ፊዃ-22 ኢየሱስቲ ኩድኖሉ ገለልስጚነት ¹ ፋጅኻ ይስታዅ በዓል ቅጨሪዅ ስኩሮ እርጉዅ። ² አቕሸታ በሄሊንዲ ከታበንዲኻ ከውሲ ጓቁትኖ አዋሃቢነ ኩወነትሉ አርእምብስተሎም እርጉዅ። ³ እንሲን ሴጣጛ እን ሽካ-ለጛትልድ ይሁዳ አስቆሮታዊራ ይስታዅል ትውዅ። ⁴ ኒን አዋሃበ ኢየሱስቲ ተሓቲትድ ደኩሶ እወትሎም አቅሸታ በሄሊንዲ ቤት መቅደሱዲኽር ኰድጚሮ ፈሩዅ። ⁵ ናዋ ፈርሕኑዅ ሰላዲ እውድኖሉኻ ጋርሲ ድጙኑዅ። ⁶ ኒኻ ሻኺስሮሉ ናዲ ዋስስትጚዅ እማ ከው እንኩልኩልሰጋ ጭምዋ ግርጋ ጫበሩኑ እርግኑዅ። ⁷ በጋ ፋጅኺዅ በረኽሳ ግርጋ በዓል ቅጨሪዅ ገእዩዅ። ⁸ ኢየሱሳ ቤጥሮስዲ ዮሓንስዲት በጋ ፋጅኺዅሲ ቁኖ ፈራ ደለምደና ይኹሎም። ⁹ ናዋ ኣዊል ስኩስኖካ ጀረብራዅን ይንኹሉ። ¹⁰ ኒኻ ድገትል ዔርዱኑ ግርዋ ጀን ዓቋዅ ሙዅሮ ፈራዅ ሃደፍ ይሮኩም ግን እማ እን ልጝን ኒ ትዋዅሊ ኒ ጉርበት ፈራ። ¹¹ እን ልጝን አደረሳ መምህር እን ይታለይቶትዲ በጋ ፋጅኺዅሲ ኒል ቋዅ ልጝን አዊን ግን ይኹካ የሉ። ¹² ኒኻ ልጝን እዳናዅ ቂጦታት ሻዅ ቋሊስሮኩም ግን ኒል ደለምዳ ይኹሎም። ¹³ ፈርነሰነኻ እን ኒ ያኹድሰናሎም ኣኾ ዲዊኹሎም።በጋ ፋጅኺዅሲኻ ኒል ደለምድኑዅ። ¹⁴ ኒወክት አኾሰናኻ ኣተዮ ሙነትሊ ዓገሉዅ።እን ሽካ ለጛ ታለይቶትኽር ኒዲ ዓገልኑዅ። ¹⁵ እን ጅርበት እንተራኹድለ ጃብ እና በጋ ፋጅኺዅሲ እንተዲ ቁያ ገሪዅ ሸንህኹን። ¹⁶ ደአም ኒስ ንድ ደንቢ ሲመር ጃሩዅል ተመምጊ ኒኾርሲክ ቋገትሉ የኩንኩም። ¹⁷ ዋንጨስ ጉዶኻ ሐመዱዅ እማ ኒስ አድኖ ናውክ በንስጘሉ። ¹⁸ ሲመር ጃሩዅ እንትራሲክ ኒዀርሲክ ሚድ ጀቢቡልድ ጀኤገት የኩንኩም። ¹⁹ ኮዶ ሳንስዓስ ጉዶ ገውሮ ሸረፎኻ ኒን ሰደቀት ኣካዅ ይስኻ ግን።ኒስ ይታና እሰሉ ዮኻ እውኹሎም። ²⁰ ኒሰና ዋንጨስ ሙነት ደንቢ አዶ “እና ዋንጫ ኒን እንተድ ቡቐተው ይብር ዓደት ሒዲስ ኪዳኑ ግን ዮ እውኹሎም። ²¹ ደአም እንደኩሶ እዋኹለ እነሓን ሙነትሊ ኒ ናኒ ይዲ። ²² አዳሚንድኹራ እንከተብሶሉ ህምባኹድሰና ፈርዶ ግን።እን ኣዳሚንድኹረስ ሻኺሳዅ ግርዋኻ አጀዋ ይኹሎም። ²³ ናዋ እናወራት ኒስ እሳዅ አውኒ ግን ዩኑ እኺርኺርሲ ወንቀርድኖ ተርሲኒዅ። ²⁴ ናልድ አውኒ ኩጘት እኺርኺርሊ ጉኑዅ። ²⁵ ኒኻ ሰየም ከዋ አወይሲ ሰየምስኖ አርደት ኣከነኩሎም።