ፊዃ-23 ኢየሱስ ጲላጦስር ጃብል ¹ እን ዲቢቶ እርገው ናውክ ጉኖኻ ጲላጦስትል ኤድኖ ፈርኑኹሉ። ² “እና ግርዋ ኒን ይና ከውሲ ከቲስሮ ቄሳርሲኽር ወርኮት እውጋ ይኸ ኣን ክርስቶስ ንጉስ ግንኽር የኩ” ዩኑ ሸከይድኖሉ ተርሲኒዅ። ³ ጲላጦስ “እንቲ ኣይሁዳ ንጉስማ?” ዮ ወንቀሩኹሉ።ኒኻ ወራ ኩላውድ ይረኲ እልላማ” ዮ ወንተስኹሉ። ⁴ እንሲን ጲላጦስ እን አቅሸታ በሄሊንዲ እንከውዲት “አን እና ግርዋ ኒል ላሪ ከታ ኤርሊሉ” ይኹሎም። ⁵ ናውኻ “ገሊላትልድ ተርሰ ነት አኽራሲክ ኒልክ ኒ ምህሮሲ ከውሲ በጭበጨዅ ዩኑ ተብድኖ ሸከይኑኹሉ፡ ⁶ ጲላጦስ ኒስ ዋሰሰና እን ግርዋ ገሊላሩዅ አከን ወንቀሪሱዅ። ⁷ ሄሮዱስር ሕክም ገፍልድ አኽት አሌለዮሰነኻ ሄሮዱስትል ፈስኹሉ።ንኽር እን ግርጋትሊ ኢዮሩሳሌምትል እርጉዅ። ⁸ ሄሮዱስ ገሪ ግርጋትልድ ተርሰ ኤየሱስቲ ቋልዶ ጀረቡ ሰጚነዲን ቋሎሰነሉ ገሪዅ ፋርሑዅ ውረድ እን ንዋሱ እርጋ ጋራትድ ኒድ ላአምር እሰን ቋልዶ ጨበሩ ሰጘኲ። ⁹ ገሪዃ ወንቀሩኹሉ ኢየሱስ ዳኣም ላሪ ድኳ ወንተስለሉ። ¹⁰ አቅሸታ በሄሊንዲ ከታቤንዲ ኒል ኣኽኖ ገሪዅ ሸከዩኑሉ እርግኑዅ። ¹¹ ሄሮዱስኻ ኒዓስከርዲ ሐበርሰ ቅበሲ ጀኸሉኻ ታዊና ብርቕርቕ ያዅ ሰሶ ጲላጦስትል ወንተስኹሉ። ¹² ጲላጦስዲ ሄሮዱስዲ እንጠርስጙ ሰጘው እንሰከትል ኤረክሲኒዅ። ¹³ ጲላጦስ አቅሸታ በሄሊንዲ ሽማገለ ከወውዲ እንኩልኩሎ፡ ¹⁴ እንትን እና ግርወስ ከውሲ ከቲሰኲ ይድኖ ይል ናቅስድኑኹሉ፡አንኻ እነሐን እንታጃብል ወንቀሮሉ እን እንትን ይድናኹድሰና ኣኽላ ላሪ ከታ ኤርሊሉ ይኹሎም። ¹⁵ ሄሪዱስር ላሪ ከታ በሰነክሉ ይነል ዋንሱኹሉ።ላሪ ዓገብ ክሪል ገእሳዅ ድኳ ሻኽላ። ¹⁶ እማ ነዋያዅ አኾ ደምቢ ቀለጦ እንክየሉ ግን ይኹሎም። ¹⁷ ደአም በዓልድ በዓል እን እንሸውሰውልድ ላዅ እንክስትሮ ክኒ እርግነዲንሎም፡ ¹⁸ ናውክ ላት “ኒስ ድሂሲልና ባርባንቲ እንኪልና” ዩኑ ጨርሕኑዅ። ¹⁹ ባርባን ድገትል ድርግርግ እሰ ግርዋ ኩዎ እንሸውሶ እርጋዅ ግን። ²⁰ ጲላጦስ ኢየሱስቲ እንክሮሉ ጀረቢነዲን ኮዶ ሐዲስድ ወንቀሩኹሎ። ²¹ ናዋ ኮዶ ኣቅትራሲክሎም “ከርከርዲሉ፡ከርከርዲሉ” ዩኑ ጨርሕኑዅ። ²² ጲላጦስ ሲዀርድ ወንተሮ “ውራ ሙቁላ እሲኹን ክሪል ገእሳዅ? ላሪ ድኳ ከታ ኤርሊሉ።