1 ንድ መታን ይንኻ እና ኒስ ተካዂ ቡኳና ምስክርነቱኹድ ከለልስኖ ዋንትኑ ኒትክ እን ተቓኹሲናኽር እን ተከናኹሲናኽር ሓራምሲ ሺሽድንን እን ይና ጃብል ሓጠጥሶና ህንባኹ በደዳሪን ሲሰናድ ሰብርድ ጋጞ ይንን፡፡ 2 እን ስማርነስ ቃበቦ፡እን ኒጃብል ህንባዂ ፈርሓትድ መታን ዮ መስቀሊ ሰብር እሰኹዲ ጃር ላዉል ኮፍያኹዲ ይነእምነት ተርሲሰዲ ደንጎቢኹዲ እየሱስቲ መርኪስንን፡፡ 3 ቂልጞድግኒን መታንኽር እንተፊኹት ሓለልስግድኒን ፤እን ሓራሚንልድ ኒኣኾሊ ኒስኸስ ተጻረርናስ ሰብር እሰኹሲ እልብደሉ፡፡ 4 ሓራምዲ ልመለም እንታይነድ ልሳዕ ብርሊ ገእይትናሲክ ለመለም ይድኒ፡፡ 5 - 6 እን ኒዉላድሰና እሰ ይኹሩራይ ጃር እን ኒእንከላኹሲ ቀጽዓኩሉ እማ እን ከለብራኹሲክሉ ዉላድሲኽር ከትከተኩሉ እማ ቅጽዓት ኤደሪኹሲ ቃበብግ ገንሓንካኽር ኩሕልነስ ድሂስግ ዮ ካባኹኩም ሞኾዃኹኩምሲኻ ምኺርድኖሉ ህንብደነኩ፡፡ 7 ቅጽዓትሲ ሰብር እስደነን ጃር ሰልፉ እሰ ቋልዶኩም ግን ኒኽር ቀጽዓጋኹሉኻ አወያ ዉላድ ግን፡፡ 8 እን ናዉክ ሕበርስነሪላ ቅጽዓት ኣንገት ኣከደነን ላኪን ደቀሊት ግን ግራ ዉላድ ኣኽድኒ፡፡ 9 ንድ ኤወይሲኽር ቀጽዐዉና እክል ይናስኺዉ ዋኒነና ደንቢ እማ ስማርናኽርሎም ኣኽኖደንቢ ይና ርሕድ መንደርትኖታ እን መጃኒና እኽርሲ ትክስነ ኤዘዝትኖሉማ ወጀበለናኒ፡፡ 10 እንደንታ ከለላ ግርጋትሲ ክም ቋልስተትሎምሰና እሲነ ቀጽዕኑኹና ፡፡ኒ ላኪን ኒቅድስኒልድ በንስጞኖር መታንዮ ይነት ታሚታኹድ ግን ኒቀጽዓኹና፡፡ 11 ቅጽዓትክታ እንሲንቲ ሓሉቆትድ ግንግራ ፈርሓትድ ኣካኹ ኣኸት ተከላኒ፡ደንቢረትድ ላኪን እን ክንተዉሎምድ ሰላሙኽ ፍራ ጭድቅ ግን ኒፊሪታኹ፡፡ 12 ንድ መታን እን ፈተታሕዮዉ ናንትትዲ ወላእላእየዉ ገረፍፍዲት ትክሰልን፡፡ 13 እን ሓንከሳኹ እቢርዶግን ግራ፡ደርብልድ ፍጊን መታንታዲ እንተልኩኩሊ ትክያኹ ደርብ እሳ፡፡ 14 ቅድስና እንገት ካዂ ድኳ ጃርሲ ቋልዶሉ ኣኽላኒ እማ፡ቅድስነዲ ሰላምዲት ኒድክ ከዉዲት ተለየለን፡፡ 15 ላኹ ድዃ ገድ ጃሩኹልድ ጎደልጊን ፡ገሪዉድ ረኸስዳኹ ገለ መረራኹ ስር ቦኮሎ ጨነቅድጊንኩም ጠንቀቅሳ፡፡ 16 እን ላዶን ቁነድ ኒበኽር ኣክነስ ክዳኹ ኤሳዉ ላኹ ድኳ ፋይቱት ወሪ ርኹስ ኣኽጊን ጠንቀቅሳ፡፡ 17 ንኽርግጆ ድኳ በረኸትሲ አርዶ ጀረበን እሩጙድ ጀረባኹላ ኣኩ ነስሕስትሮ ኣካን አላኒ እማ ክም ማልስተት አርእድኑኹ፡፡ 18 እንትንታዲ እን ናንድ ተመዳኩዲ ለኸድ ሓዉ ሳኹ ከረንሊ ጣቐዲ ጭልምዲ ፡ 19 ቃና መለኸዲትልኽር አን ቆልሲ ዋሰዉሲ ወንተሶ ጋበዚነሎም ሺዊነዉሲሉ ደሀይ ቆሉኹ ገእይለሎም፡፡ 20 ናዉ ሕያይት ድኳ እን ጊረስ ተመደነንሉታ ክርጞ ሕንጭልነድ ክርን ያኹ ትእዛዝሲ ምኹርድኖሉ ገረስኒኒ፡፡ 21 ሙስየ ድኳ ጉኢተኩንኽር ፈጥፈጠኩንኽር ህንበኩን ይራሲክ እን ቛላኹ ንስኮት ኣኽራሲክ ጉኢሳኹእርጉኽ፡፡ 22 እንትን ላኪን እን ጊራ ጽዮንሩኹል እን ዕርዲራ ዋነኹ ጃሩኹል ዮርሳለም ሰሚሪትል እን ኤልፋት መላእኽቲትል ግን ገእይድናኹ፡፡ 23 እን ናድካ ዕግሎትሊ እን ማሕበር ሰሚል ከተብስኖ ህንበዉሊ በክርታትሊ ጃር ናድክሲ ፈረዳኹሊ እን መናፍስቲ ታምማንዲ ጫድቃንዲትል፡ 24 እን እየሱስ ነበካ ሓዲስ መእኮቱኹሊኽር እን ኣበልል ብርልድ ኪዳኹ ጋባኹ ነጨግነድ ብር ነጨግነድ ገእይድኖ ህንብደነኩ፡፡ 25 እንደን ብሪል ጋቡጉሲክሎም ፍና ጉሽኖ ደንቢታ ይንን እን ሰሚልድ ጋበኹድሰና ይናየዉሲ ወንተስኖ ደንቢ ደኤም ኣዋሃብነ ሽርቁርኖ እን ጋባኹሲኩም ህንባኹሲ ጉሽገሉ ጠንቀቅሳ፡፡ 26 እንሲን ኒደሀይ ብረስ ፈጥፈጥደኩ ናን ላኪን ላዶን ወንተሶ ሰማይሲ ክም ቀጥቀጥደት እስየሉ ግን ግራ ብረስ ካያ ኣኽሊ ዮ ሳዳ እዋኹ፡ 28 27 - 29 ይና ጃር ቛዂ ለኻ ግን፡ እማ ይንን ቀጥቀጥ የግረሪ መሪ ከለብርናኽር ኣኽኖ ደንቢታ ጃርሲ ፈርሕዳኹድሉ ሻትክት ከበርድነትኽር ጉኢሲኽር ኣገልገልድኑ ሓመድንን፡፡