ፊዃ-19 ኢየሱስ ዘኬዎስር ልጝሊ ¹ ኢየሱስ ኢያሪሆትል አተዮ ኒድ ደኩዅ ² እናሓና ግርዋ ዘኬዎስ ይስታዅ ግርዋ ገዱዅ ወርኮታት ፍደውድ ኤደራ ኒል እርጉዅ። ³ ኒ ኢየሱስ አውኒ አኸት ቋልዶሉ ጀረቡ እርጉዅ።ድርጛዅ አኽነዲንኻ ከዋ ብጅኽድ አክና ቢኹሉ። ⁴ ኢየሱስ ኒድ ደኩ እርግነዲንኻ ጃብራ ጋጘ ባምባትል ዓረጉዅ። ⁵ ኢየሱስ ኒል ገእዮሰና አወት ናዕዮ መኸልቱዅ እማ “ዎ ዘኬዎስ ላዅ ገሚ አሸሺ ንኪ ኩልጝሊ እርግያ ሻኹን ይኹሉ። ⁶ አሸሾ ገሞኻ ፈርሐትድ ከለብርኹሉ። ⁷ ናውካ ኒስ ቋልነሰና ኒን ፊዅሮ ልጝን ዓገቡዱዅል ትዋኹን ዩኑ ጉድዕድዕ ይኑዅ። ⁸ ዘኬዎሳ ጌ “ዎ ይአደራ እና ይማለልድ ድቡራንድ በኒሪ ላዅሲ አደያኽር አከንኻ ሰጃ እሽባ ወንተሰሪሉ” ይኹሉ። ⁹ ኢየሱስ እንሲን ኒት ንኪ እና ልጝን ኒል ደኤና ገሙዅ ውረድ ንኽር አብርሃምዅራ አኽነዲን ግን። ¹⁰ ኣዳሚንዱዅራ ድዶ ሰጛዅሲ እልልድ ግን ኒ እንታዅ። ¹¹ ናዋ ኒስ ዋስኖሰና ኢየሩሳሌምትል ስኩሮ እርግነዲን እንሲን ሲመር ጃሩዅ ቋልስታዅ ተኪነዲንሉ ነዋዮ ድግምድ ጋቢኹሎም። ¹² “ላግርዋ በሀሊናዅራ ሲመር ከለብሮ ወንተርዶ ድገ ሺራኹል ፈሩዅ። ¹³ ሽካ ኒንሽቕሲ ሽጞ እና ሽካ ምናናትሲ ኣን ወንተርዲሲክ እንተሹሺ ፍሪሰሎም ዮ ፋነይኹሎም። ¹⁴ እን ኒኮቊር እንጠሩኑሉ ሰጚንነዲን ‘ኒን ይነል ሰየምስሮ ጀረብነሊ’ ዩኑ ኒጉርበት ግርው ተለይድኹሉ። ¹⁵ ሲመር ከለብሮ ወንተሮሰነኻ ላኹክ ውሪከው አረት አርእሮ ዮ እን ኒማልሲ እዎ እርገውሲ ኒል ሽጝድኖሉ አደዱዅ። ¹⁶ እንጃበራኻ “ዎ ያደራ ኩምናን ሽካ ፍሪቲለ” ዮ ሱኩርኹሉ። ¹⁷ ኒኻ “ወሃግን እንቲ በኪት እቁቱትል ሳብስትረኽር ሽካ ድገትል ሰየምሲ” ይኹሉ። ¹⁸ እን ሊጘርር እንቱዅ እማ “ዎ ይአደራ እን ኩምና ናት አሪው አንኳ ኰድቲ” ይኹሉ። ¹⁹ ኒስር ኮዶ አንኳ ድገትል ሰየምሲ ይኹሉ። ²⁰ ላዅ ኤሪዅ እንቶኻ “ዎ ይአደራ እነሓን ኲምናን ሽልቱትሊ ኰሸሮላ ሰጘኩን፡ ²¹ ውረድ እንቲ ገምድግራዅ ጉድራኽርዲ ፈዲግረዋ አተይስራኽር ግርዋ ተባዅ አኽረት አርኡ እርግነዲን ግን” ይኹሉ። ²² ኒኻ “ነበንታ ገንጂና ቅዩር አን ገምድጋዃ ጉዳኽር ፈዲገውኻ ዔሳኽር አኸት ኤርእሩ ²³ ውረድ እንይማልሲ ባንከትሊ ገምድግሪሉ? አን ንኪ ይውንትሪል ኒ ፍሪተውዲክ አድሪድሉ ሻኽር ግን” ይኹሉ። ²⁴ እን ኒል እርገውሲኻ እንምናንሲ አድኖ እንጫ ሽካ ሻኹድ እወሉ ይኹሎም። ²⁵ ናዋ “ዎ ይናአደራ እንጫ እንዲን ሽካ ምናን ግራ ሻኹን” ይንኹሉ። ²⁶ ኒኻ ሻዅድ እውስትሮ ግን፡እንጋዅዳ እን እቁቱ ዋነውሉኽር አስትሮሉ ግን የኩንኩም። ²⁷ እን አን ናል ሰየምስያ ጀረቡ እርግገውሲኻ ነት ይጃብል ናቕስድኖ በረኸሎም ይኹሎም። ²⁸ ነስ ዮ ጋበኻ ኢየሩሳሌምትል ተረገስሮ ናጃብ ጃብል ፈሩ እርጉዅ። ²⁹ ጊራ ደዱዅ ይስታኹል ቤት ፋጌዲ ቢታንያዲትል ስኩሮሰነ ኒታለይቶትልድ ለጘት እንሻቆ፡ ³⁰ “እና እንታ ጃብል ህምባ ድገትል አዳም ጨዓንስጋዅ ጌንብ እንሽውሶ ዲዊሮኩም ግን እንክድኖ ይል ናቕሰሉ ይኹሎም። ³¹ ውሪዅ እንክደናኹንሉ ዮ ላኹክ ጋበንኩም ይናአደራ ጀረበኩሉ የሉ” ይኹሎም። ³² እን እንሸቕሰዋ እን ኒያኹደሰነሎም ዲዊኹሎም። ³³ ናዋ እን ጌንብሲ እንኩኑ ኒአርደት ጌንብሲ ውሪዅ እንክደናኹን ይንኹሎም። ³⁴ ናዋ ይናአደረድ ጀረብዳኹሉ አኽነዲንዋ ይንኹሎም። ³⁵ አድኖሉኻ ኢየሱስትል ናቕስንኹሉ።እን ጌንብል ናታኲንሲ ዓደፍድኖኻ ኢየሱስት ጨዓኑኹሉ። ³⁶ ፈሩኻ ናታኲንሲ ጉግሊ ወሸቅዱኑሉ እርግኑዅ። ³⁷ ጊራ ደዳዅ ኩልኩሊበስ ገምሮ ስኩሮሰናኻ ኒታለይቶት ናውክ እንአምራት ቋልነውድ ፈርሕኖ ደሃይሲ ክብሲነ፡ ³⁸ እንጃር ሱጝድ እንተራዅ ንጉስ ዓስተርሊ ሰላም ብሪላ ሓምደ አኽኒ ዩኑ ጃርሲ ሐመድድኖ ተርሲኒዅ። ³⁹ ከዋ ነበክል ዲወዋ ፈሪሳንልድ መምህር ውራ ኩታለይቶትሲ ዋኺተለሎም ይንኹሉ። ⁴⁰ ሰቆበነጝር ክርጝ ጨርሕሮ ግን ዩ ወንተስኹሎም። ⁴¹ ድገትል ገእዮሰነኻ ⁴² ዎ ኢዮሩሳሌም እና ንኪር ግርገድ ኲደአነድ አኻ ወራትሲ አርእራኽር አክረን ደአም ኩዕልልድ ሔገይሶኪ ህንበኲዩ ስሪኹላ። ⁴³ ውረድ ኩት እንጠረው ኒድክድ ኬለብኖ ከረፋነኪ ግርጋት እንትሮ ግን።ኒድክድ ኬለብኖ ሳደድኖኪ ግን። ⁴⁴ ናጸሎት ልጝሊ ትዎኻ ኒል ክደውሲ። ⁴⁵ ይልጝን ጸሎት ልጝን ግን ያዅ ክቱብ ህምበኲ እንትጛ ጋኻ ስኳኑዅ እስዲኒኹሉ ዮ ዳገንዶሎም ተርሲዅ። ⁴⁶ ወንተተረካ ጸሎት ልጝሊ ክንሱሎም እርጉዅ።አቕሸታ በህሊንዲ እን ከውዲኻ ኩድኖሉ ኣትዋየንዱኑ እርግኑዅ። ^{48 47} ከው ናውክ ዋስድኖሉ እኺርኺረዳግ እንኩልኩልሱኑ እርግንነዲን አዋሃብነት ኤርእምብስቲኹሎም።