1 ነስ ኣን ድወኹኩም እንታ እምነትድ ኣንቁሪት ግድኒን ዮ ግን፡፡ 2 ና ጸሎት ልጝንተልድ ዳገንድኖኩም ግን ይኽ ላዂ ኩወነንኩም ኮዶ ጃርድ ሰደቀት ሱኲሳኹድሰና ተካ ወክት እንትሮ ግን፡፡ 3 ይኽርዲ ይዲት አርእምብነድ ነስ ናትክ እሲድኖኩም ግን፡፡ 4 ሚወክት ኣኽሰና እን ኣን የሰነኩም አልብድትኖ ዮ ግን ኣን ድወኹኩም፡፡ 5 ኣን ናን እን እንሻቃዂሊለ ፈረኩን እጝኩኹን እን ተልድ ላዂ ኤዊል ፈርቶ ዮ ወንቀራኹ እላ፡፡ 6 ናን ነስ ይነዲንኩም እንተለፈክ ሰህሮ እንታ ኸቱዂ፡፡ 7 ደኣም እምንድክይየኩም አንፈረን ኪደኩኩም፡ ውረድ አን ፈረገን እን ደፍእዳዂ እንተረለኩም፡፡ ኣን ፈረን ደኣም ኒት ፈስየልኩም ግን፡፡ 8 ኒ እንቶሰና ሐጢኣትድር ሸተክነድኽር እርድሲ ፍርድድ ዓውቲትሮ ግን፡፡ 9 ሐጢኣትድ ይት ኤምናብነድ ግን፡፡ 10 ሸተክነድ ይኽርሊ ፈራኽር አኽነዲን ንደምቢክ ቋልደኒለ፡፡ 11 ፍርድዳ እና እርድ ሕክም ሲም ፈረድሱዂ፡፡ 12 ናጝር ይውኩም ገሪው እርጉኹለ ዳኣም ዋስስተለኩም ትቕሮኩም ግን፡፡ 13 እን መንፈስ ሻትክ እንቶሰና ኒ ኒላውድ እምንሊ ታተይሮኩም ግን፡፡ ኒ ዋሳዂሲክ ካያ ጋበኲ ግን ግራ ኒ ኒላውድ ያኹኩም ሻኽላ፡፡ እን አኽሮ ህምባ ወራታትሲ ኤርእሲስሮኩም ግን፡፡ 14 ኒ ይልድ ኤዶ ድዊሮኩም አኽነዲን ሳቢሮለ ግን፡፡ 15 ኒውክ ይኽርዱዂ ዩዂ ግን፡ ኒድ ግን ይልድ ኤዶ ድዊሮኩም ግን አን ያኹኩም፡፡ 16 ከለላ ግርጋትሲ ቋልደኒለ ከለላ ግርጋት ደምቢኻ ሐዲስድ ቋልትኖለ ግን፡፡ 17 ላው ኒ ታለይቶትልዳ ናሹር ናሹ አበዲ ውሪ ሰበትድ ግን ከለላ ኳሪስ ቋልትኖለ ግን ኒያኹና፤ ውሪዂ ይኽርሊ ፈርያ ግን ያኹንና፤ ይስትጚኒዂ፡፡ 18 ንድኻ ውረድ ግን ኒ ከለላ ግርጋት ያኹና፤ ኒዀርሲክ ፈሄምሶና እላ ይኑዂ፡፡ 19 ኢሱሳ ወንቀርድኖሉ ጀርቢነት ኤርእስቶሉ ከለላ ግርጋትሲ ቋልደኒለ፡ ኮዶ ሐዲስድ ከለላ ግርጋት ደምቢ ቋልትኖለ ግን ይነዲንኩም ማ፤ እኺርኺርሲ ወንቀርደናኹን እንኩድኑኹን፡፡ 20 እምን እምንድክ ይየኩም እንትን ስሪትኖኽር ቁርቁርትኖኽር ግነ፡፡ እርድኻ ፈርሕሮ ግን፡፡ ቁርቁርትትኖ ግን ደኣም እንታ ቁርቁርትና ፈርሐትሊ በደልስሮ ግን፡፡ 21 እዂና ንር እዃርና ወክት አኾሰና ምሕጮሲ ንርዓቕል ሽብወኩላ፡፡ እዃርደሰነኻ እርድሊ አዳም እዃርስነዲን እን ንርምሕጮ ተባዂሲ ኤልብደለሉ፡፡ 22 ኒሰና እንትጝኽር ናን ቁርቁርትደነኲ እንኩድኑዂ፡ ደኣም ሐዲስድ ቋልድየኩም አኽነዲን እንታ ለፈክ ፈርሕሮ ግን፡፡ እና ፈርሐት ኒስኻ ኒዀርሲክ ላዂ ኤዳኹልኩም እላ፡፡ 23 እን ግርጋትሊ ኒዀርሲክ ላሪ ድኳ ወንቀርደኒለ፡፡ እምንድክ ይየኩም ይኽርሲ ይሱጙድ ጀረብዲናዂሲክ ሺውደነን እውሮኩም ግን፡፡ 24 ናን እኽታሲክ ይሱጝድ ላሪ ድኳ ሺውዲኒ፡ እንታ ንግስ ኩጝሮ ሺዋ እውስትሮኩምር ግን፡፡ 25 እና ወራታትሲ ናትክ ድግምድ ጋቢኹንኩም፡፡ ንድደምቢክ ናንትልድ ተርሰ አግሀድዶ ጋባኹኩም ወክት እንትሮ ግን፡፡ 26 እን ግርጋት እንደል ይሱጙድ ሺዊትኖ ግን አንኻ ይኽርሊ ሺውየልኩም ግን፡፡ 27 ውረድ እንትን አን ጃርልድ እንተት እምንድንነዲ ንለኽር እንከልድንነዲንለኽር፡ ኒላዊሲ እኽር እንከለኩኩም፡፡ 28 እኽርልድ ፈ እርድሊ እንቱኹን፡ ሐዲስድ እርድሲ ባሮ ይኽርሊ ወንተረኩን እንኩኹን፡፡ 29 ሚታለይቶታ ናን በርህድሮ ጋብረኲ ድግማትድ ጋበላ፡፡ 30 ናን እንቲ ኒትክ ኤርእረት ኤርእንኹን ኮዶ ላዂ ወንቀርዶካ ጀረበግረት እንቲ ጃርልድ እንትረትር ኤምነኩንካ ይኑኹሉ፡፡ 31 ኢየሱሳ ናንማ ኤምንድኑኹንለ፤ 32 እናሐን ናን ወክት ጋእ ዩዂ ናውክ ይቱ ባርድኖለ እንተት ነቱ ፋሕ ይትኖ ግን ደኣም ይኽር ይዲ አኽነዲን ይቱ አኽሊ፡፡ 33 ይል ሰላም ኤርትኖ ነስ ጋቢኹንኩም፡ እርድሊ ጅርበት ህምበኩኩም፡፡ ደኣም አረጋ ኣን እርድሲ ዓውቲትኹንሉ፡፡