ፊዃ-21 ሰደቐት መብልዳናሩዅ ¹ መኸልተሰነኻ ገድ ሻው እንድባ ሞባኡኹል ሰደቀት ገምደውሲ ቋሉዅ። ² ላባይኦራ ድቡራ ለጛ ሰላዲራ ገምድረሪት ቋሉዅ። ³ እማ “እምንድክ የኩንኩም እና ባይኦራ ድቡሪ ናድከልድ በጀኽድሮ ገምድሮ ህንበቲ። ⁴ ውረድ ናውክ ኤሪውክ ናጠምዓትል ከብተውልድሎም ግን ናው ጃርድ ገምደናዅ ኒንኻ ንርዓጨቢል ንሪ ሻኽራ ማልሲ እውቲ” ዩዅ። ⁵ ቤት መቅደስ ክርጝ ሽኻሩውድ ኒገበርስነዲ ከው እውነው ማልድ ሰርገይሶ ህምባኹዳ ጋቢኒኹሉ። ⁶ ኒኻ እና እንትን ቋልደናዅክርጛ ክርጚ አውይሲ ሃገግጊ ከብተጋ ግርጋት እንትጊ ህምበላኒ ይኹሎም። ⁷ ናዋ “መምህር ኒን አውን ግን ኒአክና ኒሻሮትኻ አወያዅ ግን።ይኖ ወንቀርኑኹሉ። ⁸ ኒኻ ከተግድኒን ፈጠና ውረድ ገሪው አን ግን ዩኑ ይሱጙድ እንትድኖኩም ግን ደአም ዋስገሎም። ⁹ እንሽኽዲ ድልቕልቕዲ ዋስደነን በኸኽርጋ ሰልፍ ኒን ኒውክ አኽሮ ህንበኩሉ ደአም ኒድጙስትና ኒድ ኒድ አኽሮ ኣኽላ። ¹⁰ ከው ከዋ አወይሲ ንጉስ ንጉስ አወይሲ ጉሮ ግን። ¹¹ ኣኻ አካንሊክ ትግርዲ ዕድር ሒለቱዅዲ ብሪ ውልቅናዲ አኽሮ ግን። ¹² ንድጃብ ደኣም ይሱጝ ሰበትድ ሻኽድኖኩምር ረመጭድኖኩምር ግን።ናዲቢልኽር እንሽውኖ ደኩስኖ እውድኖኩም ግን።ንጉስዲ አስያምድር ጃብል ስኩስድኖኩም ግን። ¹³ ኒስ ኒትክ ሳምዕ አኽትኖ ግን። ¹⁴ ውራ ይድኖ ወንተስደነት ሳሀሮትል ትውጋ ኒስ እንታለበኪል እንኩረሉ የኩንኩም። ¹⁵ ውረድ አን ናትክ እንተት እንጠረውኩምር ተሐረበውኩምር ሸከየውኩምር ገረሰግነኩም ጋብ እንታ አብል እሰየልኩም ግን። ¹⁶ እክልዲ ሻንዲ ወንድዲ እንታሻሙዲ ከብተግኒ ደኩስኖ እውድኖኩም ግን።ላውሲ እንተልድ ኩድኖ ግን። ¹⁷ ይሱጝ ሰበትድ ናውክ እንጠርድኖኩም ግን። ¹⁸ እንታ አኾርልድ ላ ሽብካ ድኳ ድደላ። ¹⁹ እንታዓቕልድ እንታርሒት ደአንድትኖ ግን። ²⁰ ኢየሩሳሌም ተሓረበውድ ከረፍስሮ ህምብረሪት ቋልድኖሰና እንሲን ንርለባ ስኩረት አርኣ። ²¹ ይሁዳትል ዲወው ጊተል እግሪኒን።ድገር ዓንቀይል ዲወውኻ ኒልድ ፊኒን ሰገሮ ዲወው ኣተይግኒን። ²² ውረድ ኒን ኒውክ እንክቱብ አካ ግርጋ ግን። ²³ እን ግርጋት እንዴን እኲን ጐስኩዲ ነብሰውዲሲ መላለን ብሪል ሒለቱዅ ማሕገድ አኽሮ ግን።እና ከው ነድ ኣወይሲ መዓት ገምሮ ግን። ²⁴ ሴፍድ በረኽስድኖ ግን ሄለል ይስትኖኻ ኒልክ እርድሊ ኮከይስድኖ ግን ኒውክ ተመምራሲካ ኢየሩሳሌም አረሜንድ ዳድስትቶ ግን። ²⁵ ኳራዲ አርባዲ ሽንግርውዲትል ሻሮታት ቋልስትሮ ግን።ራሐር ህምምነድር ኒኣፍሉት ሐጨፍስነድር ናዓቕል ሽብዎ ሃበናኹክ ድድሮሎም ግን። ²⁶ ሒል ዓስተሩ ረመጭስሮ ግን እማ ከው እን እርድሊ እንተራ ጋራትሲ ጨበርነዲ ጓቁዲሲ ናለፈክ ድድሮሎም ግን። ²⁷ እንሲን ኣዳሚንዱኹረስ ኒ በሄርኮት ሒልዲ ኒሳቡርዲክር ብኳንዲ እንተራዅሲ ቋልትኖ ግን። ²⁸ እና ወራታት አኽሮ ተርዮሰና እንታ ድኤንና ስኩርነዲን እንታአኾርሲ ናዕሳ ይኹሎም። ²⁹ ላድግምድኻ ነዋዮ ጂጝስቲኹሎም “ካና በለሲሪትኽር ኤሪ ካንስኽር ማኻልታ። ³⁰ ጠጥዕሮ ተርዮሰና ቱጛን ሱኩረት እንተላውድ ኤርእድኑዅ። ³¹ ኒሰና ተካ ጋራትሲ ገመውሲ ቋልድነሰና ሲመር ጃሩዅ ሱኩረት አትዋየንዳ። ³² ኒን ኒውክ እንትጊ እና አሰል ነን ደኮግነት እምንድክ የኩንኩም። ³³ ዓስተርዲ ብረዲ ድኩሮ ግን ይጋበኻ ደኮላ። ³⁴ እንታለፈክ ድብጥናርድኽር ሽከር ነድር መንብሮ ታሚት ብሪዅ ሃሰው ይዱኑ እን ግርጋ ሃደፍድ እንትግሪንኩም ፈጠና እንተሹ ተከዋ። ³⁵ ውረድ እን ግርጋ ኒልክ እን ብሪል ህምበውሊ መሰሊሰና ሃደፍድ ናዳግ ገምሮ ግን። ³⁶ እማ እን እንተራ ወራታትልድ እግርትኖ ኣዳሚንድዅሪ ጃብል ፍሪርሰው ኣኽትኖ ዲማ ጸሎትሊ ተውሃ” ይኹሎም። ³⁷ ኢየሱስ ገርክ ጸሎት ልጝሊ ክንሱ እርጎ ቂር ፈሮ ጊራ ደዱዅ ይስታኹል ኩ ሰጘኲ። ³⁸ እን ከዋ ዋስድኖሉ ይኖ ጉራብድ ጸሎት ልጝሊ ፈሩኑ ሰጘነኲ።