ሽካ ሰዀተር ፊዃ (ምዕ. 18)

1 ኢየሱስ ነስ ጋበ ደምቢ ነታለይቶትዲ ወረባ ቄድሮስቲ ካሮ እን ጀርዲን (ጭንድቕ) ህምባ አካንሊ እርጉዂ እማ ኒታለይቶትዲኻ ኒል ትዉዂ፡፡ 2 ኢየሱስ ኒታለይቶትዲ ገሪ ወክት ኒል ፈሩ ሰጚነዲን እን ደኲሶ እዋኹሉ ይሁዳ እን አካንሲ አርኡሉ ሰጞኲ፡፡ 3 ይሁዳ ይኽ ቲዃ ሻኽውዲ ስላሕ ደበልተውዲ ከላእ ዓስከርዲ አቕሸታ በህሊን ንሽቕዲ ፈሪሳንዲት መርሔሎም እንቱዂ፡፡ 4 ኢየሱስ እን እንተራ ጅርበትሲ ኤርኡ እርግነዲን፡ ኤውቲ ጀረብደናኹን እንኩድኑኹን፡ ዮ ወንቀሩኹሎም፡፡ 5 ናዋ ኢየሱስ ናዝራዊረስ ጀረብነኩን ይኑኹሉ፡፡ ኢየሱሳ አን ግን ይኹሎም፡፡ እን ደኩሶ እዋኹሉ ይሁዳኽር ናዲ እርጉዂ፡፡ 6 ኢየሱስ አን ግን! ዮሰነሎምኻ ወንተርኖ ብሪል ሐጨፍስኑዂ፡፡ 7 ሐዲስድ ኮዶ ኤውቲ ጀረብደናኹን፤ ይኹሎም፡፡ ናዋ ኢየሱስ ናዝራዊራስ ይኑኹሉ፡፡ 8 ኢየሱሳ እንሲን ውራ አን አኽት ድዊልመኩም፤ ይት ጀረብደናኽር አክደነን ነስ ባረሎም ይኹሎም፡፡ 9 ኒንኻ እን እውረውልድለ ላኲ ድኳ ድደላ ያዂ ተመምሮር መታን አኻዂ ግን፡፡ 10 ስመዖን ጴጥሮሳ ሴፍ ዲውሲዂ እማ አቅሸታ በህሊና ገንሺነስ ሴፍሲ ፍዶ ጠዓምብኹሉ፡ እንቁዋ ላውሪትኻ ከልተምኹሉ፡፡ እን ገንሺ ሱጛ ማልኮስ ይስቱ እርጉዂ፡፡ 11 ኢየሱሳ ቤጥሮስቲ ህምቢ ኲ ሴፍሲ ኒ-ልጝሊ ወንተሲሉ፡፡ እን ይኽር እወለ ዋንጨስ ጀኤጋኽርሉማ ተኪኹንካ፤ ይኹሉ፡፡ 12 እንሲን እን ዓስከርዲ ሲሕ አደረዲ አይሁዲ ኤቅሸትዲ ኢየሱስቲ ሻኹኖ እንሸውኑኹሉ፡፡ 13 ሰልፍ እን እንሰካር አመሪል አቅሸታ በሄር እርጋዂ ቀያፋር አንሺን ሃናትላ አድኑኹሉ፡፡ 14 ቀያፋኻ ከዋ መታን ላግርዋ ክረን ኪደኲ ዮ አይሁድሲ ኰድጚሰዂ ግን፡፡ 15 ስመዖን ጴጥሮስዲ እን ኤሪ ታለይቶረድኻ ኢየሱስቲ ለሄክንኹ፡፡ እና ታለይቶራ ኒን ኣቅሸታ ብሄርድ አርእስታዂ ኣኽነዲን ኢየሱስዲ ኬለብል ቱዉዂ፡፡ 16 ጴጥሮሳ መራብ ገቢል ከደን ከብቲዂ፡፡ እንታለይቶራ ኣቅሸታ በሄርድ ኤርእስታዂ ዓንቂ መራብሲ ተከውረሪት ጋቢኹላ እማ ጴጥሮስቲ ቱሱኹሉ፡፡ 17 እን መራብሲ ተከውረሪኻ ጴጥሮስቲ ቋልደሰነሉ እንትኽር ታለይቶት እና ግርዊውልድ ኣኽግራኽርማ፤ ይቲሉ ኒኻ ኣኽሊ ዩኹላ፡፡ 18 እንሲን ገሪዂ ብርድ እሰ እርግነዲን እን ንሽቅዲ ገንጂንዲ ላኻ ሻኽስኖ ካውሩኑ እርግኑዂ ጴጥሮስር ናዲ ካውሩ እርጉዂ፡፡ 19 እን ኣቅሸታ ሲምኻ ኢየሱስቲ ኒታለይቶትዲ ኒምህሮዲር ሰበትድ ገሪዂ ወንቀሩዂሉ፡፡ 20 ኢየሱሳ ኣን እርድሊ ትብታንድ የው ሻኽሊ ዲማ ኣይሁድ እንኩልኩልስናዂ ቤተ መቅደስሊኽር ክንሲኹን ግራ ላሪ ድኳ ስቱርድ ጋቢሊ፡፡ 21 ይት ውሪዂ ወንቀርዳኹንለ እን ኣን ጋቡሎም ሰጞውሲ ውራ ዩሎም ሰጞት ናት ወንቀሪሎም፡፡ ናው እን ኣን ጋቡሎም ሰጞውሲ አርእኑዂ ዮ ወንተስኹሉ፡፡ 22 ነስ ዋሰሰና እን ኒል እርገውልድ ላ ገንጂና እንቲ ኣቅሸታ ሲምድ ነስ ይሮ ወንተስራኹን ዮ ቃሺ በረግዕኹሉ፡፡ 23 ኢየሱሳ ምቁላ ጋበኽር ኣከን ይምቍልናርሲ ድዊለ፡ ትክያዂ ጋበኽር ኣከን ዳኣም ውሪዂ ጣዓምብራኹንለ ይኹሉ፡፡ 24 እንሲን ሃናንያ ኢየሱስቲ እንሸውሶ ዋኑ ኣቅሸታ በሄር ቀያፋትል ፈሱኹሉ፡፡ 25 ስምኦን ጴጥሮስ ደው ዮ ካውሩኻ እንቲ እን ኒታለይቶትልድ ኣኽግራኽርማ፤ ይንኹሉ፡፡ ኒኻ ኣኽሊ ዮ በረዩዂ፡፡ 26 እን ጴጥሮስ ኒ እጝቁወስ ቀረጫኹድ ኒ ወንዳ ኣካዂ ገንጂናኻ ውራ እንደራ እን ጭንድቅሊ ኒዲ ቋሊመካ ይኹሉ፡፡ 27 ጴጥሮስ ኮዶ ሲዀር ወክት በረዩዂ ንርድ ንርዳ ዲርዋ ኳዪዂ፡፡ 28 ኢየሱስቲኻ ቀያፈትልድ ፈረድስሮ ዲቢል አድንኹሉ ብርክስጛኻ እርጉዂ ናው በጋ ፋጅኺዂሲ ቍድኖ አኽነውድ ዓማቅርግኒን ዲቢ ልጝሊ ትውኒ፡፡ 29 እንሲን ጲላጦስ ናል ፊዂ እማ እናግርወስ ውረድ ግን እንትን ሸከይደናኹሉ፤ ይኹሎም፡፡ 30 ናዋ ምቑላ እሲጋዂ ኣከንማ ኩልደኲስንድሉ ሻኽናኽር አኽኖ ይኑኹሉ፡፡ 31 ጲላጦሳ እንተላውድ ኤድኖ እንታ ፍትሕሰነክ ሃብዲነ ፈረደሉ ይኹሎም፡፡ 32 ኢየሱስ አወያ ክራ አርዶ አኸት ጋበ እርጋዂ ተመምሮር መታን፡ አይሁድ፡ ላዂሲ ድኳ ኩኖ አከለና ይንኹሉ፡፡ 33 ጲላጦስ ዲቢ ልጝል ወንተሮ ኢየሱስቲ ሽጞ አይሁድ ንጉሥማ እንቲ ይኹሉ፡፡ 34 ኢየሱሳ እና እንቲ ይረው ኩላውድማ እማ ኤሪው ይሰበትድ ይነውካ ክምረ ዮ ወንተሱኹሉ፡፡ 35 ጲላጦሳ ውራ ኣን አይሁዳማ ኣኾ፡ ኩከውዲ አቅሸታ በሄሊንዲ ይል ሸከይኖካ ህምበው ውራ ሃብረግን፤ ይኹሉ፡፡ 36 ኢየሱሳ ይሕክም እና እርድ ንዱዂ አኽላ፡ ንዱዂ አከን አይሁድ ሻኽግኒንለ ይዓስከር ገደይስድንድለ ሻው ግን፡ ደኣም ይሕክም ንዱዂ አኽላ ይኹሉ፡፡ 37 ጲላጦሳ እማ እንቲ ንጉሥ ግን፣ ይኹሉ፡፡ ኢየሱስኻ አን ንጉሥ አኸት ውራ እንትኽር ኩላውድ ይረኲ እጝኩላማ፡፡ አን እምንሲ ሳምዕድያ ግን አን እዃርሳዂ፡ ኒመታጝር ግን እና ብሪል አን እንቶ ህንባዂ፤ እምንዱኹካ ይጋብሲ ዋሰኲ ይኹሉ፡፡ 38 ጲላጦሳ እምንኻ ውራ ኒ ግን፤ ይኹሉ፡፡ እንደዋዮኻ አይሁድሊ ፊዂ ኮዶ እማ ኣን እና ግርዋ ኒል ላሪ ከታ አረረኩን እልሊ፡፡ 39 እንትን ደኣም ፋጅኻድ ላዂ እንሸውሳዂ እንኪየልኩም እንታ ክኒ ግን እማ እና አይሁድ ንጉሥሲ እንክየልኩም ጀረብደናኹማ፤ ይኹሎም፡፡ 40 እንሲን ናውኻ ሐዲስድ ኒስ ጀረብነሊ ባርባንቲ እንኪልና ዩኑ ዓልበጥኑዂ፡፡ ባርባን ደኣም ላዂ ግርዋ አጎበንታ እርጋዂ ግን፡፡