¹ وظهر في السماء أية عظيمة : مرة متلحفة بالشمس ، والقمر تحت أرجلها ، وعلى راسها تاج من 12 نجم .. ² وهي حبلى وعلى وشك أن تولد ، وصيحت من الوجع .. ³ وظهرت في السماء أية ثانية : وتنين أحمر ضخم قوي ، وله 7رؤوس و10 قرون ، وعلى روسه 7 تيجان .. ⁴ وسحب بديله ثلث نجوم السماء ، ورجمها لا الأرض . وبعدها وقف التنين قدام المرة اللي على وشك الولادة ، علميد يمغط وليدها اول مايولد .. ⁵ وولدت المرة ولد ذكر ، وهو اللي بيحكم الأمم بعصية من حديد . وخطف أبنها هاذا لا عند الله ولا عرشه .. ⁶ أما المرة هربت لا الصحراء ، وقد أعد الله لها مكان تجي فيه لمده 1260 يوم . ⁷ وبعدها قامت حرب في السماء . ميخائيل وملايكته حاربو التنين . وحاربهم التنين بملايكته ، ⁸ لكنه أنهزم ، وخسر مكانه في السماء هو وملايكته .. ⁹ وطرح التنين العظيم لا الارض . هو والحيه القديمة وأسمه أبليس أو الشيطان ، اللي بيقود العالم بكله لا ضلال . وطرح لا الأرض ، وطرحت معه ملايكته . ¹⁰ وسمعت صوت عالي في السماء بيقول : اليوم تمت النجاة ، فالقدرة والملك لألهنا ، والسلطان لمسيحه ، لأنه قد طرح المشتكي ضد أخوتنا اللي بيشتكي ضدهم قدام إلهنا ليل الله مع نهاره ¹¹ وهم غلبوه بدم حمل الفداء ، وبالشهادة اللي شهدو فيها ، وماكانتش حياتهم عزيزة عليهم مابلا رحبو بالموت ¹² فافرحي يا سما وفرحو ياهلها، ويل للأرض والبحر لأن أبليس نزل عليكم بغضب عظيم ، وهو داري أن قد أيامه معدودة ¹³ ولاما أبسر التنين أنه طرح لا الأرض ، شل يلحق المرة اللي ولدت الأبن الكبير .. ¹⁴ وشلت المرة جناحي نسر ضخم علميد تطير فيهم لا المكان المعد لها في الصحراء لأعالتها مدة ثلاث سنين ونص بعيد عن الحية .. ¹⁵ وقذفت الحية من لقفها ماء كأنهو نهر وراء المرة علميد يغرقها فيه .. ¹⁶ لكن الأرض ساعدت المرة ، علميد تفتح الأرض بلقفها ومغطت النهر اللي قذفه التنين من لقفه .. ¹⁷ وغضب التنين على المرة ، وسار يحارب باقي أولادها ، اللي بيطيعو وصايا الله وبيشهدو بأنهم أتباع عيسى . ووقف التنين على شاطئ البحر .