ኒን አኾ ደንቢ ቀለጦ ጠለቕየሉ ግን” ይኹሎም። ²³ ናውኻ ኰዲነክ ካኒል ከርከርስሮ ተብድኖ ሸከይኑኹሉ። ²⁴ እንሲን ጲላጦስ ናምራድሰና አኽሮሎም ዮ ፈረዱኹሉ። ²⁵ እን ናው ሺዉኑ እርግናዅ ሰና እን ግርዋ ኩዎ እንሸውሶ እርጋዅሲ እንኩኹሎም፡ኢየሱስቲኻ ናውጀረብናዅሲክ እሲድኖሉ ደኩሶ እውኹሎም። ²⁶ አድኖ ፈሩኑንሲክሉኻ ስምኦን ቀሬናዊራ ይስታዅ ጊሪልድ ዔራዅ ሃደፍ ይኹሎም።ሻኽኖሉኻ እን መስቀልሲ ምቁስኖሉ ኢየሱስር ጉርበት ፈረሰነክ ሃቢኒኹሉ። ²⁷ ከው ገሪው ግርውዲ እኲንዲ ተለይኑኹሉ፡እን እኲንኻ ስሩኑሉ እርግኑዅ። ²⁸ ኢየሱስ ናል አኽታሲክ ግልጭዮ ነዋ ይኹለን “ዎ ኢዮሩሳሌምር እንቃቅ እንተሹዲ እንታ እቁርዲሲ ስራ ግን ግራ ይድ ይድኖስረጋ” ይኹለን። ²⁹ ውረድ ኩሪሩዲ ሕርማት እዃርገውዲ እንጉኲ ነብሰገውዲ ገዲ ግን ይስተነውለን ግርጋት እንትሮ ግን የኩንክን ይኹለን። ³⁰ ውረድ እን ግርጋት እንዴል ጊት ይነዳግ ለበጛ እሮትር ሔገየና ይደና ግርጋት ተር ይሮግን። ³¹ “እን ካናቁጣዅ እናዳኽ ደምቢ ካና ኢዳዅ ኣዋኺሮ ግን” ይኹለን። ³² ለጛ ሱኳን ምቁልሲኽር ኒዲ ከርከርድድኖ ኤድኑኹሎም ³³ ቀራንዮ ይስታ አካንሊ ገእይነሰነኻ ኒል ካንል ከርከርድኑኹሉ።እን ለጛ ሱኳንሲኽር ላዅሲ ኒላውል ላዅሲኻ ኒሸንገብል ሰቀልኑኹሎም። ³⁴ ኢየሱሳ ኒኽርሲ “ዎ አበ እና ናው እሰናዅሲ ሻኽግሎም፡ኤርእምብነድ ግን ብሕል ይሎም” ዩዅ።ኒ ሰረንሲኻ ቅሻ ማልኖ በንስጚኒኹሎም። ³⁵ ኒል እርጋ ከውር ደውይኖ መኸልቱኑ እርግኑዅ እንሽማገለኽር “አሪውሲ ደኤንዱ ሰጛዅ ኒን እን ጃርድ ፍሪርሳዅ ክርስቶስ አከን እንደ ናን ኒሹት ደኤንድን” ዪነክ ምሉኑሉ እርግኑዅ። ^{36 37} እን ዓስከርር መዓቡኑሉ እርግኑዅ ኒል ስኩር ይኖኻ ሚድ መንሸው እውኖሉ አይሁድ ንጉስ አክረን እንደ ናን ኩሹት ደኤንዲ ዩኑሉ እርግኑዅ። ³⁸ ኒን አይሁድ ንጉስ ግን ያዅ ክቱብ ኒ አወይሲ እሲኒኹሉ።