ወልተር ፊዃ (ፊዃ-6) ¹ ሰንበርድ ኪሽጛ ነበክድ ደኲኑኻ ኒታለይቶት ሱር ስክሙሲ፡ቀንጠሺነክ ሓሰይኖ ቊኑ እርግኑዅ። ² ፈሪሳንልድ ላው ቋልነሰነሎምኻ “አበዲ ውሪዅ ሰንበርድ እስተጋወራት እስደናዅን” ይንዅሎም። ³ “ኢየሱስካ ውራ እንዳዊት ከአርተሰና ኒጨርዲክ ውራ ሃበት ኤርእግድናኽርማ? ⁴ ልጝን ጃሩዅል ቱዎ አቕሸት፡ካያ ቊድኖ ገረሰነው ኤሪዋ ቋግነው ሳንስዕ ቊርባኑሲ ኤዶ ቈት፡ኒጨርድር እወትሎም፡አምበብድግድናኽርማ” ዮ ወንቀርዅሎም። ⁵ እማ አደሚንዱዅራኽር ሰንበር አደራ ግን፡ይዅሎም። ⁶ ኤሪ ሰንበርድ ይኸ ጸሎት ልጝሊ ትዎ መሄርዱ እርጉዅ፡ላዅ ኒናን ላዉዅ ኢዳዅ ኒል እርጉዅ። ⁷ ከታበንዲ ፈሪሳንዲኻ ሰንበርድ እቢሰንሉ ሸከይድኖለ ይኖ አትቋመቱኑሉ እርግኑዅ። ⁸ ኒኻ፡ናለፈክ ሃመትሲ ቋልነዲን እን ኒ-ናን ኢዳዅሲ “ጒ ነበክል ደው ዪ” ይዅሉ፡ኒኻ፡ጔ ደውዩዅ። ⁹ እንሲን፡ኢየሱስ “እንደ ላሪ ወንቀርየኩም ሰምበርድ ትክያዅ እስነማ እማ ሙቊላ እስና፡ርሕ ኩነማ እቢስና ኪዳዅን፡” ይዅሎም። ¹⁰ እንሲን ኒት ኬለቦ፡ዲቢቶ ህምበውሲ መኻኸልቶ እን ግርወስ “ኩናንሲ ጠለቒ” ይዅሉ።ኒኻ እንዳሃቢዅ እን ኒናንኻ እቢሩዅ። ¹¹ ናዋ ሓሩቐትድ ሓው ይኖ ኢየሱስቲ ውራ ሃበነትሉ አርእምብስቲዅሎም፡ውራ እሰነትሉኻ ኮዶ ጚኒዅ። ¹² እንሰከር ግርጋትላ ጸሎት እሲሮ ጊሪል ፊዅ ቂርስካ ጃርሊ ጸለዩ ኪዅ፡ ¹³ ብራ ክሶሰና እን ኒታለይቶትሲ ኒል ሽጝዅሎም፡እማ ናልድ ሽካ ለጛ፡ፍሪሩዅ። ¹⁴ ናዋ እን፡ቤጥሮስ ዮ ሽጛዅ፡ስምኦንዲ ኒዳን፡እንድርያስዲ ያዕቆብዲ ዮሓንስዲ ፍሊጶስዲ፡በርተሌሞስዲ፡ ¹⁵ ማቴዎስዲ ቶማሲ ያዕቆብ ኢልፍዮስዅራዲ፡እንቀናእ፡ይስታዅ ስምኦንዲ፡ ¹⁶ ይሁዳ ያዕቆብዅራዲ እን ደኩሶ እዋዅሉ ይሁዳ አስቆሮታዊራዲ ግን፡ ¹⁷ ናዲ ገሞኻ ሸኪል፡ኒታለይቶትዲ ጠጠው ዩዅ፡ከው ገሪው ይሁዳትልድር ኢዮሩሳሌምትልድር፡ጥብርያዶስር ዓይግ ሸልላትልድር፡ሲዶናትልድኽር ዋስድኖሉኽር ናሽዅዲልድ እቢስሮሎምኽር ኒል እንትኑዅ። ¹⁸ እን፡መጃኒንድ ሳደድሱ ሰጘውስኽር እቢስዅሎም። ¹⁹ ኒልድ፡ሒል-ፌ፡ናትክ እቢሱ ሰጚነዲጛ ከው ናውክ፡ተመድኖሉ፡ሰውሁኑ ሰጘነኲ። ²⁰ ኒታለይቶትሲ ተጝሰ፡ማኻልቱኽማ ነዋ ዩዅ “እንትን፡ድቡራን፡ሲመር ጃሩዅ እንተድ ግን እማ፡ሻትካን፡ግን፡እንትን፡ ²¹ እንትን ናን፡ካአርትደናኽር ብትኖ ግን እማ ሻትካን ግን፡ ²² እንትን ይሰበትድ ከው እንጠረነንኩምር፡ጎሰሰንክምር፡ጃኸነንኩምር እንታሱጙሲኽር ጂብደነንኩም፡ሻትካን ግን እንትን። ²³ እነሓን ዓስተርሊ እንተበና ገሪዅ አኽሮ ግን እማ ፈርሓኽር ነገሳኽር ውረድ ናእኽልር ነቢታትሲ እንደሃቢነ ጀረብዱኑሎም ሰጘነኲ። ²⁴ እንትን ገዱኻ እንታፈርሐት ድጙድኑዅ እማ አጀዋ። ²⁵ እንትን ናን ብትደናኽር ከአርትትኖ ግን እማ አጀዋ፡ ²⁶ ናውክ ከው ጀንጀነነንኩም አጀዋ፡ውረድ፡ናክልር እን ነቢታት ብኑሲ እንደሃቡኑሎም