1 ንድ ደምቢ ጲላጦስ ኢየሱስቲ ቀለጢሲኹሉ፡፡ 2 እን ዓስከርኻ እክክም ለከሚነ እኺርኺርሊ ለዋለይኖ ሻኺስኖ አኾርሊ ገምድኑኹሉ፤ ኮዶ ታዊና ሰራዂስኽር ሰስኑኹሉ፡፡ 3 ኒል ሱኩርኖኻ ዎ አይሁድ ንጉሥ! ደባንማ ውራ ህምብራኹን ዪነክ ገሺ ብርግዕዱኑሉ እርግኑዂ፡፡ 4 ጲላጦስ ሐዲስድ ዲቢልድ ከደን ፈ እና ግርዋ ኒል ላሪ ከታ ድኳ አርገትሉ አርእትኖ እናሐን ከደንሊ ፍደኩንልኩም እንኩኹን ይኹሎም፡፡ 5 እንሲን ኢየሱስ ሻሽ እክክማዂዲ ታዊና ሰራዂዲት ሰሮ ከደንሲ ፊዂ፡፡ ጲላጦሳ እናሐን እን ግርዋ ይኹሎም፡፡ 6 አቕሻታ በሄሊንዲ ናገንጂንዲ ቋልነሰነሉ ካኒል ከርከርዲሉ! ካል ከርከርዲሉ! ይኖ ዓልበጥኑዂ፡፡ ጲላጦስኻ እንተላውድ አድኖ ከርከርደሉ አን ወላ ላሪ ካታ ድኳ አርሊሉ ይኹሎም፡፡ 7 አይሁድኻ ይን ፍትሕ ሸኽንኹን፡ እን ይናፍትሕሰናኻ ኒሹት ጃር ኹራ እሲነዲን ክርዶ ህምበኩሉ ይኑኹሉ፡፡ 8 ጲላጦሳ ነስ ተካ ጋብሲ ዋሰሰና ገሪዂ ጓቍቱዂ፡፡ 9 ሐዲስድ ዲቢል ወንተሮኻ ኢየሱስቲ እንቲ አዊልድ ግን፤ ዮ ወንቀሩኹሉ፡፡ ኢየሱሳ ላሪ ድኳ ወንተስለሉ፡፡ 10 ጲላጦስ ውራ ይዲኽርማ ጋበላ፡ አን ከርከርድየካኽር እንኪየካኽር ሒል ክሜት ኤርእላማ እንቲ፡ ይኹሉ፡፡ 11 ኢየሱሳ አዋዂልድ እውስታኹካ አኾ ግራ እንቲ ይአወይሲ ላሪ ሕክም ዋንተጊትካ፡ ናንኻ እን ይትደኲሶ እዋኹካ ሐጢአት በሄር ኮት ህምበኩሉ ይኹሉ፡፡ 12 ኒድ ደምቢ ጲላጦስ እንክሮሉ ጀረቡ እርጉዂ፡፡ ደኣም አይሁድ ኒስ እንክረዶክ እንቲ ቄሳርዲ ሻሙዂ አኽላ፡፡ ኒሹት ሰየምሮ ጀረባዂ ኒውክ ቄሳርዲ አባይ ግን ይኖ ጨርሕኑዂ፡፡ 13 ጲላጦስ ነስ ተካ ጋራትሲ ዋሰሰና ኢየሱስቲ ከደን አዶ ፊኹሉ እማ ሊጠስትሮትል ዕብራይስጢሲኻ ገበታ ይስታ አካንሊ ኒቂጦራ ፍርዱኹል ከፍ ዩዂ፡፡ 14 እን ወክት እንዲን ፋጅኻ ደለምድና ግርገፍ እርጉዂ፡፡ እን ኤሁድስኻ እናሐን እንተ ንጉሥ ይኹሎም፡፡ 15 ናውኻ እንደራ ይሉ! እንደራ ይሉ! ከርከርደሉ! ዩኑ ጨርሕኑዂ፡፡ ጲላጦስኻ እና እንታ ንጉሢ ከርከርድየሉማ፤ ይኹሎም፡፡ አቅሸታ በሄሊንኻ ይን ቄሳርቲ አኽገት ኤሪ ንጉሥ ሻኽኒ ይኖ ወንተስኑኹሉ፡፡ 16 እንሲን ኢየሱስቲ ከርከርድድኖሉ ናናንተል ደኩሶ እዉኹሎም፡፡ 17 ናውኻ ኢየሱስቲ ጲላጦስትልድ ከለብርኑኹሉ፡ ኒመስቀል ሙኹሮኻ ‹‹ቀራንዮ›› ዕብራይስጢሲኻ ‹‹ጎልጎልታ›› ይስታ አካንሊ አኽራሲክ አድኖ ፈርኑኹሉ፡፡ 18 ኒልኻ ለጛ ስኳንሲ ላዂሲ ኒላው ገፍድ ላዂስኻ ኒ ሸንገብድ ኢየሱስትኻ ናነበክል ከርከርድኑኹሉ፡፡ 19 ጲላጦስ ክቱብ ከተቦ ኒአወይሲ ጠልሲኹሉ፡፡ እን ክቱብኻ ፡ ኢየሱስ ናዝሬትሩዂ አይሁድ ንጉሥ ያዂ ግን፡፡ 20 እን ኢየሱስ ከርከርሳ አካን ድገር ገቢል አኽነዲን ገሪው አይሁድልድ እን ክቱብሲ አንበብድኑኹሊ፡፡ እን ክታበትኻ፡ ዕብራይስጢስኽር ላቲንድር ግሪኽድር እርጉዂ፡፡ 21 ንድ እን አቅሸታ በሄሊን