ፊዃ-24 ኢየሱስ ክሪልድ ጔ እኲን ላውድ ቋልስተት ¹ እን ግርጋ እውናርዲ ሰልፍሪትላ እን ስኩስና እጥርሲ አድኖ ጉራቢሲ ኤርብል ፈርኑዅ። ² እን ክርጛኻ ጎቕ አብልድ ትንኩሪሮ ዲዊኹለን። ³ ኒል ትውነሰነኻ በድን ይና ኣደሪዅ ዲዊለለን። ⁴ ንድ ሰሃሮ አኸኖ ዋኑኑኻ ታኲን ብልታውረው ሰረው ለጛ ግርው ናጃብል ደው ይኑዅ። ⁵ ናውኻ ጓቁሲ ተግ ይኖ ናአዀትሲ ብሪል ሉምሲኒዅ።ናዋ ውሪ ሰበትድ ግን ህምባዅሲ ክሪውዲ ጀረብደ ናኹንሉ? ⁶ እን ኒ ዮ እርጋኹድሰና ጉዅ ነት እላ። ⁷ እማና ገሊለትል ዋኑ ኣዳሚንዱኹራ ምቁልድ ናንተል ገምሮግን ናዋ ከርከርድድኖሉ ግን ኒ ሲዀር ኳሪልኻ ጓት ድወኩም እርግላማ? እንትን ኒስ ምኺርድኖማ? ይኑኹለን። ⁸ እንሲን እን ኒ ጋብሲ ኤልብድኑዅ። ⁹ ኤርብልድ ወንተርኖኻ ኒትክ እን ወራትሲ እን ሽካ ላኹድር እን ኤሪውድር ኣበሸርድኑኹሎም። ¹⁰ እን ነስ ታለይቶትድ ድወው ማርያም መግደላዊትዲ ዮሓናን ማርያም ያዕቆብር ገናዲ እን ናዲ እርጋ እኲንዲ ግን። ¹¹ ደአም እና ጋብነን ሃተምተም አኾ ዋስስቶሎም አምንኒለን። ¹² ቤጥሮስ ደለይድሮ ዮ አርብል ጋጙ ፈሩዅሉም ዮ ሰናኻ እን መግነድ ታዊና ኒድ ትብልሶ እርጋዅሲ ኒቱ ገሞ ቋሉዅ ኒ ጐድጉድ ፍክር አኾሉኻ ኒልድ ወንተሩዅ። ¹³ እን ግርግላ ለጛ ናልድ ኢዮሩሳሌምትልድ ኤማሑስ ይስታ ድገትል ፈሩኑኻ፡ ¹⁴ እን አኻ ጋርድ ጂጝስቱኑ እርግኑዅ። ¹⁵ እናኺነ ጂጝስቱኑኽር ወንቀርስጙኑኽር ኢየሱስ አሪ ገሽድ ናዲ ሕበርሰ ፈሩ እርጉዅ። ¹⁶ ኤርእግኒንሉኻ ናዕልል አበስቶ እርጉዅ። ¹⁷ ኒኻ እና እንትን ቁርቁርትዱኑ ጋብደና ወራታት ውረኒ ግን?ይኹሎም። ናውኻ ፍክር አኾሎም ደው ይኑዅ። ¹⁸ ቀልዮጳ ይስታዅ ናልድ ላዅ ውራ እንቲ ካያማ ኢዮርሳሌምትል ጋሽይ? እና ግርጋት ነል ኣኻ ወራታትሲ ዋስግራኽርማ? ይኑኹሉ። ¹⁹ ኒኻ “ውረኒ ግን? ይኹሎም።ናዋ እን ኢየሱስ ናዝራዊረስ ቋላ ወራታት ኒናን ጃርዲ ከውዲር ጃብል ኒጋብነድ አከጝር ኒወራትድ አከጝር ናድካ ገሸል ግርዋ ቢራ በሄርኮት እርጋዅ ግን። ²⁰ እን አቅሸታ በሄሊንዲ ይና ኣስያምዲ ክራ ፈረድኖሉ ካኒል ከርከርድነትሉ፡ ²¹ ይን እስራኤልቲ ደኤንድሮ ህምባዅ ኒን ግን ይኖ ሳድኑ እርግንኹን።ኒን ኒውክ ኒአክና ኒሲዅር ኳራ ግን። ²² ደአም እን እኲን ላው ይነልድ ጉራብኖ እን ኤርብል ፈርኖ እርገው ፈከርድኑኹና። ²³ ኒበድንሲ አርኒ ደአም መላእኽቲ ቋልስትኑኹና እማ ናዋ ኒርሕዲ ህምበኲ ይኑኹና ዩኑ አበሸርድኑኹና። ²⁴ ይነልድ ላው ፈርንሰናኽር እን እኲን ይናኹድሰና አኹዅ ኒራ ቋልኒሉ ይኑኹና። ²⁵ ዎ እንትን ዓወስ እንታ ለፈክ ደንደዶ ህምበው ናትክ እን ነቢታት ዩኑ ሰጘነውሲ ኤምና ብነድ ²⁶ ክርስቶስ እና ጅርበት ኔስ ከለብሮ ኒሳቡርሊ ትውሮ ወጀቡ እርግለማ? ይኹሎማ። ²⁷ ሙሴትልድ አዶኻ ናልክ ነቢታተል አኽራሲክ እንኒድ ጋበው ክቱባንሲ እንክሮሎም ተርሲዅ። ²⁸ እን ፈሩኑ እርግና ድገር ገቢል ገእይኖሰናኻ ናልድ ሲሪዅ። ²⁹ ናዋ ብራ ዓመቅረብ አኹኽ ኳራ ንርለብኒል ግን ላዅ ይነዲ ኪ ይኑኹሉ።