ፊዃ-20 ኢየሱስር ሒል ¹ ልጝን ጸሎቱዅሊ ክንሱኽር አበሸርዱኽርኻ አቅሸታ በህሊንዲ ከታበንዲ ሽማገሌታትዲ ኒል ስኩርኖኻ። ² “እንደ ድዊና አውር ምራድድ ግን እና እንቲ እስረው አውኒ-ኒ እና ኒሲ ያኹካ” ዩኑ ወንቀርንኹሉ። ³ ኒኻ “አንኽር ላሪ ወንቀርድየኩም እንደ-ወንተሰለ፡ ⁴ ዮሓንስር ጥምቀት ዓስተርልድማኒ እማ ኣዳምትልድ?” ይኹሎም። ⁵ ናዋ ናሹር ናሹ ኰድጚነ ‘ዓስተርልድ ግን’ ይነን እማ ውሪዅ እምንግድኒሉ? ይሮና ግን። ⁶ ከወልድ ግን ይነጛ ናውክ ከው ዮሓንስቲ ነቢራ አኸወድ እምነነኩሉ እማ ክርጝድ ሕንጭልጭሊት ይድኖና ግን፡ይኖኻ ናለፈክ ሀመትኑዅ። ⁷ አዊልድ አኸት አርእናዅ ሻኽኒ ይንኹሉ። ⁸ ኢየሱስኻ “አጝር አውር ምራድድ እሰት ድወሊኩም” ይኹሎም። ⁹ 9.ኢየሱስ ከውዳ እና ድግም ኒስ ጂጝስቲሮሎም ተርሲዅ፡ኒከረመኒል ጭንድቕ እሲዅ።አረስድ ምዳሶሎማ ሺሽዶ ፈሮ ኤሪ ኮል ገሪ አሜታት ህምቡዅ። ¹⁰ 10.ኒወክት አኾሰናኻ እን ኤረስ ፍርር ጀቢቡ እውድኖሉ ኒንሽቀስ እንሻቁኹሉ ናዋ ጠዓምብኖ ካያ ወንተስንኹሉ። ¹¹ ኮዶ ሊጘር ንሽቃ ፈሱኹሎም።ኒትር አድኖ ጠዓምብኖኽር ጀኺነኽር ካያ ወንተስንኹሉ። ¹² ኮዶ ሲዀር እንሾቕኹሎም ኒስር መድኖ ከደን ማልንኹሉ። ¹³ እንጭንድቕ አደራ ውራ እሲን ውራ ሃቢን? እና ይዅራ አንእንከላዅሲ ፈሰን አዊ አርእኹን ኒት ስማርድነሉ ዩዅ። ¹⁴ ደአም እን አረስ እንተራዅሲ ቋልነሰነሉ ኒን እን ለወንታ ግን ይነሹሺ ለውኖ ኩንንሉ ይስትትጚኒዅ። ¹⁵ ሻኽኖኸሉ ጭንድቕልድ ጔ ሰስኖ ፍድኖ ኩኑኹል።እን አደራ ናን ውራ ሃቢረሎም። ¹⁶ እን ኤረስሲ እንቶ ድሂሶ ኒጭንድቕሲ አሪውድ ምዳስራ።ናዋ ኒስ ዋስነሰና ያእ ኒና አኽጊኒ ይኑዅ። ¹⁷ ኒኻ ተጝሰ መኸልቶሎም እን ክርጛ ነደቀው ቃበብነሪ ድኩር መሔገይር አዅዅ ያዅ ክቱብ ውሪ ይናግን? ¹⁸ እና ክርጛ ንሂትል ለባኹካ ከርትትጚሮ ግን ይኸ ንሪ ኒዳግ ለብራኹር ረጨቕስሮ ግን ይኹሎም። ¹⁹ ከታበንዲ አቅሸታ ነሀሊንዲሲኻ እና ድግም ኒን ናት ቋላዅ አኸት አርእስቶሎም ሻኽድኖሉ ሃንተር ይኑዅ ደአም ከውልድ ጉኢትኑዅ። ²⁰ ኒ ጋበል ከታ አርድኖሉ እማ ዲቢል ሸከይኖ ደኩስኖ እውድኖሉ ይኖ ሓላልቁር ተኩኑ ወጠነውሉ ፈስንኹሉ። ²¹ ናዋ ኒል እንትኖኻ “እማ መምህር እንቲ እምን ጋብረትር ክንስረትር ይኸ ጃር ጉግሲ ትክያኹድ መርሕረትር ይኸ ከው ውራ ይድነለ ይግሪ ምለግረትር ከትነሊ። ²² እንደ ድዊና ቄሳርሲ ወርኮት እውና አካኹማ አከላ?” ዩኑ ወንቀርንኹሉ። ²³ ኒኻ ናተሓቲትሲ አርኦ “ውሪ መታን ግን እንትን ወጠንደናኹለ? ²⁴ እንደ ላሰላዲራ ቋሊሰለ እና ሻሮታትዲ ክቱብዲ ኤውሩናውኻ” ይኹሎም።