1 ኢየሱስ ነስ ዮ ጋበ ደምቢ ዕልልሲ ዓስተርሊ አኽታሲክ ብርሰ ዎ አበ! እናሐን እን ወክት ገእዮዂ፡፡ እኹራ ሳቢሮካር መታን ኩእኹረስ ሳቢሉ፡፡ 2 እና እውረውሲሉ ናትክ ዲመዳይ መናብረት እውሮሎም መታን ኒት ከዋ አወይሲ ሰየምድሩኹሉ፡፡ 3 ዲመዳይ መናብረትኻ ጃር ላዂ ካያ እንቲ እምን አኽረትር እን እንቲ እንሸቕራዂ ኢየሱስ ክርስቶስ ቲኽር ኤርእና ግን፡፡ 4 እንቲ እውራ ጋርሲ ተመምዶ እና ብሪል ጀንጅንኹንካ፡፡ 5 እንቲኻ ኦ አበ! ናን እን እርድ መሄድስጊ እንኩል ሰጛኺለ ሳቡርድ ሳቢለ፡፡ 6 እን እና እርድልድ እውረውሲሉ ኩሱጝሲ አርእሲስኹንሎም፡፡ ኩ እርግኑዂ፡ ይድኻ እውሩኹለ ናዋ ኩጋበት ተከውኑዂ፡፡ 7 እን እውራዂሲለ ኒትክ ኩልድ አኸት ናን ኤርእኖ ህምበኑኲ፡፡ 8 ውረድ እን እንቲ እውራ ጋበት እውኹንሎም ናዋ ከለብርኑኹለ፡፡ ኩልድ እንታኽር አኸት እምንድክ ኤርእስትኹሎም እንቲ ፈስረትለኽር ኤምኖ ህምበነኲ፡፡ 9 ናድ ግን አን ሺኹካ ግን ግራ እርድድ አኽሊ አን ሺዋኹካ፡፡ እና እንቲ እውረውለ ኩ አኽንነዲን ናመታን ሺወኩንካ እንኩኹን፡፡ 10 ኒውክ ዩዂ ኩዂ ግን እንኩኹር ዩዂ ግን፡፡ አንኽር ናድ ሳብስተ ህምበኩን፡፡ 11 ንደምቢ አን እርድሊ እልሊ ኩል እንትያ ግነ፡ ናውኻ እርድሊ ህምበነኲ፤ ኦ ይኽር ሻትክ! እና እንቲ አውረውለ ይነሰና ላዂ አኽድኖ ኩሱጙድ ተከዊሎም፡፡ 12 አን ናዲ እርድሊ ዋኑ እና ኩሱጙድ እውረውሲለ ተከውኹንሎም፤ እን ድዲዂራ ክቱብ ተመምሮር መታን ድዳዂሲ አኽገት፡ ናልድ ላዂ ድዳዂ እላ፡፡ 13 ናን ኩል እንተረኩን እንኩኹን፡ እን ይፈርሐት ናል እንተኽሮ እርድል ዋኑ ነስ የኩንሎም እንኩኹን፡፡ 14 አን ኩጋበት ኡኹንሎም፡ እን አን እርዱዂ አኽገሰና ናውር እርዱ አኽኒ እማ እርድ እንጠረኩሎም፡፡ 15 ምቑሊልድ ተከውቶሎም ሺወኩንካ እንኩኹን ግን ግራ እርድልድ ህይቶሎም ዮ አኽሊ፡፡ 16 እን አን እርዱዂ አኽገሰና ናውር እርዱ አኽኒ፡፡ 17 ኩጋብ እምንዲ ግን፡ እማ እምንድ ሸተክዲሎም፡፡ 18 እን እንቲ ይት እርድሊ እንሸቕረሰነለ አንኽር ናት እርድሊ እንሸቐኩንሎም እንኩኹን፡፡ 19 ናው እምንዲ ሻትካን አኽድ አንኽር ይሹቲ ናመታን ሸተክደኩን እንኩኹን፡፡ 20 ናድ ካያ አኽላ አን ሺዋኹካ እን ናጋባሲ ይል ኤምንዶ ህምበውድር ሺወኩንካ፡፡ 21 ናውክ ላዂ አኽድኖ ሺወኩንካ እንኩኹን፡ እርድኻ እንቲ እንሻቕረትለ አርእሮ፡ ኦ አበ! እን እንቲ ይል ዋንትረት አንኻ ኩል ዋንተት ናውር ይነል ላዂ አኽድኖ ሺወኩንካ እንኩኹን፡፡ 22 ይዲ ኩዲ ላዂ አኽነሰና ናውኽር ላዂ አኽድኖ እን እንቲ እውራኹለ ሳቡርሲ እውኹንሎም፡፡ 23 ኣንኻ ናል እንትኻ ይል አኽድኖ እን እንቲ ይት እንከልደሰነለ ናትኽር አን እንከለትሎም እርድ እንቲ እንሸቕረትለ ኤርኡዂ፡፡ 24 ዎ አበ! እርድ መሄድስጊ እንከልዳኽርለ ግን፡ እማ እና እንቲ እውረውለ እን እንቲ እውራ ሳቡርሲ ቋልድኖ እን ኣን ህምባ ኣካንሊ ናውኽር ኒል አኽድኖ ይምራድ ግን፡፡ 25 ዎ ይኽር ሻትክ እርድ አርእለካ አጛ ኤርኦካ ህምበኩን ነጝር እንቲ እንሸቕረትለ ኤርእኖ ህምበነኲ፡፡ 26 እን ይት እንከልዳ እንከሊ ናል ዋንቲቶር መታን፡ አንኽር ናል መንደርትያ ኩሱጝሲ ኤርእሲሶሎም ህምበኩን፡ ኮዶኽር ኤርእሲስየሎም ግን፡፡