¹ وبعدها أديت عصية طويلة للمقايسة ، وقال لي أسير وأقيس بيت الله ومنصة القربان ، واعد كمهم العابدين هناك .. ² مابلا أفلت الساحة اللي خارج البيت ، علميد أقيسها لأنهو خلاص قد أدوها للشعوب ، وعيدوسو المدينة المقدسة تحت أقدامهم 42 شهر .. ³ وقال لي : شارسل شاهدين من عندي يلبسو الخيش ويتنبئو لمدة 1260 يوم .. ⁴ وهولا الشاهدين هم شجرتين وهن الزيتون والمصباحان القايمان في محضر رب الأرض .. ⁵ ولو حاول أحد يوجعهم ، بتخرج نار من فمهم وتأكل أعداءهم . وكل من بيحاول يوجعهم، عيقتل بهاذه الطريقة .. ⁶ وعندهم السلطة يغلقو السماء ، ولا تمطر في الوقت اللي فيه يتنبأن. وزد والكل عندهم السلطة يخلو الماء تتغير لا دم ، وأن يضربو الأرض بكل أنواع المصايب كلما يشتو .. ⁷ ولاما يكملو شهادتهم فالوحش اللي بيطلع من الهاوية بيحاربهم وبيغلبهم وبيقتلهم .. ⁸ وتجلس جنتهم مطروحات في شارع المدينة العظيمة ، اللي بيرمز لها بأسم سدوم أو مصر ، حيث صلب سيدهم .. ⁹ وبيبسر الناس من كل أمة وشعب وقبيلة ولغة لا جثتيهم لمدة ثلاثة أيام ونصف ، ولا عيسمح بدفنهم .. ¹⁰ ويشمت بهم كل سكان الأرض ويفرحو وكأنهم في عيد ، وبيتبادلو الهدايا ، لأن هولا النبيين نزلو بأهل الأرض عذاب شديد ¹¹ وبعدها بثلاثة أيام ونص ، بعث الله فيهم روح الحياة ، ووقفو على أرجلهم ، واللي كانو بيسبرو أفتجعو قوي .. ¹² وبعدها سمع النبيان صوت عالي من السماء بيقول لهم : أطلعو لا هنا " وطلعو لا السماء في سحاب بمشهد من أعدائهم .. ¹³ وفي نفس هاذيك اللحظة ، وقع زلزال عنيف، وأنهار عشر المدينة ، وقتل في الزلزال 7000 شخص . واللي نجو شلو وبيسبحو الله من خوفهم .. ¹⁴ وأنتهت الكارثة الثانية ، وعتجي الكارثة الثالثة الأن . ¹⁵ وبعدها نفخ الملاك السابع في بوقه ، وأرتفعت أصوات في السماء بتقول : وقعت ممالك العالم تحت سلطان ربنا ومسيحه ، وعيملك لا يوم الدين . ¹⁶ وركع الشيوخ ال24 والجالسين على عروشهم في محضر الله وتعبدو له .. ¹⁷ وقالو : ي سيدي المولى الأله القدير الكاين واللي كان ، بنحمدك لأنك أظهرت قدرتك العظيمة وبدأت تملك ¹⁸ وضبحت الشعوب لكن جا يوم غضبك أنت ، وحان الوقت علميد تحاكم الموتى وتكافئ عبيدك الأنبياء والصالحين ، وكل اللي بيخافو أسمك صغار وكبار ، وتهلك اللي بيفسدو الأرض ¹⁹ وبعدها يفتتح بيت الله في السماء ، وظهر داخله صندوق العهد ، ووقعت بروق وأصوات ورعود وزلازل وبرد ثقيل ..