1 እምነትኻ እን ሳዳ እስታኹሉ ሓጀተስ ርጉጽ እስና እን ቋልስተጋኹ ሓጀተስ ፈሀምና ግን፡፡ 2 ንድ ግን እን በሀሊንሲ መስከርሳኹሎም፡፡ 3 እዲና ቆል ጃሩኹድ መሀድስረሰና ኒሰናኽር እንቋልስታኹ ቋልስተጋኹልድ ክም ኣኸት እምነትድ ፈጠኖሉ ሻኽኑኹን፡፡ 4 ኣበል ሰደቐት ቓኤል ዱኹልድ ኪዳኹ ሰደቐት ጃርሲ እምነትድ ስኩስኹሉ፡፡ጃር ኒሞባእድ መስከሩዱሲ ጫድቅ ኣኸት ንርድ ምስከርስኹሉ ክሮ ዋኑዱሲኻ ልሳዕ ንርድ እሰ ጋበኩ እንኩኽ፡፡ 5 ሄኖግ ክራ ቋልጊን መታን እምነትድ ገዓዙኹ ኒገዓዝና ጃብ ጃርድ መስከርሰት መስከርሱሉ እርጉኹ እማ፡ጃር ጋዓዝድነዲንሉ አርስላኒ፡፡ 6 እምነት እንገድ ላኪን ጃርሲ ዋሲስድኖሉ ገረስተለሎም፡፡እን ጃሊ እንትሮ ጀረባኹ ኒ ክም ዋነትኽር እን ኒድ ጀረበዉሲሉ መህየት ክም እወትሎምኽር አምንዶ ወጀበኩሉ፡፡ 7 ኖህ እን ልሳዕ ቋልስተጋኹድ ሓጀታ ሰበትድ ቋላ ቋለሰና ጃር ጉኢሲ ደረክሶ እምነትድ ግን ኒልጞልሲ ደኤንድና ኣክረሪ ዱነክ ደለምዳኹ ንርድ እሰ እዲነት ኮነኑኹ፡እን እምነትድ አረርሳኹ ጭድቅሲኻ ወርሳይ ኣኹኽ፡፡ 8 ኣብርሃም እን ርስቲሲ ከለብርዶሉ ሓሰባኹ ሉ ኣካንሊ ፍሮ ሸጞስተሰና እምነትድ አዘዝቱኹ፡፡ ኤዊል ክም ፈረት አርእጊኽር ፊኹ፡፡ 9 - 10 እን ጃር ኒገበረንተዲ ኒከደመንተዲ መሰረት ሻኽረሪ ታንታርዋ ጨበሩ እርግነዲን እምነትድ እንብራ ሳዲሪትል ብራ ገብራ ኣኾ መንደርቱኹ እማ እና ሳዳ ኒሂቲ ኒዲ ኒዲ ወረሰዉ ያቆብዲ ኢሳቅዲ ያቆብዲ ልጞሊ መንደርቱ እርጉኹ፡፡ 11 ሳራ ድኳ ንርወክድ ዶኮሰና እን ሳዳ እዋኹሲላ እሙን እስረ ቋልደሪሉ ኣኽርነዲን ፈደን ተከልኒል እምነትድ ሒል አርቲ፡፡ 12 እሞኻ ላኹልድ ንኽር ክራኹድሰና ኣኩታ ሽንግሩ ሰሚዉድሰና ዲ እን ሺብስተጋኹ ሸላይል ባሓሩኽሊ ህንበዉ ቁሻሰና ናብጅኽ እዃርስኑኽ፡፡ 13 ናበልጞ ናዉክ እን ሳዳታትሲ አርእኒሎምኒ ላኪን ሺራኹልድ ቋልኖ ሰለምኑኹለን እማ እን ብራ ኒሂትል ጋሽዲ ስደተኛታትዲ ናኣክነድ ተአመኑኑ እምነትድ ክርኑኽ፡፡ 14 እን ንሰና ጠዉክ ናታንታርዋ ጀረበነት ቋሊሰነኩ እንኩኑኽ፡፡ 15 እን ታንታርዋ ናዉ ፊነሪት ሓሰበዉላ ኣከነንታዲ ወንተርድኖ ወክት እርጉኹሎም፡፡ 16 ናን ላኪን ኪድረሪ ማለት ሰሚሪት ሰፍለልተነኩ እንኩኑኽ፡፡ እሞኻ ጃር ዕርዲራ ደለምዶሎም ህንበኩ እማ ናጃር ይስትሮ ናድ ስማረላኒ፡፡ 17 - 18 ኣብርሃም ፈተንሰሰና እምነትድ ኢሳቅቲ በደይኹሉ እን ሳዳ ከለብራኹ እን ኢሳቅድ ፈደን ሽጞሰትሮልካ ግን ይስቶሉ እርጋኹ ላኹ ኒኹረስ ከሸሪስኹሉ፡፡ 19 ጃር ክሪልድኽር