8

¹ واتجمعو هاذيك الأيام ناس خيرات، وما كان معاهم شيء ياكلوه، فصيح عيسى لطلابه وقال لهم ² انا راحم لهولا الناس قدلهم معي ثلاثة أيام، ومابش معاهم شي ياكلوه ³ وإذا روحتهم بيوتهم بدون أكل عيضعفو في الطريق ، وبعضهم اقبلو من ⁴ بقعه بعيده فجاوبوه طلابه: وكيف واحد عيشبع هولا الناس كلهم اكل هنا في البرية؟ ⁵ وسألهم كم معكم خبز؟ ، قالو سبع ⁶ فأمر عيسى الكل ان يجلسو على الأرض، وأخذ السبع الحبات الخبز وجلس يشكر الله ، وقسم الخبز ومكن طلابه علميد يوزعو على الناس كلهم، ووزعوها ⁷ وكان مع الطلاب سمك صغار، وباركهن عيسى وطلب من طلابه انهم يوزعوها والكل ⁸ وأكلو الناس لاما شبعو، ورجعو رفعو الطلاب اللي بقي من الأكل سبع سلل ⁹ وكانو تقريباً اربعه الف وبعدا خلاهم يرحولهم ¹⁰ وطلع القارب مع طلابه وسارو قريب من دلمانوته ¹¹ واقبلو عنده بعض الفريسيين وجلسو يشارعوه يشتو منه اية من السماء علميد يجربوه ¹² وتنهد من قلبه وقال : للمه يجلسو يطلبو مني آية؟ اقول لكم الصدق : ما عتقعش للجيل هاذا ولا آية ¹³ وفلتهم ورجع للقارب وسار للشاطئ في الجهة الثانية ¹⁴ ونسيو الطلاب انهم يشلو خبز ، وما كان معهم في القارب إلا خبزه واحده ¹⁵ ووصاهم عيسى وقلهم انتبهو من خميرة الفريسيين وخميرة الملك هيرودس ¹⁶ وقالو بينهم البين مابش معنا خبز ¹⁷ ودرا عيسى وقالهم: للمه تقولو ان مابش معكم خبز؟ عادكم للان ما بتفهموش ولا تعرفو؟ ولا عاد قلوبكم مغلقه؟ ¹⁸ ولا معاكم عيون ماتستضيش ، واذان ما بتسمعش ؟ ماتذكروش ¹⁹ لاما قسمت الخمس حبات خبز للخمسة الف ، كم سله ببواقي الخبز رفعتو؟ قالو 12 سله ²⁰ قال: ولاما قسمة السبعه الحبات الخبز للأربعة الف ، كم سلة من بواقي الأكل رفعتو؟ قالو سبع سلال ²¹ فقال لهم : وعادكم ماقد فهمتو؟ ²² ووصلو لقرية في بيت صيدا ، و ادو له رجال أعمى وتراشوه أنه يلمسه ²³ وشل بيد الأعمى وبزه لخارج القرية ، وهاناك تفل في عينة وطرح يده عليه وسأله : بتبسر أي شيء؟ ²⁴ ابسر،، وقال : بين ابسر الناس وهم بيمشو وكأنهم أشجار

²⁵ وطرح عيسى يده مرة ثانية على عيون الرجال، واستضى سوا ، ورجع بخير يبسر كل شي واضح ²⁶ فرسله لبيته وقال له: لا تدخلش القرية ²⁷ وسار عيسى وطلابه للقرى حق قيصرية فيلبس، وفي الطريق سأل طلابه: من أنا في رأي الناس؟

²⁸ وجاوبوه : يوحنا المعمدان وبعضهم بيقول إيليا وبعضهم واحد من الأنبياء ²⁹ وسألهم: ومن انا في رأيكم انتو؟ وجاوبه بطرس : انت المسيح

³⁰ فقلهم انهم ما يحاكوش أحد ³¹ وجلس يعلمهم ان ابن الانسان لازم يتوجع خيرات، ومايقبلوش الشيوخ ورؤساء الكهنة والفقهاء، ويموت مقتول ويقوم بعد ثلاثة أيام ³² وكان يقول هاذه الحكا علانية ، وبزه على جنب بطرس وجلس يعاتبة ³³ وبعد التفت وابسر طلابه ، وصيح على بطرس وقله: ابتعد عني يا شيطان لأن هذي افكار البشر مش أفكار الله ³⁴ وبعدا دعا الناس وطلابه وقلهم: من يشتي يتبعني لازم عليه يتخلى عن نفسه ، ويشل صليبه ويلحقني ³⁵ لأن من يشتي ينقذ حياته يفقدها ، ومن فقد حياته في سبيلي وفي سبيل رسالة الإنجيل فهو عينقذها ³⁶ فأيش عينفع الإنسان لو ربح العالم كله وخسر نفسه؟ ³⁷ وايش عيفد الانسان به نفسه؟ ³⁸ لأن من يخزى مني ومن هدرتي قدام هذا الشعب الفاسق ، يخزى منه الانسان في مجد ابوه مع الملايكة الأطهار