ሰዀተር ፊዃ(ፊዃ-8) ኢየሱስቲ እኲን በካይት ተለይነትሉ ¹ ኒደምቢ ሲመር ጃሩዅሲ ደገጊትልኽር ቀዋሺትልኽር ጅልወክ ሰበኩ እርጉዅ።እን ሽካ ለጛኽር ኒዲ እርግኑዅ፡ ² ኒሰና ይኸ እኲን ላው ኢየሱስ መጃኒንልድር ኤሪሽዅዲልድኽር እቢሰው እን ለጘታ መጃኒን ፍዳዅላ ማርያም መግደላዊት ይስትረሪዲ፡ ³ ዮሐና ኩዛ ቁዲ እን ልጝን ሄሮዱስሩዅሲ ዓወነንታ ሶስናዲ አሪውዲ ናማልድ ካቡኑሉ እርገውር። ⁴ ኢየሱስ ከው ገሪው እን ኩልኩልስኖሰና ኣኻ ደገጊትልድ እንትነሰነሉ ድግምድ ነዋዮ ጋቢኹሎም። ⁵ ግርዋ አረሳ ጎዲሮ ዮ ሰገሩዅ ፈዱኻ ላው ጉግ ሸሊ ለቦ ዳድሱዅ ጀከልር እንቶ ለከሚኹሎም፡ ⁶ እሪው ተርኰሪል ለቡዅ፡በኰለሰነኻ ቁጣ ቢነዲን ኢዱዅ። ⁷ አሪው ኮዶ እክክማ ነበክል ለቡዅ ላት በኰልነዲንኻ እክክምድ ለላቕሶ ክሩዅ። ⁸ ላው ይኸ ትክያ ከረመንሊ ለቡዅ እማ በኰሉዅ ሊኽ እሽባ ፍሪቱዅ ነዋዮኻ ዋሳ እንቁዋ ሻዅክ ዋስኒ ዮ ክብሰ ጨርሑዅ። ⁹ ኒታለይቶታ “እና ድግም ኒን ውራ ዋሲሰት ወንቀርኑዅሉ”። ¹⁰ ኒኻ ነዋዮ ወንተስዅሎም “ስቱር ሲመር ጃሩዅሲ አርእና እንተድ ካያ እውስቶ ህምበኲ ኤሪውዳ ቋሉኑ ፈጠኖ መኸልትግኒን ዋሱኑኻ ፈጠኖ አስሃልድግኒን ድግምድ ግን አን ጋባዅሎም። ¹¹ እን ድግም ንስና ግን ፈደን ጃር ጋብግን፡ ¹² እን ጉግ ሸሊ ለብራ ፈደና እን ዋስውሲ ደአም ኤምኖ ደአንግኒን ሸይጣን እንቶ እንጋበት ናለበኪልድ ሸተፈሪት አርእሲስኲ። ¹³ እን ተርኰሪል ለብረሪኻ እን ጋበት ዋስኖ ፈርሓንቲ ደአም ስልል እንገው ግን ውረድ እን ጋበር ሰበትድ ማሕገድ ሃደፍ ዮሰነሎም ናእምነት ከለልደሪ አኽርነዲን ንርድ-ንርድ ከየነነኲ። ¹⁴ እን እክክመል ለብረሪ እን ጋበት ዋሰነኲ ደአም ና ሰውሄት እና ብሪል ርዝቕዲ ገዲ ተባብዲ ካያ አኽነዲን ናተምኔትነድ እን ፈደና ለለቕስሮ ክርደሪ ኔስ ተከቲ። ¹⁵ እን ትክያ ብሪል ለብረሪኻ እን ለበካ ሓላሉዅዲ ዋስኖ ከለብርኖ ተከዎውዲ ዓቕልድ ፍሪሰውሲ ቋልደሪ ግን። ¹⁷ ቲዃ ትብታዅ ¹⁶ እን ልጝሊ ትወው እን በርህሲ ቋልድኖ ቲዃስ ትልጭሰ ክብያ ኣካንሊ ገምድስተኲ ግራ ሕንኩል ዓንቀይሊ ዓሩቅሱቐትሊ ገምዳዅ ላዅ እላ። ¹⁸ እማ ኣዋሃብዲነ ዋስደነት ፈሀማ ውረድ እንሻዅድ ኰስትሮሉ ግን እን እንግጋዅዳ እን ህንበኩለ ያዅ ሲኽር ባሪስድኖሉ ግን። ¹⁹ ኒገነዲ ንሻንዲኻ እንትኑዅሉ ከዋ ብጅኽዳ አርድኖሉ ገረስኒ። ²⁰ ጉገነዲ ኩሻንዲ ቋልድኖካ ደንአብል ዓጦጠለንኲ እንኩኑዅኻ ይንዅሉ። ²¹ ኒ ደአም ይገነዲ ይሻንዲ እን ጋባ ጃርዲት ዋሰውድ ትክያዅል እርግሰውዲ ግን ዮ ወንተስኹሎም። ²² እናሓና ላግርጋ ኒታለይቶትዲ ትንኳትል ትዎ ጐናኒራ ዓይግ ቅብሊ ካርንን ይዅሎም ታንኳትዳ ፈርድኖ ተርሲኒዅ። ²³ ፈሩኑኻ ኢየሱስ ገንጁዅ እንሲን ወልወል ነፋፊቶራ ሒሊቱዅ እሲዅ ታንኳትኻ ዓቑድ እንተኽቶ ተርሲቲን እማ ማሕገድሊ አርስኑዅ። ²⁴ ስኩርኖኻ ዎ መምህር ድድንዅን አንገፍዲና ይኖ ጉድኑኹሉ።ኒኻ ጐ እን ወልወልዲ አፍሉትዲት ዋኺትዅሎም ድግግያ ዮ ሃናእ ሲኹሎም። ²⁵ እንሲን እንታ እምነት አዊል ህምባዅን ይዅሎም ናዋ ጓቑትኑዅ።ናሹር ናሹኻ ዓቑዲ ወላውልዲ ዋኺታዅ ናዋ ኒያዅድሰና ሃበው ኒን አውኒ አኾ ይስትጚነ ፈከርስኑዅ። ²⁶ እን ገሊለር ቅብሊ ህምባ ጌርጌሴዲ ብሪል ካርኑዅ። ²⁷ ብሪል ገመሰነኻ ላዅ ገሪው መጃኒን ሻዅ ግርዋ ድገትልድ-ፌ ሃደፍ ይዅሉ። ኒን ኒሰረንሲ ማሎ ኒልጝልድ ፌ ኤርፍፈል መንደርቱ ገሪ አውካት እሰዅ ግን። ²⁸ ወንተተረክ ሻኩሉ ሰጚነዲጛ ስንሲለትድኽር ዕቆትድኽር ልኩክሲ እንሸውኖ ተከዉኑሉ ሰጘነኲ ደአም ንሽውሲ ከተተቡ እን መጅኑን ከደንሲ ፍሮ ደረኩሉ ሰጘኲ። ²⁹ ኒን ኢየሱስቲ ቋለሰና ዋዕ ዮ ኒጃብል ገፍትእሱዅ ኢየሱስ ጃርዅራ ይዲ ኩዲ ውራ ህምባዅንና ሳደድግሪንለ ሺወኩንካ እንኩዅን ይዅሉ። ³⁰ ኢየሱስ “አውኒ ግን ኩስጙ” ዮ ወንቀሩዅሉ ኒኻ ገሪው መጃኒን ሻኽኖሉ እርግንነዲን “ለጌዎን ግን” ይዅሉ። ³¹ ናውኻ ሲኦልትል ዳገንጊንሎም ሺዊኒዅሉ። ³² ኒላ ጊሪል ገሪው ወንኪር ሸፈልስሮ እርግቲ ናዋ ኒምራድ አከን ናል ቱውድኖ ሺዊኒዅሉ ንኻ ይምራድ ግን ቱዋ ይኹሎም። ³³ እንሲን እንግርዊልድ ፍኖኻ ወንኪረል ቱኑዅ።እን ወንኪራ ቃሽልድ ገለብሮ ዓይግሊ ትጝኩሪርዶ ወሓጥስቲ። ³⁴ ምቃቕ ኒስ ቋልነሰና እግርኑዅ እን አኻ ወራትሲኻ ድገትል አተይኖ ወሪስኑዅ። ³⁵ እን ኮቁር እን ኣኻ ጋርሲ ቋልድኖ ኢየሱስትል እንትኑዅ።እን መጃኒን ፈዅሲሉ ግርወስ ኒታኲን ሰሮ ኒለበኪል ወንተሮ ኢየሱስር ገቢል ጀጋሕዮ ህምባዅሲ ቋልነሰና ጓቊትኑዅ። ³⁶ ናዋ ኒስ ተካ ወራትሲ ቋልኖ እን መጅኑን ፈዅሉ ግርዋኻ አዋኸ እቢረት ዱዊኹሎ። ³⁷ እን ጌርጌሴዲ አጓራ ናውክ እምንድክ ጓቊትንነዲን ኢየሱስቲ ናኮልድ ሺርዶሎም ሺዊኒዅሉ።