ኒንኻ ጽርኢሲኽር ሮማይስጢሲኽር ዕብራይስጢሲኽር ከተብሶ እርጉዅ። ³⁹ እን ኒዲ ከርከርሰው ሙቁልድ ላዃ “እንቲ አበዲ ክርስቶስ አክረን ኩሹትር ይነትር ደኤንዲ” ዮ ጀኺኹሉ። ⁴⁰ እን ላዅ ደአም “ውራ እንቲ ኒስ ተካ መዓት ገሞካ ዋንቱኽርማ ጃርሲ ጓቁተላ? ዮ ዋኺትኹሉ። ⁴¹ ይነታ ይናምቁልናርድ ይና ናኒ ኤርቲና ኒኻ ውራ ምቁልናር ክመ” ዮ ዋኺትኹሉ። ⁴² ኢየሱስትኻ “ዎ ይና አደራ ኩሲመር እንተራኹል ኤልብዲለ” ይኹሉ። ⁴³ ኢየሱሳ እምንድክ የኩንካ እንቲ ንኪ ጀነትሊ ይዲ ትውቶ ግን።የኩንካ ይኹሉ። ⁴⁴ ሰዓት ወልተር ቅያስ አኩ ኳራ ጨልመቲ፡ሰዓት ሰሳትልኻ ኒውክ ብራ ጨልመቱዅ። ⁴⁵ ሕርበት ቤተ መቕደሱዅ ለጛትል ሒቐ ዩዅ። ⁴⁶ እንሲን ኢየሱስ ደሄይሲ ክብሶ “ዎ አበ ይፊኹቲት ኩናንተል ገምበኩን” ዮ ፋነዮ ደምቢ ኒፊኹቲ ፍቲ። ⁴⁷ እን ሊኽ አደራ ኒስ ቋሎሰና “ግርዋ ኒን እምንድክ ሻትክ ግን” ዮ ጃርሲ ሐመዱዅ። ⁴⁸ እን ኒል ቋልድኖ እንኩልኩልሶ እርገው ከውር አኸውሲ ናትክ ቋልነሰና ና-ነሐርሲ ጠዓምቡኑ ድገትል ወንተርኑዅ። ⁴⁹ እን ኢየሱስቲ ኣርአውሉኽር እን እኲን ገሊላትልድ ተርሰ ተለየውሉኽር ሺራኹልድ ቅብሊስኖ እን ኣኻ ወራትሲ ኣትቋመቱኑ እርግኑዅ። ⁵⁰ እነሓና ግርዋ ሻትክ ዮሴፍ ይስታዅ ዲቢ ኰድጚዅ፡ ⁵¹ ይሁዳር ድገ አርማትያስሩዅ ሲመር ጃሩዅሲ ጨበራዅ ናኰድጚልር ናወራትልኽር ኒ ናን ሕበሪጋዅ፡ ⁵² ጲላጦስትል እንቶ ኢየሱስር በድንሲ ሺዊኹሉ። ⁵³ ካና ጠልዮ እርጋኹልድ ገምዶኻ ደበላንሊ ትብሎ ላዅ ትውጋዅ ሸሺል ከኽሮ እርጋዅ ጎቕሊ ትውሱኹሉ። ⁵⁴ አመሪትል በዓል ሰንበሩኹል ደለመና ኩንጝ እርጉዅ። ⁵⁵ እን እኲን ገሊላትልድ ኢየሱስቲ ተለይኖ እንቶ እርገዋ፡እን ኤርብሲኽር እን በድን አዋኸ ገመትር አትቋመትኑዅ። ⁵⁶ ወንተርኖኻ እጥርዲ ደድ ቂራ ሽኻሩዲ ጅቢነ ደለምድኑዅ፡ደአም ሰምበር ናክኒርሰና ፊኹኑዅ።