እና ናአወይሲ ሲመር ከለብረዋ ትክሰነኩሎም ይስተነኲ። ²⁶ እንትን ኒሰና ኣኽትኖ ተከጊንኩም፡እንተ ነበክል በሄር ኣካዅ ሰልፍ ሽጓኹድሰና አኽኒ እን ቅዳዅ ንሽቂሰና አኽኒ። ²⁷ እን ሙነትል ዓገሎ ህምባዅ እማ እን እንሸቅሳዅ አዊን ግን ኩጛዅ ተካኹንኩም?እን ዓገሎ ህምባዅ አኽለማ? እማ አን ደኣም ንሽቂሰና እንታ ነበክል ህምበኩን። ²⁸ እንትን ይማሕገድል ይዲ ተብድኑዅማ ²⁹ እንትን ይሲመርሊ ይዲ ዓገልድኖ ቁትኖኽር ጅእትኖኽር ግን ቂጦሪል ከፍ ይድኖኻ ሽካ-ለጛ አሰል እስራኤልድቁርሲ ፈረድትኖ ግን። ³⁰ እን ይኽር ይት ሲመርሲ እዋኹድሰነለ አንኽር እንተድ እወኩንኩም እንኩኹን። ³¹ ኮዶኻ “ዎ ስምኦን! እነሐን ሸይጣን ጀሩጉሰና ወረውሮኩም ሺዊዅ። ³² ኣን ደአም ኩእምነትሲ በረይግሪን ጸሎት እሰልካ ህምበኩን”።እንቲኻ ወንተርዶሰና ኩሻንሲ ኣረጋ ይሎም። ³³ ኒኻ “ዎ ይኣደራ ኣን ኩዲ እንሸውስያኽር ክርድያኽር ደለሞ ህምባኽር ግን” ይኹሉ። ³⁴ 34.ኢየሱሳ “ዎ ቤጥሮስ እምንድክ ድውየካ እንቲ ንኪርቂርሊ ዲርዋ ኳየጊ ሴዃ ዶል ኤርእሊሉ ይሮ በረይቶለ ግን” ይኹሉ። ³⁵ ኮዶኻ እንሸቑኩም ሕሽኩልዲ ማርዲ ሽንፍፍዲ እንገት ነቐሳኹኩም እርጉዅማ? ናዋ “ላሪ ድኳ ነቐስለና” ይንኹሉ። ³⁶ ኒኻ “እማ ናን እን ሕሽኩል ሻዅዲ ማር ሻዅዲ ኣዳ ባርገሎም።እንጋዃ ኒታዊነስ ክዶ ሴፍ ጅቢን። ³⁷ ውረድ እን ሃሽከበውዲ ሺብስትኹን ያዅ ክቱብ ኣኽሮር መታን፡ኒዀርክ ይል ኣኽሮ ህምባዅ ግን የኩንኩም። ³⁸ ናዋ ነት ይነዲ ለጛ ሴፍ ህምበኩና ይንኹሉ ኒዃ “ዓቅተው ግን” ይኹሎም። ³⁹ 39.ኒ ክኒርሰናኻ ኒልድ ኒታለይቶትዲ ጊራ ደድኹል ፈሩዅ። ⁴⁰ 40.ኒል ገእዮሰናኻ ሸርሊ ቱውግድኒን ጸለያ ይኹሎም። ⁴¹ ናልድ ክርጚ ሕንጭልኮት ሺርዮኻ እብርክዮ ነዋዮ ጸለዩዅ። ⁴² “ዎ አበ ኩምራድ አከን እና ጅርበትሲ ይልድ ደኩሲሉ ደአም ኩምራድሰና ኣኽኒ ግራ ይምራድሰናታ አኽጊኒ” ዮ ጸለዩዅ። ⁴³ ደፍእድሮሉኻ ዓስተርልድ መልኣኽ ቋልስትኹሉ። ⁴⁴ ኒ ፊኹት ክሪል ገእዮኸሉ ኒስድቕ ብርሰና ብሪል ጀደድይራሲክ ኒሒልዲክ ጸለዩዅ። ⁴⁵ 45.ጸሎትልድ ጔ ኒታለይቶትሊ እንቶሰናኻ ህርግት ተቖሎም ገንጅኖ አርኹሎም። ⁴⁶ 46.ኒኻ “ውሪዅ ገንጅደናዅን ውራ ጉሰኒ ጸሎት እስደኒ ሸርሊ ለብግድኒን” ይኹሎም። ⁴⁷ እናኸ ጋቡኻ እነሓን ከው ከላእ እንትኑዅ፡ይሁዳ ይስታዅ እን ሽካ ለጛትልድ ናጃብጃብል ፈሩ እርጉዅ።