ኒኻ ታንኳትድ ወንተሩዅ። ³⁸ እን መጃኒን ፌኹሉ ግርዋኻ ኒዲ አኽሮ ሺዊዅሉ። ³⁹ ኢየሱስ ደኣም “ፈሪ ኩልጝሊ ወንተርዶ እንጃር ኩድ እሰዅሲልካ ድሪሲ” ዮ ስብድዅሉ።ኒኻ እን ኢየሱስ እሰዅሲሉ ድሪሱ ንርትክ እንድገትክ ጅልዉዅ። ⁴⁰ ኢየሱስ ወንተረሰናኻ ከው ናውክ ጨበሩኑሉ እርግንነዲን ፈርሓትድ ከለብርኑኹሉ። ⁴¹ እናሓን ላግርዋ እን ጸሎት ልጝንሲ ተከወንታ ሰጛዅ ኢያኢሮስ ይስታዅ ኢየሱስር ሉኩኰል ለቦ ኒልጝሊ እንትሮሉ ሺዊዅሉ። ⁴² ውረድ ኒ ሽካ ለጛ አመሪሪ ኤኢ ላሪ ልጝልኢ ሰጘቲሉ።ንርኻ ክሪል ገእይሮ እርግቲ።ንርትል ፈሩኻ እን ከው ኒድክድ ከለልኖሉ ትንክቡኑሉ እርግኑዅ። ⁴³ ሽካ ለጛ አመራ እስረሪ ላ እዅናኻ ብር ፈስሩ ትልለውሲ ናትክ ንርማልሲ ድሂስሮ ላሪ ነፍዑላ ሰጘላ። ⁴⁴ ኒጉርበትድ እንትሮኻ ኒታዊኒ ቁጭንሊ ትምድሲቲ።እን ብርኻ ንርድ ንርድ ደውዩዅላ። ⁴⁵ ኢየሱስ “አውኒ ግን ተመዳዅለ” ዩዅ።ናውካ ይን አኽኒ ይኑዅ።ቤጥሮስ “መምህር ውራ ናውክ ከውከለብርኖካ ትንክቡኑካ አውኒ ተመድዅንለ ይሮ ወንቀርዳዅን” ይዅሉ። ⁴⁶ ኢየሱስ “አበዲ ላዅክ ተመዶለ ህምበኲ ውረድ ይልድ ሒል ፈትለ ዋስስትዅለ” ይዅሉ። ⁴⁷ እንሲን እን እዂን አርእስትረት አርእስቶላ ጓቑሲ ረድረድሩኻ ኒል ስኩርዶ ኒጃብል ለብሮ ናድካ ጃብል ውሪ ሰበትድ ተመድረትሉ አዋኽረኻ ንርድ-ንርድ እቢርደት ድዊቲሎም። ⁴⁸ ኒኻ “ኲአማነት እቢስኹኪ ፈሪ ሰላምድ ወንተሪ” ይኹላ። ⁴⁹ ነወዮ ጋቡኻ እን ጸሎት ኤደሪ ልጝልድ ላዅ እንቶ እንቲ ኩቑራ ክርቲ መምህርሲ ግምሽ ቂልሲስግ ይኹሉ። ⁵⁰ ኢየሱሳ ዋሰሶና “ጓቊትግ አረጊ እምኒ ካያ ደኤንቶ ግን” ይዅሉ። ⁵¹ እን ልጝሊ ገእየሰና ቤጥሮስዲ ያዕቆብዲ ዮሓንስዲ ንርኽርዲ ንርገነዲት ካያ ኒዲ ኤዶ ኤሪውልድ ላዅ ድኳ ኒዲ ቱውሮ ባርላ፡ ⁵² ናውካ ስሩኑላ እርግኑዅ፡ኒኻ “ስረገላ ገንጅሮ ህምበቲ ግን ግራ ክርዶ እልላ ይኹሎም። ⁵³ ናዋ ክርደት ኤርእንነዲን እንቋሪኒዅሉ። ⁵⁴ ኒኻ ናንድ ሻኾ “ኤኢ ጒ ይዅላ”። ⁵⁵ ንርኻ ንርፊዅት ወንተሮላ ንርድ ንርድ ከርተፍ ይሮ ጒቲ።ቊስታዅ እወላኻ ይኹሎም። ⁵⁶ ንርገነዲ ንርኽርዲ ገሪዅ ፈከርስኑዅ።ኒኻ ላዅድ ድኳ ድወግኒን ገቡዅሎም።