ሰጘነኲ። ²⁷ አን ደአም እና ነት ዋስደናኽርሲ እንጠረውሲኩም እንከላ እን እንጠረውሲኩምኽር ትክያዅ እሰሎም የኩንኩም። ²⁸ እሸውሲኩምር ገውራ እን ጃኸውድኩምር ጸሎት እሳ። ²⁹ ቃሽሊ በርጋዓዅሲካ ሊጝር ቃሽሲኽር ስኲሲሉ፡ኩታዊይነስ ወረራዅሲካ መስደርየትሲኽር ገብግሉ። ³⁰ ሺዌዅድካ እዊ ኩማልሲ አዳዅሲካ ወንተሲለ ይግሉ። ³¹ እን ከው እንተድ እሲሮኩም ጀረብደናዅሲ እንትጝር ኒሰና እሰሉ። ³² እን እንከላዅሲኩም እንከልደነን ላሪ በና ሻኽድኒ ውረድ ዓገቡኽር እን እንከላዅሲሎም እንከለነኩለ። ³³ ትክሳዅሲኩም ትክስደነን ላሪ በና ሻኽድኒ ዓገቡኽር እንዳሃበነኲ። ³⁴ ወንተስሮኩም ሳድደናዅድ ኣዳኽድደነን ላሪ በና ሻኽድኒ ዓገቡኽር እን ወንተስሮሎም ሳደናዅድ ኣዳኽደነኩሉ። ³⁵ እንትን ድአም እንጠረውሲኩም እንከላኽርሎም ትክሳኽርሎም፡ወንተስሮልና ግን ይድኖ አደኽድጋ እንተ በና ገሪው አኽሮኩም ጃር ቁር አኽትኖ ግን ውረድ ኒ እን ሓመድደገውድር ምቚልድር በኪት ግን። ³⁶ እንታኽር ጃር ሳኻንታንታ ግን እማ እንትጝር ኒሰና አኻ። ³⁷ ፈረድጋ ፈረድ-ስግድኒን ይኸ (ደለምጋ ደለምስግድኒን) ኩጋ ኩውስትግድኒን ብሕልያ ብሕል ይስትሮኩም። ³⁸ እዋ እውስትሮኩም ግን ይኹሎም። ³⁹ ነዋ ዮኻ እና ድግም ኒስ ጂጝስቲኹሎም “ዓረብ ዓረብሲ ታተ ይሮ ገረሳዅማ፡ለጘክ ጎቑል ለበኒ ማ? ⁴⁰ ኒመምህርስጝ ኪዳዅ መሄርሳዅ ላዅ እላ ላዅክ ትክሰ መሄርሰን ድአም ኒመምህርኮት አከኲ። ⁴¹ አበዲ እንቲ ውረድ ግን ኩዕሊ ህምባ ኩርማድሲ ቋል ግሪ እን ኩዳን ዕሊ ህምባ ቀበርሲ መኻልትራዅን። ⁴² እን ኩዕሊ ህምባ ኩርማድሲ ቋልግሪ አዋሃብረ ግን፡እንኩዳንሲ ግጂ ኩዕሊ ህምባዅ ቀበርሲ ፍድያካ ይራዅንሉ።ነበንታ ቡጛ ሰልፍ እንደ እንጫ ኩዕል ህምባዅሲ ፍዲ ኒደምብኻ ትክስረ ቋልዶ እን ኩዳንዲ ዕሊ ህምባ ቀበርሲ ፍድቶ ግን። ⁴³ በዳናን ፍርር ፍሪትረሪ ካና ትክይረሪ ወሪ ትክያ ፍርር ፍሪትረሪ ካና በዳኒ እልላ። ⁴⁴ ካና ንርፍርርድ አርእስተቲ ውረድ በለስ እክክመልድ ቀንጠሽትሮ ገረሰላ፡ኒውክ ካና ኒፍርርልድ ፈረግሰኲ፡ ⁴⁵ አብ ለበኪ እንተኽልድ ጋበሰና ኒሰና ግርዋ በኪት ኒ እንድባ ትክያዅልድ ትክየው ፍደክ።ግርዋ ምቅላኻ እን እንድባ ክያዋዅልድ ጋብ ክያወው ፍደኲ። ⁴⁶ እን አን ያዅሲኩም እሰግደናኽር አኽድኖ ደምቢ፡ ውሪዅ ግን ይናአደራ ይናአደራ ይድኖ ሽጝደናዅንለ። ⁴⁷ እን ይል እንተራዅር ይጋበት ዋሶ ትክሳዅር አውቲ ተከት ድውየኩም። ⁴⁸ ላዅ ኒልጝ ገበርዶ ዮ ሸሺል ጐቕሲ ትክሰ ግኽደ ሸሺል ገበራዅሲ ተከኲ፡ኩራ እንቶ እን ልጝሲ ትንክበኩሉ ደአም ትክዮ ገበርሳዅ አኽነዲን ውልቅድሮሉ ገረሶላ። ⁴⁹ እን ይጋበት ዋሶ ትክያዅሊ እርግሰጋዅ እን ግርዋ ኒልጝንሲ ቁሺል ገበራዅሲ ተከኲ ኩራ እንቶ እንልጝንሲ ትንክቦሰነሉ ንርድ-ንርድ ለብኲ ኒለባኻ ዓቕትራሲክ ክያዋዅ ግን።