ናዋ ቄሳርዱዋ ይንኹሉ። ²⁵ ኒኻ “እማ ኒን አኾደንቢ ቄሳርዱዅሲ ቄሳርሲ እዋ ጃሩዅሲኻ ጃርድ እዋ” ይኹሎም። ²⁶ ናዋ ከዋ ጃብል ኒጋብድ ከቲሲድኖሉ ገረስኒ እማ ኒወንተስነድ ፈከርስኖ ሰቆብኑዅ። ²⁷ እን ክሪልድ ጉና እላ የው ሰዱቃንልድ ላው ወንቀ ርድኖሉ ይኖ ኒል እንትኑዅ። ²⁸ “ድዊ መምህር ሙሴ ግርዋ ክኻንተ ህምባዅ እዃርጊ ክረን እን ባይኦረት ኒዳን ለውንላ ኒዳንድ እዅራ ባርዶ ዮ ከተቦ ህንበኲ። ²⁹ እማ እንቲ ዋስራኹማ ለጘታ ሻን ሰጘነኲ።ንልድ እን ጃበራ እኲና ዔሶ እዃርጊ ክሩዅ። ³⁰ እን ሊጘርዲ ሲዀርዲኽር ቱኑኹላ። ³¹ ኒሰና ለጘተክ ለውኑኹላ ናውካ እዃርግኒ ክርኑዅ። ³² ደንቢረድ እን እዂናኽር ክርቲ። ³³ ናጛ ለጘተክ ለውኖላ ሰጚንነዲን ወክት ጉኒዅድ አውኒ ግን ንርጝ አኽሮ” ይንኹሉ። ³⁴ ኢየሱሳ “እና ብሪል ከው ክኻንደነኩር ክኻንተነኩር። ³⁵ እን እንተራ እርድሊ ጉኒል ደአም ክኻንደንኽር ክኻንሰኒኽር፡ ³⁶ መላእኽቲርሰና ኒዀርሲክ ክረኒ ።ጉነድ እዃርስንነዲጛ ጃር ቁር አኽድኖ ግን። ³⁷ ክሪው ጓነት ይኸ ሙሴት እንገርበት ጳጦስሩኹል ጃር አብርሃምሩዅዲ ኢሳቕሩዅዲ ያዕቆብሩዅዲ ያዅሲ ፈሀማ። ³⁸ ናውክ ኒድ መንደርተው አኽንነዲን ኒ ጃር መንደርተውዱዅ ግን ግራ ጃር ክረውዱዅ አኽላ” ይኹሎም። ³⁹ እን ከታበንልድ ላዋ መምህር ትክየው ጋብሪዅ ይንኹሉ። ⁴⁰ ንድ ደምቢ ላዅ ረደዮ ወንቀርዶሉ ስኩርለሉ። ⁴¹ ኒኻ አዋሃበ ግን ክርስቶስቲ ዳዊትኽራ የናኹንሉ። ⁴² ዳዊት ኒላውድ ኒክቱብል አደራ ይአደረስ ኩት እንጠረውሲ ድኩር ኩልኩከው እሲሪሲክ፡ ⁴³ ይላውል አኺ ዮሉ ዋኑ አዋሃቢነ ደአም ክርስቶስቲ ዳዊትኹራ ግን የናኹንሉ። ⁴⁴ እማ ዳዊት ይአደራ ዮ ሽጞሉ ደንቢ አዋኸ ግን ኒ እዅራ አካኹንሉ ይኹሎም። ⁴⁵ ናውካ እን ከው ሸኑሩኑሉኻ ኒታለይቶትሲ ነዋ ይኹሎም። ⁴⁶ “እን ታኲን ሺረውሲ ሰሪነክ ቀዓሪተል ጅልወው ከውቋልዶሎም ጸሎት ልጝንተልኽር ቂጦታት ሽኻሩሊ አኽድኖ ሙነትል ሽጝስተነጝር ክብያ አካንሊ አኽድኖ ፍሪረው ከታበንልድ ፈተና። ⁴⁷ ነን ባይኦታት ልጝንትትሲ ቋው ምሊድኖኽር ጸሎታት ሺረው እሰው ነን ፍርድ ሒለቱዅ ከለብርዶሎም ግን የኩንኩም”።