ኒኻ ናዲ ክሮ ገለዱዅ። ³⁰ ሙነትል ናዲ ዓገሎሰነኻ ሳንስዓስ ኤዶ ገውሮ ሸረፎኻ እውኹሎም። ³¹ እንሲን ናዕልል ብስቱዅ እማ አሌለይኑኹሉ ኒ ደአም ናልድ ድዱዅ። ³² ናውኻ ውራ ጉግሊ ፈርኑ ጂጝስትኑኽር ክቱባንሲ እንኩልናኽር ይና ለፈክ ሐውዮና-እርግለማ ይስትጚኒዅ። ³³ ንርድ-ንርድ ኒልድ ጉኖኻ ኢየሩሳሌምትል ወንተርኑዅ። ³⁴ እን ሽካ ላዅዲ እን ናዲ እርገውዲ ላት አኽኖ ይና አደራ እምንድክ ጉዅ ስምኦንሲኽር ቋልስትዅሉ ይስትጙኑ ኤርኑኹሎም። ³⁵ ናውኻ እን ፈሩኒ ኣኻ ወራታትሲኽር እን ሳንስዓስ ሸረፋ ኤለለይሰትሎም ድዊኒኹሎም። ³⁶ ናኺነ ጋቡኑኻ ኢየሱስ ኒኣኾርድ ናነበክል ተለውዮ ሰላም እንተዲ አኽኒ ይኹሎም። ³⁷ ናውኻ መንፈስ(ዱሙት) ተከሎም በኸኽርኑኽር ጓቊትኑኽር። ³⁸ ኒኻ ውሪዅ እንታ ዓቅል ኸብውድድናኹን እንታ ለፈክሊኽር ተሐደብደናዅን። ³⁹ ኣን ግን ይአዀርድ አኸት ይናትትዲ ይሉኩኩዲ እመሐን ቋላ ተመዳኽር አስተብሃልዳኽር እና ይት ቋልደናሰና መንፈስ ናሽዲ ስኻዲ ሻኽላ ይኹሎም። ⁴⁰ ነስ ዮኸሎም ኒ ናንትትዲ ኒልኩክዲት ቋሊስኹሎም። ⁴¹ ናው ደአም ንግስድ ኤምና ብኖ ፈከርሱኑ ቊስታዅ ሻኽድኒማ ይኹሎም። ⁴² ናዋ ድርደረት ስኻ ቀመድሳዅ ዓሲዅዲ ሳንስዓዲ ሰኸራዲ ናቅስኑኹሉ። ⁴³ ኑኻ ኤዶ ናጃብል ቊዅ። ⁴⁴ ኒድ ደምቢኻ ኔስ ጋቢኹሎም፡እን እማና እንተዲ ዋኑ ሙሴር ፍትሕዲ ነቢታትዲ ሕላያት ዳዊትሩዲ ይት ቋለው ክቱባት ናውክ ዓቕተት ዮኩን እርጋዅ ኒን ግን ይኹሎም። ⁴⁵ እንሲን እንክቱባትሲ አርእድኖ ናለፈክሲ በርህድኹሎም። ⁴⁶ ኮዶኻ ክርስቶስ ጅርበት ከለብረትር ኒሲዀር ኳሪልኻ ክሪልድ ጓትር ⁴⁷ ኒሱጙድኻ ኢየሩሳሌምትልድ ተርሰ ኒልክ እርድሊ ህምባ ከውድ ጥዕስዲ ዓገብ ብሕልዲ ኪሰሪ ብሽርደት ከተብሶ ህምበኩ። ⁴⁸ እንትጛ እና ወራታትድ ሳምዓን ግን። ⁴⁹ አን ናን እነሐን እን ይኽርድ ሳደስ ፈስየልኩም ግን እንትጛ ዓስተርልድ ሒል ሰርትናሲክ ድገትልድ ፍጋ ይኹሎም። ⁵⁰ አዶሎም ከደን ቢታንየር ገቢል ገእሲኹሎም።ኒናትትሲ ናአወይሲ ጠለቖኻ ገውሩኹሎም። ⁵¹ ገውሮሎምኻ ናልድ ሲረ ዓስተርሊ ዓረጉዅ። ⁵² ናውኻ ውጅህኖሉ ደምቢ ገሪ ንግስድ ኢዮሩሳሌምትል ወንተርኑዅ። ⁵³ ጃርሲ ሐምዱኑኻ ዲማ ልጝን ጸሎቱኹል እርግኑዅ።