ላ አርግል ገንጁኑ አርስድኖ ግን ላዃ አስትሮ ግን ላዃ ባርስትሮ ግን። ³⁴ ለጛ እኲን ላት ተአኑኑ ዲዊድኖ ግን። ³⁵ ላርኻ አስትቶ ግን ላሪኻ ባርስትቶ ግን የኩንኩም ይኹሎም። ³⁶ ናዋ አዊላ ይና አደራ ይኑኹሉ ዕምቕ ህምባ አካንሊ ጋማት ኒል ግን ና እንኩልኩልስና ይኹሎም።