ጲላጦስቲ ውራ ኒላውድ ግራ አይሁዳ ንጉሥ ግን አን ኒ ዩ እርጋዂ አይሁዳ ንጉሥ ግን ይሮ ከተብግ ይኑኹሉ፡፡ 22 ጲላጦስ አን ከተባዂሲ ከተቦ ህምበኩን ይኹሎም፡፡ 23 እን ዐስከርኻ ኢየሱስቲ ከርከርድነሰነሉ ኒሰረንሲ አድኖ ሰጃትል በኒነሎም ላኹክ ኒበና አዱዂ፡፡ እን ቀሚሽኽር ኒሰና፡ ደኣም እን ቀሚሽ አዀርልድ ልኩል አኽራሲክ ንርውክ ሰፍጣ የናዂሲክ እርግለላ፡፡ 24 ኰድጚነኻ ንሂታ ገእያራዂሊክ ገእይቶ ቅሻ ማልንንላ ይስትጚኑዂ፡፡ ኒንኻ እን ይሰረንሲ በንስጚኑኹሎም ይቀሚሽሊኻ ቅሻ ማልኑዂ ያዂ ክቱብ አኽሮር መታን ግን ዓስከር ነስ ናው ሃቢነዂ፡፡ 25 እን ኢየሱስ ከርከርሳኹሉ ኒ ገቢል ኒገነዲ ማርያም ኒሐልቲ ቀለዮጳ ቍዲ ማርያም መግደላዊትዲ ደው ይኖ እርግኑዂ፡፡ 26 ኢየሱሳ ኒገናዲ እን እንከሉ ሰቍዂ ታለይሮራዲት ኒል አንጦጠለውሲ ቋሎሰና፡ ኒገናት እንቲ እዂና እነሐኒ ኩዂራ ይኹላ፡፡ 27 እንታለይቶራስኽር እነሐን ኩገና ይኹሉ፡፡ ኒኻ እንሲንትልድ ተርሰ ኒልጝል አዱዂላ፡፡ 28 ንድ ደንም ኢየሱስ ኒውክ ድጙስተት ቋሎሰና እን ክቱብ ተመሮር መታን ስቋንቱኹን ዩዂ፡፡ 29 ኒልኻ ጉና ሚድ መንሸውድ እንተኻዂ እርጉዂ እንሲን እን ጉነስ ሽነክሪል እንሸውኖ ኤብል ስኩስኑኹሉ፡፡ 30 ኢየሱስኻ እንሚድ መንሸውሲ ታሞሰና ‹‹ ተመሙዂ ›› ዩዂ፡፡ አኾርሱኻ ሉም ሲዂ ኒፊኹትኻ ፊቲ፡፡ 31 በዓሊ ደለምኒ ግርጋ እርግነዲን እን በድናት ኒልእርግጊን ውረድ እን ሰምበር በዓል በሄር እርግነዲን ልኩክሲ ክርጚነ ኒልድ ያዕይድኖሎም አይሁድ ጲላጦስቲ ሺዊኒኁሉ፡፡ 32 እንሲን ዓስከር ፈርኖ እን ኒዲ ሰቀልሶ እርገውሲ ለጞርትክ ልኩኲሲ ከሪኒኹሎም፡፡ 33 ኢየሱስትል እንትነሰና ክሮ ህምባዂሲ ቋልነሰና ልኩኩሲ ከሪኒሉ፡፡ 34 ደኣም ላዂ እን ዐስከርልድ እንሽኽድ ስምጥሲ ሰቡኹሉ ንርድ ንርድ ብርዲ ዓቍዲ ፊዂ፡፡ 35 እን ኒዕልድ ቋላዂ እንትን አምንትኖር መታን ሸረኲ እጝኩዂ፡፡ ኒሸርናኻ እምን ግን፡፡ 36 ኒጛ እን ኒ ናሽሽልድ ላሪድኳ ከረኒሉ የዂ ክቱብ ዱጙስትሮ ኣኻዂ ግን፡፡ 37 ኤሪ ቆል ክቱቡዂ ኮዶ እንሰብናዂሲሉ ማኻልትድኖ ግን ያዂ ህምባኲ፡፡ 38 ንድ ደምቢ ዮሴፍ አርማትያስሩዂ እን ኣይሁድሲ ጓቍቶ ትብታንድ ኢየሱስር ታለይቶራ እርጋዂ ጲላጦስቲ ኢየሱስር ግናደትሲ እውሮሉ ሺዊኹሉ ጲላጦሳ አጃ ይኹሉ እማ ፈሮ ኢየሱስር ግናደትሲ ኣዶኹሉ፡፡ 39 እን ላዶን ኢየሱስትል ቂር እንታዂ ኒቆዲሞስ ቅዲት ሰኾረጝንዲ ላዂ ኪሎራ ኣከው ከርበራዲ ጫብርዲ ሕበርሰ ህምበው አዶ እንቱዂ፡፡ 40 ኢየሱስር በድንሲ አድኖኻ እንአይሁድ ክኒርሰና ቅዲትድ ሸመትኖ ደበላን ሐዲስል ገነድንኹሉ፡፡ 41 እን ከርከርሶሉ እርጋ ኣካንሊኻ ጭንድቅ እርጉዂ፡፡ ኒላ ላዂ ኣዳም ደብቲጋዂሉ ጎቕ ሓዲስ እርጉዂ፡፡ 42 በዓል ስኲሮ እርግነዲጛ እን አርብ ታኸት እርግነዲን ኢየሱስቲ ኒል ደቢኒኹሉ፡፡