ኢየሱስቲ ሰለምሮኻ ስኩሩዅ። ⁴⁸ ኢየሱሳ “ድዊ ይሁዳ እንቲ አዳሚንድኹረስ ሰለም ነድማ ደኩስሮ እውራኹን” ይኹሉ። ⁴⁹ እን ኒዲ እርገዋ እንጋር አርእስቶሎም፡ “ዎ ይናአደራ ሴፍድ ጠዓምብንመሎም?” ይንኹሉ። ⁵⁰ ላዅ ናልድኻ ገንጂና አቅሽታ በሄሊናዅሲ ጠዓምቦ እንጝቋ ላውሪት ነተፍኹሉ። ⁵¹ ኢየሱስ “ደአም ህምባ አቕትራ” ይኹሎም።ኒትኻ እንቁዋስ ትምድሰ እቢሱኹሉ። ⁵² እን ኒል እንተው አቅሸታ በሄሊንዲ ቤተ መቅደስ ተከዎውዲ ሽማገሌታትዲትኻ ነዋ ይኹሎም፡ላዅ ሱዋኒሰናማ ኣስያፍዲ ግምፍፍዲሲ ደበልትድኖ እንተርደናኹን? ⁵³ ውራ ገርክ ቤተ መቅደስሊ እንተዲ ዲማ እርጉ ሰጘሊማ ላዶን ድኳ ሻኽትኖለ ሀንተር ይድኒለ።ንኪ ደአም እንታ ወክትዲ ሲመር ጭልሙዅዲ ግን ይኹሎም። ⁵⁴ ሻኽኖኽሉ ኣቅሸታ በሄርድ ልጝሊ ኤድንኹሉ።ቤጥሮሳ እንደራ ስርግዮ ቅብለድ ተለዩሉ እርጉዅ። ⁵⁵ ቃዓሪታ ነበክልኻ ሞራ ሻኽስኖ ካውሩኒ ቤጥሮስናዲ ጃጋሕ ዩዅ። ⁵⁶ ላዓንቲ ልሽካ ላኻ ገቢል ጀጋሕዮ ህምባኹሲ ቋልዶሰና ተጝስረ ማኻልትሮ ኒጝር ኒዲ እርጉዅ ይቲ። ⁵⁷ ኒኻ እንቲ እዅና ኤርእሊሉ ዮ በረዩዅ። ⁵⁸ ኮዶ ላዶን ግጀሰና ኤሪዅ ቋሉኹሉ እማ እንትኽር ናልድ ግን ይኹሉ ቤጥሮሳ እንቲ ግርዋ ኣኽሊ ዩኹሉ። ⁵⁹ ላመደት ግጆሰና ኮዶ ላዅ ኤሪዅ ኒጝር ኒዲ እርጉዅ ገሊለሩኽር ግን ዩዅ። ⁶⁰ ቤጥሮሳ እና እንቲ ይራዅሲለ ላሪ አርእሊሉ ይኹሉ።ንርድ-ንርዳ ኒ ጋቡ ዲርዋ ኳዪዅ። ⁶¹ እንሲን ይናአደራ ግልጭዮ ቤጥሮስቲ መኻልትኹል።ቤጥሮሳ እን ይናአደራ እንቲ ዲርዋ ኳየጊ ሲዅን በረይቶለ ግን ዮሉ እርገት እልብዱዅ። ⁶² ከደን ፈኻ ገሪዅ ስሪዅ። ⁶³ እን ግርው ኢየሱስቲ ሻኾ እርገውኻ ምሉኑኽርሉ ጠዓምቡኑኽርሉ እርግኑዅ። ⁶⁴ ገሽሲ ጀርመምኖኻ ጠዓምቢነክ እንደ ኤውኒ ግን ጠዓምባኹካ ዪነክ ወንቀሩኑሉ እርግኑዅ። ⁶⁵ ጀኹኑሉኻ ኒኣወይሲ ኤሪ አከጋ ጋብር ጋቡኑሉ እርግኑዅ። ⁶⁶ ብራ ክሰሰናኻ ከዋ በሄሊንዲ ከታቤንዲ እንኩልኩልስኖ ናዲቢል አድንኹሉ። ⁶⁷ “እንቲ እን መሲሕ አክረን ድዊና እንደ” ይኑኹሉ።ኒኻ “ድወንኽርኩም ኤምንደኒለ። ⁶⁸ ይኸ ወንቀረንኩምኽር ወንተስደኒለ፡ ⁶⁹ ደአም ኣዳሚንዱኹራ ሒል ጃሩኹድ ላውል ከፍ ይሮ ግን ይኹሎም። ⁷⁰ ናውኻ “እማ እንቲ ጃር ኹራ ግን ይኑኹሉ?” ኒኻ ኣን ኒሰና አኸት እንትጝር እንተላውድ ይደነኲ እንኩድኑዅ ዮ ወንተስኹሎም። ⁷¹ ናዋ “እማ ይን ይነላውድ ሙቁላ ዋስኖሉ ደምቢ ውሪ ሳምዕታት ጀረብዳኹንና ይኑዅ።