ለጘተር ፊዃ (ፊዃ-7) ሊኽ አደሪ እምነት ¹ እናሃበ ከውድ ናድክድ ኒጋብሲ ዋሲሶ ደምቢ ቅፍርናሆምትል ዔሩዅ። ² ኒልኻ ሊኽ አደራ ኒ እንከላዅ ኒ ንሽቃ ሽዅሽቶ ክሪል ገእዮ እርጉዅ። ³ ኒን ኢየሱስር ወራት ዋሱዅ እማ እንቶ እን ንሽቃስ እቢስሮሉ ዮ ሺዊድኖሉ በሄሊን አይሁዱሲ ፈስዅሉ። ⁴ ናዋ ኢየሱስትል እንትኖ ኒን ይና ከውሲ እንከላዅዲ፡ ⁵ ይና ጸሎት ልጝንሲ ትክሰ ገበራዅር ግን። እና ኒ ጀረባዅሲ እሲቶሉ ሺውነኩንካ እንኩንዅን ይኑዅሉ። ⁶ ኢየሱሳ ናዲ ብርፍዩዅ ልጝን ገቢል ገእዮሰናኻ እን ሊኽ አደራ እን እንከለውልድ እንሻቆ “ዎ ያደራ እንቲ ይልጝንሊ ቱቶ ወጀበለለ ግምሽድ ቂልስግ። ⁷ ንድ ግን አን ይላውድ እንትጋኽርካ ዋጅብ ዋስስተለለ ኒል ዋንትሩ ላ ጋባ ካያ ዪ ይንሽቃኻ እቢርዶለ ይኹሉ። ⁸ አን ይአወይሲ ሰየምሰውድ ስቈይሲ ሀባኽር ግን ይሱቈይስኽር ዓስከር ሻዅን ናልድ ላዅሲ ፈሪ የኩንሉ ኒኻ ፈረኲ እን ላዅሲ ይኸ ላዅ የኩንሉ ንኻ እንተሮኲ ይንሽቀስ ይኸ ኒስ እሲ የኩንሉ ንኻ እሰኲ ይኹሉ። ⁹ ኢየሱሳ ነወያ ጋብሲ ዋሰሰና ኒድ ፈከርሱዅ ትክሰ አላ ጋዶ ግን ኒን ዩዅ።እን ኒዲ እርጋ ከወል ግልጭ ዮኻ ንስጝ ኩጛ እምነት እስራኤልትል ድኳ አርሊ ይኹሎም። ¹⁰ እን እንሻቅሰው ልጝል ወንተርኖሰና እን ንሽቃ እቢሮ ዲዊኹሎም። ¹¹ ክሰሪት ናይን ይስትረሪ ድገትል ፈሩዅ ኒዲኻ ኒታለይቶትዲ ከው ገሪውዲ ፈርኑዅ፡ ¹² እን ድገር ገቢል ገእዮሰናኻ ግናደት ሙዅሮ ህምበው ሃደፍ ይኑዅሉ።ኒንኻ ላባይኦረሲ ላዅ ንርዅራ እርጉዅ።ኮቁር ገሪውኽር ንርዲ እርግኑዅ። ¹³ ይን አደራ ስርደሪት ቋሎሰና ሰኸንድቲሉ “ኤሪጊ ስረግ” ይዅላ። ¹⁴ ስኩርዮኻ ዓራትሲ ትምዲሲዅ፡እን ሙዅሮ ህምበዋ ደውይኑዅ ኒኻ “እንቲ ቁራ መንደላይ ኣን ጒ የኩንካ” ይኹሉ። ¹⁵ እን ቁራኻ ከርተፍዮ ከፍዩ ጋቢሮ ተርሲዅ፡ኒገነሲኻ ኡዉዅሉ። ¹⁶ እንሲን እን ኒል እርገው ናውክ ጓቊትኑዅ እማ “ጃር ኒከውሲ ቋሉዅሎም፡ይና ነበክል ነቢ በሄር ጉድዅልና” ዩኑ ጃርሲ ሐመድኑዅ። ¹⁷ ኒንኻ ኒልክ ይሁዳትልር ኒገቢል ህምባ ደገጊትልር ድሪስቱዅ። ¹⁸ ዮሓንሲኻ ኒአጋር እን አኻ ወራታትሲ ኒትክ ጂጝስቲኒዅሉ። ¹⁹ ኒኻ ኒ አጋርልድ ለጘት ሽጞ “ፈራ ኢየሱሱትል እን እንትሮ ህምባዅ እንቲማ እማ ኤሪዅ ጨበርኖ ህምብናኽር” የሉ ይኹሎም። ²⁰ እን እንሸቕሰዋ ኒል “እንትኖ ዮሓንስ ጠመቕደንታ እን እንትሮ ህምባዅ እንቲማ እማ ኤሪዅ ጨበርኖ ይዅካ” ይንዅሉ። ²¹ እንሲጛ ከላእ ምግዱራንዲ ምጨቱዲ መጃኒን ሻውዲጥ እቢሱዅ(ገሪው) ዓረፍስኽር ቋለነሰና ሃቢዅ። ²² እን እንሽቕሰውሲ “ፈራ ወንተራ እና ዋስድነውሰናኽር ቋልድነውሰናኽር ዮሓንሲ ድወሉ” ዓረፍ ቋለነኲ ደልጓሳን ጠለቕስኖ ፈርኑኲ፡በርሰቱ ለጭሔነኲ፡ጨማማን ዋሰነኲ፡ክሪው ጓነኲ፡ድቡራንድር ኪሰሪ ድውስተዅሎም እጝኩዅ” ²³ እን ይድ አንቈሪተጋዃ ሻትክ ግን የኩንኩም ይኹሎም። ²⁴ ንሽቕ ዮሓንስሩ ፈርነሰናኻ እን ከውድ ነዋዮ ዮሓንስሩዅድ ጋቢዅሎም “አው ከድንሊ ውራ ቋልትኖ ግን እንታ ፍና ሻምብቆራ ወልወልድ ነነይ ያዅማ? ²⁵ አበዲ ውራ ቋልትኖ ግን እንታፍና፡ሓራይርዲ ጀገራትዲ ሰሮ ህምባ ግርዋማ ቋልትኖ ተኩኩም እርግዅን፡አኽላ የኩንኩም ደበላንዲ ጀገርዲ ሰረው ልጝንቲ አስያምዅል ግን ናው ኤረርሰናዅ። ²⁶ እማ ውራ ቋልትኖ ፍድኑዅን ነቢራማ የዋ እለማ የኩንኩም እምንድክ ነቢትልድር ኩጙዅ። ²⁷ እን ኒድ “እናሓን ኩጃብል ጉግ ጠፍሕዳዅሲካ ፈሰኩንካ እንኩኹን ያዅ ክቱብ ኒድ ግን። ²⁸ ላዅ እኲነልድ እዃርሳዅ ግርዋ ዮሓንስ ጠመቅደንቲልድ ኩጛዅ ኒኾርስክ እላ የኩንኩም፡ደአም ሲመር ጃሩዅል ናድከልድ ሽጓዅ ኒልድ ኩጝርዕ ግን፡ ²⁹ ናውክ ዋሱሉ እርገዋ ከውዲ ወርኮታት ከለብረውዲ ዮሓንስር ጥምቀትድ ጠመቅስኖ ጃር ጉግ ሻትክ አኸት ኤምኑዅ። ³⁰ ፈሪሳንዲ ደአም ኒድ ጠመቅስነስ ጉሽንነዲን እን ጃር ሳዲሶሎም እርጋዅሲ ግምሽ እሲኒሉ። ³¹ እና አሰል ነስ አውዲ መጢስንሎም አውቲኻ ተካነኲ ይንሎም። ³² ኔን ዕርዲሪል እጝኩልኩልስኖ ናሹር ናሹ ሽጝስትጚስትነ ዕንድርሲ ጠዓምብኑዅልኩም እንትጛ ጎሊትድኒ ይኸ መውዒ እስኒዅንልኩም እንትጛ ስርዲኒ ይስትጘው ግናቲትሲ ተከነኲ። ³³ ኒንኻ ሳንስዓ ቋጋዅዲ ሚድ ጀኤጋዅዲ ዮሓንስ ጠመቅደንታ እንቱዅ መጃኒን ሻኲኻ ይድንዅሉ። ³⁴ ቋዅዲ ጀአዅዲ አዳሚንዱዅራ እንቱዅ እነሐን ድቡጥ ከላእ ቋንተዲ ጅኤንታዲ ወርኮታት ከለብረውዲ ዓገቡዲሲ ናማዳ ይድኖ ልኽዲኒዅሉ። ³⁵ ብሰር ድኣም ናድክድ ንርቁርድ ሸተክቲ ይዅሎም። ³⁶ ፈሪሳንልዳ ላዅ ኒዲ ቁሮ ሽጝዅሉ ኒልጝሊ ቱዎኻ ዓገሉዅ። ³⁷ ኒላ እንድገትል እዂና ዓገብሪ እንፈሪሳዊሪ ልጝል ቁሮ ዓገሎ ዋኔት ዋስርነዲን ከባተትሊ ዕጥር ቂራ ምልምል ሻዅሲ አድሮ እንትቲ፡ ³⁸ ኒጉርበትድ እንትሮኻ ኒሉኲ ገቢል አኽሮ ኒሉኩኲሲ እርጙሲ ጀረው ስሬክ ጠበስድቲሉ ንር ናንትድር ንርሽብክድ ሐሰስሩኽር ሰለምሩኽር ዕጥርድ ሸመትሩኽር እርግቲ። ³⁹ እንሲን እን ሽጛዅሉ ፈሪሳዊሪ ኒስ ቋለሰና ኒለበከድ ኒን ነቢ አከን እና ተመድረሪሉ ውራ ኣኽረት፡ኤውይረሪ ሓራምቁራ አኸረት ኤርእርድ ሻዅ ግን ዮ ልኺኹሉ። ⁴⁰ ኢየሱሳ ክልብርሰ “ዎ ስምኦን ላጋባ የሪካ ሻዅን” ይዅሉ፡ኒኻ ጋቢ መምህር ዩዅ። ⁴¹ “ላግርዋ ለጛ ግርወድ ላኹዳ አጝኳ ሊኽ ዲናር፡እን ሊጘርዳ አጝኩረጝን አዳኽዶሎም እርጉዅ። ⁴² ኒልድ ፈደየናዅ ብነሰናኻ ለጘርትክ ባሩኹሎም።ናልድ ኤዊን ግን እን ትክሰ እንከልዶሉ ሻዅ? ይዅሉ። ⁴³ ስምኦንኻ “እን ይት ተካኹድለታ እን ገሪው ባርስታዅሉዋ” ዮ ወንተስኹሉ፡ ኢየሱሳ “ትክስረ ወንተስሩዅ” ይዅሉ። ⁴⁴ እንሲን እን እዅነትል ግልጭዮ ስምኦንቲ “እንቲ እና እዅናት ቋልዳዅማ”፡ይዅሉ።አን ኩልጝሊ ትዎሰና ይልኩክሲ እንቃርድያ ዓቑ እውለለ ንርኻ ይልኩክሲ ንርእሩጝድ ጠበስድሮ ንርሽብክድ ሐሰስቲለ፡ ⁴⁵ እንቲ ሰለምለለ፡ንሪኻ ትወንትልድ ይልኩክሲ ሰለምኒልድ ባርድላ። ⁴⁶ እንቲ ዴድድ ይኣኾርሲ ቋስለለ፡ንርኻ ቅዲት ሽርውድ ልኩክሲ ሸመቲለ፡ ⁴⁷ ንድኻ ገሪዅ እንከልድነዲን ንር ዓገብ ከላእ ባርስቱዅላ የኩንካ እን እቕቱ እንከላኹዳ እቕቱ ባርስቱዅሉ” የኩንካ። ⁴⁸ ንርትኻ “ኩዓገብ ባርስትዅኪ” ይዅላ። ⁴⁹ እን ኒዲ ዓገሎ እርገዋ ናሹር ናሹ ዓገብሲ ባርዶ ገረሳዅ ኒን ኤውኒ ግን ይስትጚኒዅ። ⁵⁰ ንኻ እን እዅነት “ኲ ኣማነት ግን ኩት ደኤንዳኹ ፈሪ ሰላምድ” ይኹላ።