ፊዃ-18 ጸሎትሊ ተባ ጀረብደኲ ¹ ዲማ ቂልስግኒ ጸሎት እሲድኖ ጀረብደትሎማ፡ ² ድግምድ እናሃበ ጋቢኹሎም።ላድገትል ጃርሲ ጓቊተጋዅ ከወልድኽር ስማረጋዅ ፈራዲራ ሰጘዅ። ³ እን ድገትልኻ ላባይኦራ ሰጘቲ ኒኒ-ኒል ወንተተርደክ እና ይዲ ዋኺቶ ህምባዅዲ ዲቢትሮ ፈረዲለ ይሩሉ ሰጘቲ። ⁴ ኒኻ በደሮ ገሪ ወክት ጉሹኹላ ደምብርጝ ደአም ኒለበከድ “ጃርሲ ጓቊተገጝር ወሪ ከውሲ ስማረገን ⁵ እና ባይኦራ ኒ-ኒ ወንተተርደክ ገንጃ ገብግሪንለ ረትዕደንላ” ኪደኩለ ዮ ሃመቱዅ፡ ⁶ ይና ኣደራኻ “እና ሃሽከበንታ ፈራዲራ የውሲ ዋስድኑዅማ? ⁷ እማ ጃራ እንቂርዲ ገርክዲ ኒል ዋዕየውሲ ከለብሮ አሸሻኹድ ናፍትሕ እውጊሎም ከብቲሮማ ተካኹንኩም? ⁸ ወለይዶ ናፍትሕ ኡሮሎም ግን የኩንኩም አከን ደአም ኣዳሚንዱዅራ ብሪል እንተሰና አማነት ኣርስሮማ አኽራ። ⁹ ኢየሱሳ እን ናሹት ሻትካን ሀበውሲ ኤሪውሲኻ ቃበበውሲ እና ድግም ኒስ ድዊኹሎም። ¹⁰ ለጛ ግርዋ ጸሎት ልጝሊ ትውኑዅ።ላዃ ፈሪሳዊራ እርጉዅ እንላዃ ዓገቡዅ እርጉዅ፡ ¹¹ እን ፈሪሳዊራ ኒል አንጦጠሎኻ ኒለበከድ “ዎ ያደራ እንኤሪ ግርውሰና ስኳንዲ ሃሽከበውዲ ደነየውዲርሰና አኽሊ ወሪ እና ዓገቡዅ ንሰና እሲግራኽርለ ሐመደኩንካ፡ ¹² እውናሪሊ ለጛዶል ሹመኩን ይማልድ ሽከር አብሲ ኡወኩን ዮ ጸሎት እሲዅ። ¹³ እን ዓገቡዃ ስርግዮ ገሽድክብሮ “ኦ ያደራ ይት ዓገቡዅሲ ስኸንቲለ ዮ ኒናሓርሲ ጠዓምቡ እርጉዅ ግን ግራ ኒዕልልሲ ዓስተርሊ በርሲሮኽር ረደይላ። ¹⁴ እንዲልድ ኒን ሸተኮ ኒልጝሊ ወንተሩዅ።ውረድ እን ኒሹት ሳባዅ ስማርዶ ግን እን ኒሹት ቃበባዃ ሳብስትሮ ግን የኩንኩም። ¹⁵ ግናቲትሲኻ ናንሲ ገምድሮሎም ይኖ ኒል ናቕስንኹሎም፡ኒታለይቶታ ነስ ቋልነሰና ውኺትንኹሎም። ¹⁶ ኢየሱሳ ሽጘሎም ግናቲትሲ ይል እንትድኖ ባረሎም ውረድ ሲመር ጃሩዅ ናሰና የውዱዅ ግን። ¹⁷ ሲመር ጃሩዅሲ ግናይሰና አኾ ከለብረጋኹክ ትወገትሉ እምንድክ የኩንኩም። ¹⁸ ላዅ እን ኒል እርገውልድኻ “ዎ መምህር በኪት ጀነትሲ ውራ እሰን ግን ይለውና?” ዮ ወንቀሩኹሉ። ¹⁹ ኢየሱሳ “ውሪዅ በኪት ይራኹንለ? ላዅ ጃር ኣኽጋዅ በኪት እላ። ²⁰ እን ደነይግ ክውግ ስውግ ብንድ ሸርግ ኩኹርዲ ኩገነዲት ሳቢ የው ትእዳዳትሲ ኤርእርዅ” ይኹሉ። ²¹ ኒኻ “ነስ ናትክ ይሹግልድ ተርሰ ተከወው ግን” ይኹሉ። ²² ኢየሱሳ ነስ ዋሶሰና “እማ ላወራቲ ከብትረካ ህምበቲ፡ፈሪ ዓስተርሊ እንድባ ተበብቶ ዋንተኹሲክኻ ክድሮ ድቡራንድ እውሮ ለሄኪለ ይኹሉ። ²³ ኒኻ ዓቕትራሲክ ገድ እርግነዲንሉ ነስ ዋሶሰና ገሪዅ ቁርቁርቱዅ። ²⁴ ኢየሱሳ ቁርቁርተት ቋለሰ፡ “እን ገድ ሻው ሲመር ጃሩዅል ትውድኖ ገሪዅ ሓገዳዅ ግን፡ ²⁵ ገድ ሻዅ ሲመር ጃሩዅል ትዋኹልድ ግሚላ መርቢ ዕልድ ደኩሮ ስዳወኲ ይኹሎም። ²⁶ እን ነስ ዋሰዋ “እማ አወያዅ ግን ደኤንዶ ገረሳዅ?” ይኑዅ። ²⁷ ኒኻ “እን ከውድ ገረስተጋዅ ጃርድ ገረስተኩሉ” ይኹሎም። ²⁸ ቤጥሮስ “እነሓን ይን ኒትክ ባርኖ ተለይንኹንካ” ይኹሉ። ²⁹ ኢየሱሳ “ሲመር ጃሩኹድ መታን ልጝን ወሪ እዂና ወሪ ሻን ወሪ እኽርዲ ገነዲ ወሪ ኮዶ እቁር ባራዅ፡ ³⁰ እና እርድሊ ገሪ እሽባ እን እንተራ ዲመር መናብረትሊኻ ድጙስተጋ መናብረት ለውሮ ግን የኩንኩም” ይኹሎም። ³¹ ንድ ደምቢ እን ሽካ ለጘት ናቱ ኤድኹሎም እማ “እነሓን ኢየሩሳሌምትል ተረገስነኩን እጝኩኑኹን እን ነቡዋት አዳሚንድኹረስ ቋላ ወራት ከተቡነዋ ኒውክ አኽሮ ግን ይኹሎም። ³² አረሜንድ ደኩስኖ እውድኖሉ ግን።ናዋ ቃበብድኖሉኽር ጀኺድኖኽርሉ ኒዳግር ብርጪቕ ይድኖሉ ግን። ³³ ከትከትኖሉ ደምቢኻ ኩድኖሉ ግን።ደአም ኒ ሲዀር ኳሪል ጉሮ ግን ይኹሎም። ³⁴ ናዋ እና ወራታትሲ ላሪ ድኳ ፈሄምኒ፡ጋብነን ናልድ ትብቶሎም እርግነዲን ላሪ ኤርእስትለሎም። ³⁵ ኢያሪሆር ገቢላ ላዓረብ ጉግ ሸሊ አኾ ሺዉ እርጉዅ። ³⁶ ኒን ከው ደኮውሲ ዋሰሰና “ዳሕነማ” ዮ ወንቀሩዅ። ³⁷ ናውኻ “ኢየሱስ ናዝሬትሩዅ ደኮኲ እንኩዅ” ይንኹሉ። ³⁸ ኒኻ “ዎ ይአደራ ኢየሱስ ዳዊትኹራ ሰኻንቲለ” ዩንሲክ ዋዕዩዅ። ³⁹ እን ጃብረድ ፈሩ እርገዋ “ሰቆቢ” ይኖ ዋኺትኑኹሉ ኒኻ ኮዶ ትክሰ “ዳዊቱዅራ ሰኸንቲለ” ዮ ዋዕዩዅ። ⁴⁰ ኢየሱሳ ደውዩዅ እማ “ይል ናቕሰሉ” ይኹሎም። ⁴¹ ኒል ስኩሮሰነኻ “ውራ እስየልካ ጀረብራኹን?” ዮኻ ወንቀሩኹሉ።ኒኻ “ዎ ይአደራ ቋልያ ጀረበኩን” ይኹሉ። ⁴² ኢየሱሳ “ኩእማኒሰና ቋሉ ኩአማነት ደኤንድኹካ” ይኹሉ። ⁴³ ንርድ-ንርዳ ቋሉዅ ጃርሲ መእኰትዱኻ ኒጉርበት ፈሩዅ። ናውክ ከው ኒስ ቋለው ጃርሲ ሐመድኑዅ።