ፊዃ 9

1 ገድም እን ጃበራ ማእኮትኻ ፣ ኣገልግሎት ጃርኹር ኽር ፡ እና ብሪኹ መቅደስልኽር ፍትሕ እርግጋኹሉ፡፡ 2 ድካን ተከልሶ እርጉኹ እማ ፡ እን ሰልፍል ኣረርስረሪ ቅድስተ ይስትረሪ ልጝኒ፣ ቀንደልዲ ሰደቃትዲ ሳንዓ ቃልስናዲ እርጉኹኹ፡ 3 እን ሊጞር ክራር እንደራሲ ላኪን እንድንካንሊ፣ ቅድስተ ቅዱሳን ይስትረሪ እርግቲ፡፡ 4 ንርትል ጽንሃህ ደሃብዲ ኒድክድ ደሃብድ ቃራኹ ታቦት ማእኮቱኽ እርጉኽ እማ ፣ ኒ እን ማነስ ሻኻኹ ፍዮራ (ጀን) ደሃቡኹዲ ኣሮንዲ ግምቢ ቁጥረሪዲ ጽላት ማእኮቱኹዲ ፡ ሻኻኹ እርጉኹ፡፡ 5 ኒኣወይስኻ እን ወንበር ገዱኹሲ ሻሚሰው ክብር ኩሩበልድ እርግኑኹ፡ ኒድ ሰባትድ ናን ላኹ ላኹድ ፣ ጋቢኖሉ ኣከላናኒ፡፡ 6 ኒን ነኸ ደለመሳና እን ከዳታት ዲማ ፣ እን ሰልፍድ ህባ ልጝንሊ ናኣገልግሎት ገእሲድኖ ትዋናኹ፡፡ 7 እን ልጝንሊ ላኪን እን ከዳ እዋኹ ፣ ኒቱ ኣመሪል ላዶን ትዋኹ ፡ ላኪን እን ኒኣኻርዲ እን እክ ሓራም ሰባትድ ፣ ስኩሳኹሉ ብር እንገት ትዋላኒ፡፡ 8 እን ሰልፍ ልጝንሊ ልሳዕ ደው ዮ ዋኑ እን ማቅደሱኹሊ ፡ ቱሲሳኹ ደርብ ልሳዕ ክም ወድሕስትገት መንፈስ ሻትክ ንድ ቃሊሳኹ እንኩኹ፡፡ 9 ኒ እና ናን ህምባኽ ወክትድ ፡ መሰለ ግን፡፡ ኒሰና እስነ እን ኣገልጋሪላ መቅደሱኹ ኒሕልነድ ታምም እሲሮሉ ገረስታኹሉ ሞባእዲ ሰደቀትዲ ሱክሰነኩ እንኩኑኽ ፡፡ 10 ኒን ሞባእዲ ሰደቀትዲ ፡ ናቱር ናቱ እንቃስነድ እን ወክት ትክይኒኹ ገይእራሲክ፡ ስኺኹ ስርዓት ካያ ግን፡፡ 11 ክርስቶስ ላኪን እን እንተራኹ ትክያኽ ሓጃታ ከዳ እዋኹ ኣኾ ፡ እን ተሰና እን ብሉጽዲ ታምምዲ ፡ ናንድ እስቲጋኹ ማለት እና ምህዶ ኒልድ ኣኽሃኽ ልኝን፡፡ 12 ብር ዕምብሊኹዲ ገሩኽዲሲ ኣኽጊታ ፡ ኒብርድ ዲመር ደኣኒኹ ፡ ኣሮ ላዶን እን ሻትክ ልኝንሊ ትዉኽ፡፡ 13 እማ ብር ዕፍልታትዲ ገሩዲ ፡ ባርህ ገራኽ እን ሓራሙሊ ነጨቅሶ ፡ ላጭሕድና ስኺኹል ሻትክ እሳኽ፡ ኣኾ ደምቢ ፡ 14 ክርስቶስር ብር ዲመር መንፈስድ ፡ እሰ ኒኣኽርሲ ሓኩር እንገት ፡ ጃርድ ሱክሳኽ ውሪኮት እንኝ እን ዲመሲ ዋነኽ ጃርሲ ኣገል ገልትትኖ ፡ ውሪኮት ትክሰ እንታ ሕልነስ ክሪኽ ግብርልድ ለጭሕዳጋኹሉ፡፡ 15 እና ንድ ሰባትድ ግነ ፡ እን ሰልፍ ማእኮትል እሱ ተንኮልድ ዓገብ ደኣናድ ኣኾኽ ክራ ኣኻሰና ፡ እን ሽኝስተው እንሳደት ዲመር በነት ፡ ኣርድኖር መታን ዮ ኒ ሓዲስ ማእኮቱኹድ ነበካ ኣኹኽ፡፡ 16 ፋነይና ህምባኹሉልታ ፡ ክራ እን ፋነያኹድ ኣኽሮ ላዝም ግን እማ ፡ 17 ፋነይናታ ክራደምቢ ግን ኒተባኹ፡ ግን ግራ እን ፋነያኹ ኒርሕድ ዋኒራሱክ ላኽ ድኳ ሰላጥዳኹ እላኒ፡፡ 18 እማ እን ሰልፍ ማእኮት ድኳ ፡ ብር እንገት ቀደስተላኒክ፡፡ 19 - 20 ማለት ሙሰ እን ፍትሕል ፡ ህምባኹድሰና እሰ ፡ እን ትእዛዛት ኣኸውሲክ እክሲ ድወሰና ብር ገራኹዲ ዕብላታትዲ ዓቅዲ ፡ ሰራኹ ሽብካዲ ፡ ስም ዕዛዲ ኣዶ ጃር እንተድ ኣዘዙኽ፡፡ ብር ማእኮቱኽ ኒንግን ዩኹ ፡ እን ክቱብዲ እን ክቱብዲ እን እክዲትል ነጨግኹሉ፡፡ 21 ኒሰናኽር እን ልኝንዲ ኒትክ እን ኣገልገልደው ሓጀዲት ብር ነጨግኹሉ፡፡ 22 እን ፍትሕሰና ኒውክ ብርድ ግን ኒ ለጭሓኽ ፡ ብር ቦቅተጊኽር ብሕልታ(ብሕልይና) ኣካላኒ፡፡ 23 እማ ገድም ተካ እን ሰሚል ህምባኽ ፡ ሰንዓቲኹ ንድ ላጭሕሮ እን ሰሚኽ ኒሹቲ ላኪን ኒልድ ኪዳኹድ ፍዳድ ፡ ላጭሕሮ ላዝም እርጉኽ፡፡ 24 ክርስቶስ ናን ጃር ጃብል ፡ ቃልስትሮልና ንርትል እን ሰሚል ትዉኽ፡ ግን ግራ እን እምኑኽ ታካትል እን ናንድ እስትረሪትል(ከደምስትራሪ) ፡ መቅደስል ኣኽላኒ ንትዋኽ ፡፡ 25 እን ከዳ እዋኹድሰና ፡ ኣመራ ሺባ ኣሪውር ብርድ መቅደስሊ ትዋኽ ፡ ንታዲ ገሪ ግርጋት ኒኣኾርሲ በደይሮ ቱላኒክ ፡፡ 26 ኒን ኣኽጊ እደዲንያ ፡ መሃድሰንትልድ ተርሰ ገሪ ግርጋት ጅርባትድ ብትሮ ወጀቡሉ (ተገብኡሉ) እርጉኽ ፡ ናን ላኪን ኒኣኻርሲ በዳይነድ ፡ ሓራምሲ ቂሊስሮ ዮ ግን እን ደንጎባ ወክትሊ ላኪን ዋድሕስታኹ ፡፡ 27 እን ኣዳሚንዱኽረስ ላዶን ክራ ፡ ኒደንብኻ ፈረድስና ሰርዕስታኹሉ ፡፡ 28 ኒሰናኻ እን ሓራም ፡ ገሪውሲ ሺሽድሮ ዮ ላዶን በደይሳኹ ክርስቶስ እን ኒድ ጨበራውድ ፡ ደኣነድ ሊጞር ኳራ ሓራም እንገት ዋድሕድስሮግን ፡፡