ጉድሮሉ ክም ገረሰት ሓሰቦ ኒልድኽር ምስለድ ወንተሶ አርኹሉ፡፡ 20 ኢሳቅ እን እንተራኹድ ጋርድ ያቆብዲ አሳዉዲት እምነትድ ባረኩኹሎም 21 ያቆብ ክሩጉሲ ዮሰፍቁርሲ ላዂ ላዂድ እምነትድ ገዉርኹሎም ኒግንቢ አብል ደገፍቶኻ ፍግም ዩኽ፡፡ 22 ዮሴፍ ክርዶ ዩጉሲ እስራአልዱዉድ ፍና ሰበትድ እምነትድ እልብዲሱኹ፡ኒናሽሽ ሰበትድኽር ትእዛዝ እዉኽ፡፡ 23 ሙሴ ኡዃርሶሰና ኒዋልደን ምልምል ኒኣክነስ ቋልኖ እምነትድ ሰዃ አርባ ትብስኑኹሉ ስምዕታ ሲሙኹሲኽር ጉኢትኒ፡፡ 24 ሙሴ ለገዶሰናኻ ፈርኦንድ ቁራ እዃርዳኹ ይስትጊን እምነትድ ጉሹኽ እማ ፡ 25 ሽጉድ ሓራምድ ባህ ያኹሉልድታ አክ ጃሩዲ ጅርበትድ ብትሮ ፍሪሩኽ፡፡ 26 እን መህየትሲ መርኪሱኹ እማ ፡ክቱብ ግብጺሩኹ ልድታ እን ጀኸና ክርስቶሩዲ ተረከረሰ ገሪኹ ርድቅ እሰ ሺቡኹሉ፡፡ 27 28 11፡27 እን ቋልስተጋኹሊታ ክም ቋለትሉ ኣኾ ሰብርድ ተቡኽ እማ፡እን ሓሩቀት ሲሙኽሲ ጉኢትጊ ፡እምነትድ ግብጺት ባሩኹላ፡፡ 11፡28 እን በኽርሲ ድሂሱ እረጋኹሲ ስኩርጊንሎም መታን ፡እምነትድ ፋጅኸዲ ብር ነጨግነዲ እሲኹ፡፡ 29 ብራ አዳናኹሰና ሃቢነ ባሓር እሪትሪኹሲ ካርንኹሉ፡ግብጺሩ ላኪን ኒሰና እሲድኖ ፈተኖሰና ሸመምስኑኽ፡፡ 30 ያሪኮር ከለብሲ ለጞታ ኳራ ጅልዉነሰነሉ እምነትድ ልቡኽ፡፡ 31 ረሃብ እን ፋይቱራ እን ሰለየዉሲ ሰላምድ ከለብርድነዲንሎም እምነትድ እን አዘዝትገዉዲ ድድላኒ፡፡ 32 እሞኻ ግደዎንደዉ፡ ባራቅደዉ፡ ሳምሶምደዉ፡ጥፍታሄደዉ፡ሳሚኤልደዉዲ ነብያትዲር ሰበትድ ዉራ የግን ፡ናሰበትድ ድወጊንኩምታ ወክት ሽጎኩለ፡፡ 33 ናዉ እምነትድ ሑኩማንሲ ቂሊስኑኹ፡ጭድቅ እሲኒኹ ፡እን ሳዳ እስተኹሉሲ አርእኑኹሉ፡ገበና ኤብሲ አበድኑኽ፡፡ 34 ለኻ ሒልሲ ድሂስኑኽ፡ጠብጥ ሰፉኹልድ ደኤኑኽ፡ቅልስጞልድ ፋርሳን ኣኽኑኽ ሓርብል ሒልትኑኽ ደሽ ቆምያተዉሲ ዳገኑኹሎም፡፡ 35 36 እኩን ናክሪዉሲ ጉናወክትድ ከለብርኑኹሎምአሪዉኽር ሳቀይስኑኽ፡እማኪዳኹ ጉና አርድኖ ይኖ ምሕረት ጀረቢኒ፡፡ 37 ናበልጞኻ ቃየርነዲ ከትከትነዲሲ ንድ አወይሲ ኽር ሙቁሑድ እንሸዉስነዲሲ ፈተንስኑኽ፡፡ 38 ክርጞ ሕንጭልነድ ክርኑኽ፡ፈተንስኑኽ፡ሰየፍስኖ ክርኑኽ፡ዒዶራ በጉኹዲ ኣኻፍንጢራኹዲ ሰርኖ ጅልዉኑኽ ብኑኽ ሽባሑሎም ጂባዲ ጅርበዲ ብትኑኽ፡፡ 39 እድንያ ናድ ወጀበግረሪ ኣኽሮታ ከደንዲ ጊትዲትል ጋኻታዲ ጎቓት ብሪኹሊክር ኮለል ይኑኽ፡፡ 40 ይነት እንገት ኣኽሊ ገእይግኒን መታንታ ጃር ይና ሰበትድ ኪዳኹ ፍሪርነዲን ነን ናዉክ እምነትድ መስከርሶሎም ህንበዉ እን ሳደት አርኒላ፡፡