ፊዃ 13

1 ሻም ሻናር ተብኒ፡፡ 2 ናበልጞ አርእግኒ ኒድ መልእኽቲት ኣጋይሽሰና እሲነ ከለብርኖ ህንበነክ እማ ኣጋይሽሲ ከለብርነስ ምኺርጋ፡፡ 3 እን እንሸዉሰዉሲ ናዲ እንሸዉስድናኽርሰና ኣኽድኖ ጅርበትድ ብደናኽርሲ እንትን ኽር እን ስኺል ክም ዋንትድነት ኣኽድኖ እልብደሎም፡፡ 4 ፋይቱትዲ አመንዘርደዉዲትታ ጃር ፈረድሮሎም ግን እማ መዉስቦ ኒድክሊ ካብር ግን እን ሔመር ገንጂሰናኻ ከስሃጋኹ ኣኽኒ፡፡ 5 ኒ ኒላዉድ ባረሊካ ኩከበር እስና ብያ እኽሊኒ ዩኽ እማ እንተእራኩ ሰላዲር እንከሊሲ ኣኽገድ ኣኽኒ፡፡እን ህንባኹድ ገንዓ፡፡ 6 እማ ሓጠርኖ ጃር ይ እልለንታ ግን እማ ጛቑትያ ኣከለለኒ ኣዳምኻ ዉራ እሰጊንለ ፡፡ 7 እን ቆል ጃሩኹ ድወዉኩም እንተድ መርሐዉሲ እልብደሎም ናእራኩ ኣኽርሲ መርኪሰዱኑ ናእምነትድ ፈለኸስ ተለያ፡፡ 8 እየሱስ ክርስቶስ እንጀጞዲ ንኪዲ ዲመሲ ኒ ግን፡፡ 9 እንተለበካ እን ፈረዉድሉ ነፍዓጋኹሎም ቁነድ ኣኽጋኹታ ገድድ ተበን ትክያኹ ግን፡እማ ገሪዉ ጅንስ ሓዳይስ ምህሮሲ ሰሓትጋ፡፡ 10 - 11 እን ከዳ እዋኹድ ሓራም ሰበትድ መቅደስሊ ትዉ እርገዉ ብር ሕያይቱ እን ናስኻኽር በራ ከደንሊ ሓረሩ እርጉኽ እማ ፡ይንታዲ እንአብሩራ (ድንኳንሊ) አገልገልደዉ ፡ኒልድ ቁድኖ መሰል እንግገዉ ሰደቀት ህንበኩና፡፡ 12 እማ ገድም እየሱስኻ ኒብርድ ኤክሲ ቀደስሮር መታንዮ እን ከደን ታንታርዊኹሊ ጅርበትድ ብቱኽ፡፡ 13 - 14 እን እንተርደሪት ጨበርነኩን እንኩንኹን ግን ግራ ነት መንደርትረሪ ታንታርዋ ሻኽኒ እማ ናን ጅኸን ምኹርኖ በራ ከደንሊ ፍንን፡፡ 15 እማ ገድም ንድ ጃርሲ በዳ ሓምዲኹ ማለት ኒስጞሲ ተአመነዉ ፍራ ክንፉሩ ስኩስንን፡፡ 16 ጃር እና ንሰና ያኹ በደስ ተሰማመዐኩ እማ ትክያኹ እስነዲ በንስጞነዲት ምኺርጋ፡፡ 17 እን እንተድ መርሐዉሲ አዘዝተሎምኽር ገዘእስተሎምኽር ናዉ እን ሺብ እወዉሰና ኣኽኖ እንተርሕ መታን ተግህኖ ተከወነኩ እንኩኑኽ እማ፡ኒስ ፈርሓትድ እሲድኖ ግን ግራ ፡ጎሀይኖ ዋኑኑ እሰነንሉ ኒን እንተድ ነፍዐለኩምኒ፡፡ 18 ኒድክ በከትናርድ መንደርትኖ ጀረብኑጉሲ ትክያኹ ሕልና ክም ሻኽነድ አርእኖ (ፈጠኖ) ህንብነኩን እማ ጠለየልና፡፡ 19 ናን እሽሽድ ሓዲስድ እዉስትየኩም መታን ኒስ እሲትኖ ገሪኹ መኾኾኩንኩም እንኩኹን፡፡ 20 ጃር ስላሙኽ ላኪን እን ዲመር ብርድ መእኮት በሀር ኤረሳ በጉኽ ይነአደራ እየሱስ ከርስቶስቲ ክሪዉልድ ጉዳኹሉ ፡ 21 እየሱስ ከርስቶስድ ኒጃብል ባህ ሳኹሉ እንተል እስተኹ ኪዳ ግብር እኻኹድ ኒትከ ኒፍቃድ እሲትኖ ባቅዓን እሲኒተት፡፡ዲማትልድ ዲማሲ ኒድ ክብር ኣኽኒ፡፡ኤመን፡፡ 22 እንትን ይሻን እና ቆል መኾኹኒኹ ኒን ድርጞዶ ከተብኹንልኩም እማ ከለበረትኖሉ ሺወኩንኩም እንኩኹ፡፡ 23 ጢመቲዎስ ይነዳን ክም እንክስተት አርኣ ኒ አሸሾ እንተረን ኒዲ ቛልየኩም ግን፡፡ 24 ናትክ እንተት መረሐዉዲ ናዉክ ቕዱሳንዲት ሰላም የሎም፡፡ እን ኢጣልያትልድ ኣኻዉ ሰላም የነኩኩም እንኩኑኽ፡፡ 25 ገድ ናድክዲ ኣኽኒ ኤመን፡፡