1 ኣን እምንዲ ካና ጀቢብሪ ግን፡ እን ንርቲ ተከላዂ አረሳኻ ይኽር ግን፡፡ 2 ይል ፍሪተጋ ለንክክሲ ቃረጨኩሎም፤ እን ፍሪታ ልንክክስኻ ትክሰ ፍሪትሮ ዮ ጨረይደኩሎም፡፡ 3 እንትን ደኣም እን ጋባ ኣን ድወኹድኩም ናግያን ግን፡፡ 4 እንትን ይል ተብድኖ መንደርታ ኣጝር እንተል ተቦ መንደርትያ ግን፡፡ ለጝካ ካና ጀቢብሪትል ተቦ ተከነገን ኒላውድ ላሪ ፍሪትሮ ገረሰገሰና እንትጝር ኒሰና ይል ተበግደናን ላሪ ፍሪትደኒ፡፡ 5 ኣን ካና ጀቢብሪ ግን፡ እንትጛ ለጝክክ ግን፡፡ እን ይል መንደርታዂ አጝኽር ኒል መንደርተኲን ኒግን ገሪው ፍሪታዂ፡፡ ውረድ ይጥ እንገት ላሪ እሲትኖ ገረስደኒ፡፡ 6 ኒዀርስክ ይል ተቦ መንደርተጋዂክ፡ ለጝካ ኢዳኹሰና ከደን ማልሰኲ እማ ቀሸምሰና ሐው ይሮ ሳኺል ማልሰኲ፡፡ 7 ይል ተብድኖ መንደርትደነን ይጋባኻ እንተል ቱረን ሺውዲነዂክ ኒውክ ኣኽሮልም ግን፡፡ 8 ገሪው ፍሪትደነን ንድ ሰበትድ ይኽር ጀንጀንስሮ ግን፡ እንትጛ ይታሌቶት ኣኽትኖ ግን፡፡ 9 እን ይኽር እንከላኹድሰነለ ኣጝር እንከለኩንኩም እንትጝር ይእንከሊትል ተባ፡፡ 10 እን ኣን ይኽርድ ትእዳድሲ ተከዉ ኒ እንከሊትልር መንደርኹሰና እንትጝር ይትእዳዳትሲ ተከውደነን ይእንከሊትል ተብድኖ መንደርትትኖ ግን፡፡ 11 ይ ፈርሐት እንተል ኣኽሮ እንታ ፈርሐት ኮዶ በሄርኮት ኣኽሮ ኒስ ድዊኹንኩም፡፡ 12 እን ኣን እንከላኹድሰነኩም እንትጝር እኺር ኺርሲ እንከልስጚትኖ ይጥእዳድ ኒን ግን፡፡ 13 ግርዋ ኒማስድ ኒፊዂትሲ ደኲሶ እዋኹድ እንከሊ ትልድ ኩጓዂ እላ፡፡ 14 እንትን እና ኣን ያኹድሰነኩም ኒትክ እስደነን ይማስ ግን፡፡ 15 ንደምቢ ገንሺን የሊኩም፡ ውረድ ገንሺና እን ኒአደራ እሳዂሲ አርእላ፡ ኣን ደኣም እን ይኽርልድ ዋሰውሲ ናትክ ድዊነዲንኩም ይማስ ግን የኩንኩም፡፡ 16 ኣን ግን እንተት ፍሪራኽር ግን ግራ እንትን ኣኽድኒ ይት ፍሪርድናኽር፡፡ እን ይሱጙድ ሺደናዂሲ ኒትክ ይኽር ኡሮኩም ፈርድኖኻ ፈሪው ፍሪትኖ እንታ ፍራኻ መንደርተንታ ኣኽሮ ዮ ፍሪርኹንኩም፡፡ ንድ ይኽ እን ይስጙድ ይኽርሲ ሺውዲነዂሲክ ኡሮኩም ግን፡፡ 17 17. እኺርኺርሲ እንከልስጚትኖ ኒን ይትእዳድ ግን፡፡ 18 እርድ እንጠረንኩም እንታጃብ ይት እንጠረት ፈሀማ፡፡ 19 እርድ ኒው ኣክደነን እንከልድድኩም ውረድ እርድ እን ኒው ኣኽውሲክ እንከለኩሎም፡፡ ዳኣም ኣን እርድልድ ፍሪሮ ኒልድ ፍድነዲንኩም ኒው ኣኽግድናኽር ኣኽድንነዲን እንጠረኩኩም፡፡ 20 ገንሺን ኒአደሪልድ ኩጓዂ እላ የኩም እርገት ይጋበት አልብዳ፡፡ ይት ጀረብድኖ ደምቢ እንተትር ጀርብድድኖኩም ግን፡፡ 21 ደኣም እን እንሻቃዂሲለ ኤርእጝብነድ ይሱጝ ሰብትድ ነስ ናትክ እሲድኖኩም ግን፡፡ 22 ኣን ይላውድ እንቶ ድዊጋኽርሎም ኣክገን ሐጢአት ሺብስትጊድሎም ሻዂ ግን፡፡ ናንኻ ናሐጢኣትድ ላሪ ምስምሳ ሻኽኒ፡፡ 23 እን ይት እንጠራዂ ይኽርስኽር እንጠረኲ፡፡ 24 ና ነበክል ኤሪ ኣዳም እሲሮ ገረሰገው ወራት እሲጋኽር ኣከገን ሐጢኣት ሺብስትጊድሎም ሻዂ ግን፡ ናንኻ ቋልኖ ዋንቱኑ ይዲ ይኽርዲት እንጣርኑኹና፡፡ 25 ሚምኻ እን ናትእዳዳትሊ ላሪ ምስምሳ እንገት እንጠርንኹለ ያዂ ክቱብ ተመምሮ ግን ኒ ኣኻዂ፡፡ 26 እን ይኽልድ ፈሲየኩም ህምባዂ መንፈስ እምንዱዂ ይኽርልድ ፈዂእንተሰና ኒ ይድ ሳምዕድሮለ ግን፡፡ 27 እንትንኽር ሰልፍድ ይዲ እርግድናኽር ኣኽድንነዲን ሳምዕድትኖለ ግን፡፡