1 ፍትሕ እን እንተራኹድ ሻማ ፡ ትክያኽ ሓጃታ ሻኽ ፡፡ ወጅህ እን ቁምነገሩኽ (ወቀይኒኽ) ኣኽጊ ታ ፡ እን አመራ ሺባ ዲማ ደማይ ፡ በደዬነውሉ እን ኒድ ሱክሰውድ በታተን ታምማን እሲሮሎም ገረስተለሉኒ፡፡ 2 - 3 ላኪን ኣመሪል ግን ኒድ እልብድና ሓራሙኽ ኣኻኽ ፡ ንሰና ኣከጋን ታዲ ፡ እን ሰዳቀትሲ ሱክሰው ላዶን ለጭሕና ሰና ፡ ናሕልኒርኽር ገድም ሓራም ዋኒጋ ደንቢ ፡ በዳ ሱክስኒልድ እማ ፊኽና እርግለመሎም ፡፡ 4 ማለት ብር ቢረውዲ ዕብላታትዲ ፡ ሓራምሲ ሺሽድሮ ገረስተለሉኒ፡፡ 5 እማ ገድም እድንዪል ትዉ እንጉንሲክ ፡ ያክ ፡ ስኻ ደለምድሩኹለ ግን ግራ ሰደቃት በረኽኒሑዲ በዳ ቁኒኹዲ ደላምድላኒ፡፡ 6 ሓረራኽ በዳዲ እን ሓራም ሰባትድ ፡ በደይሳኽድ ባህ ይለካኒ፡፡ 7 እንሲንኻ እን እናሓን እን ክቱብል ይሰባትድ ክቱብ ግን ፡ ዎ ይኽር ጃር ኩምርድሲ እሲያ ዮ ፡ እንተራኩን እንኩኹን ይኹን፡፡ 8 ኣዋኹሊ እን ፍትሕሰና እሲነ ሱኩሰውሉ ፡ በዳ ብርኺኽዲ በዳ ቁኒኹዲ ፡ ሓረራኹ በዳዲ ፡ ሓራም ሰባትድ ሓረራኹ በዳዲ ጀረቢላ ፡ ንድር ባህ ይለካ ዩኽ፡፡ 9 ደንብርንኻ እናሓን ኩምራድሲ እስያ ዮ ፡ እንተራኩን እንኩኹን ዩክ ፡፡ እን ደንቢራ ሰባትድ ፡ ተብድሮ ዮ እን ሰልፋስ ቂልኹሉ፡፡ 10 እና ፍቃድ ንድ እን ላዶን ዲመሲ ፡ ኣቅታኽ እን በደይሳኽ በዳስኻ ስኻ የሱስ ክርስቶስርኹድ ቃደስትኖ ህንብናኩን፡፡ 11 13 ከዳ ኣኻኹክ ኒውክ ፡ ክሰራድ ክሰራ ኣገልገልዱ እንጉንሲክ ደውያክ እማ ፡ እን ሓራምሲ ሺሽድሮ በታተን ገረድስጋኹሉ በዳስ ገሪ ዶል ፡ ሱክሳኩሉ እንኩኽ፡፡ 12 - 14 ክርስቶስ ላኪን እን ቀደስተውሲ ፡ ላሰደቃትድ ዲመሲ ተምምድኹሎም እማ ፡ ኒ ዲመሲ ኣክረሪ ላሰደቃድ ሓራም ኣብል ፡ ሱክሰ ሰና እን ኒኣባይሲ ኒሉክ ዳዲሰና ኣኽድናሲክ ጨበሩ ጃርላውል ኮፍያኽ (መንደርታኽ) ፡፡ 15 መንፈስ ሻትክ ኻ ፡ ጨበራኩና እንኩኽ ፡፡ 16 እን ግርጋት እንደት ደንቢ ፡ ናዲ ትዋኹሉ ማእኮት ኒን ግን ፡ የክ ይኽር ጃር ፡ ይፍትሕሲ ናለበኪል እውየሎም ናሓሳብሊኽር ከተቢያሉግን ዮሰና ፡ 17 ገድም ናሓራምዲ ናዓመጭዲ በታተን እልብደሊ የክ፡፡ 18 እማ ገድም እና ብሕልታ ፡ ንዱኽሊድ ሻኽስታ ገድም በዳይና ሓራሙኽ ጀረብደለሉኒ፡፡ 19 - 20 እማ ይሻን እን ክራርድ ፡ ማለት ኒስኻድ ቀዳሳኹና ፡ ሓዲስዲ ዲማ ዋነኽዲ ደረብ የሱስር ብርድ መቅደስሊ ፡ ቱና ሓጠርና ዋነና ደንቢ 21 ጃር ልኝንሊ በሀር ከዳ ዋነና ደንቢ ፡ 22 ይና ለበካ በዳን ሕልኒልድ ሺሮ ፡ ይናስኻኽር ዓቅ ጫርያንድ እንቃሮ ፡ እንታኽትረሪ ፈሃምነሪላ እምነት ይና ለባካ ታምምድ ፡ ፈጠንን፡፡ 23 እን ሳዳ እዋኹና እምንሳኹ ግን እማ ፡ እን እምናሪላ ሳደት ዘላለቅ ይግኒ ተብድንላ፡፡ 24 ሻምዲ ትክያኹ እስናዲ ተበራበርናዲት ፡ ይናሹር ይናሹትል ፈጠንን፡፡ 25 ኒንኻ እን ግርጋ እንዲኒ ፡ ክም ሱኩርደት ትክስዲነ ቃልደናክ እንኩድኑኽ እማ ይናሹር ይናሹ መኹኽንን ግን ግራ ፡ ናበሊን ክኒ እሰናክሰና ይና ዲመስ ባርግኒን፡፡ 26 - 27 እማኻ ኣምር እምኑኽ ኣርነሰና ፡ እን ከልኖ ሓራም እስናን ሰክሕዳክ ፍትሕ ጨበርናዲ ፡ እን ተጻረራውሲ ቁረሪ ሕልዕታ ለኺኽ ኣኽሮ ግን ግራ ፡ ገድም ሓራም ሰባትድ ሱክራኽ በዳይና እላኒ ፡፡ 28 እን ፍትሕ ሙስየሩኽሲ ፋሕሰኽ፡ ቆል ለጛሩኽ ወሪ ሰኻ ምስክርድ ግን ፡ ራሕመት እንገት ክራኽ፡፡ 29 ጃር ኹረስ ዳዳኽ ፡ እን ቀደስታኹሉ ብር ማእኮቱኽሲኻ ፡ ጂብዳኽ መንፋስ ገዱኽሲኽር ጀኻኽ ደኣም ፡ ውሪኮት ጂባኻ ቅጽዓ ወጀባኩንሉ ተካኹንኩም፡፡ 30 ይንታዲ እን ፡ ገደያ ፈደይና ዩኽ ግን ፡ ኣን ገደያ ፈደዪያ ግን ያኽ ፡ ወንተሶኻ ጃር ኒ እክሲ ፈረድሮግን ያኽሲ ኣርእንኹንሉ፡፡ 31 ዲማ ዋነኽ ጃር ናንሊ ፡ ለብና ሰክሕዳኽ ግን ፡፡ 32 እን ገሪኽ ጅርበትዲ ስቃይዲት ሰብር እስዲነ ፡ ቲኻ ከለብርድናኹለን ግርጋት ጃበርሲ እልብደለን ፡፡ 33 ላገፍድ ጀኻንዲ ጅርበዲሲ ፡ ቃየርሰንቲ ኣኽድኖ ፡ ላገፍድ ኻ ፡ እን ንሰና ተካኹ ገእያኹሎም ከውዲ በንሰኝዲነ ፡ 34 ኪዳኹዲ መንደርታኹዲ ሳላምዲ ፡ ሰሚል ዋነትኩም ኣርእድኖ እን እንሻውሰውዲኽር ፡ ኣከን ጅርበትድ ብድኑኽ፡ እንተ ሰላምዲት ወረርናኽር ኣከን ፈርሓትድ ሰብር እስዲኒኽ፡፡ 35 እማ ገድም ፡ እን ገሪኽ ማህያት ሻኽ እንታ ሐጠርሲ ማልገሉ፡፡ 36 ጃር ፍቃድሲ እስዱኑ ፡ እን ሳደት ኣርእትኖለታ ሰብር ጀረብዳኹኩም ፡፡ 37 ማለት ልሳዕ እቁቱገ ወክት ግን ፡ እን እንተራኹ እንትሮ ግን ፡ ሺሽሮ ኣኽላኒ፡፡ 38 ጫድቅ ላኪን እምነትድ ግን ፡ ኒ መንደርታኽ ፡ ደንቢራ ወንተረንኻ ይፊኹት ኒድ ባህ የለላኒክ፡፡ 39 ይንን ላኪን ፡ እን ደአና ናፊኹቱኽ ኣርድኖ እምነውዲ ግን ግራ ፡ እን ድዲል ደንቢራ ወንተራውዲ ኣኽኒ፡፡