7

¹ واجتمعو عند عيسى الفريسيين ، وشويه من الفقهاء حق القدس ² وشافو بعض طلابه بياكلو وايديهم وسخه ، عادهم ما غسلوش ³ لأن الفريسيين واليهود كلهم متعودين ساع القدماء ، ما ياكلوش إلا وقد غسلو ايديهم ⁴ ولاما يرجعو من السوق ما ياكلو شي إلا لاما يغسلوه، وبه حاجات ثانية من التقاليد يعملوها، ساع غسال الكاسات والأباريق وأوعية النحاس والأسرة ⁵ فسألو الفريسيون والفقهاء عيسى : ليش طلابك ما يقلدوش القدماء وبياكلو بأيدي وسخه؟ ⁶ فقلهم : يامنافقين.. كان أشعياء صادق لاما دري عنكم، ساع ما جا عليكم في الكتاب : هاذا الشعب يكرمني بشفايفه واما قلبه بعيد عني ⁷ يعبدني عبادة مابش لها قيمة ، والعقايد اللي يدرسها من تأليف الناس ⁸ انتو مهملين لوصية الله ، وزقمتو بتقاليد الناس ⁹ وقال لهم : ما احسنكم ،، فلتو وصية علميد تحفظو التقاليد ¹⁰ وموسى قد قال: اكرم ابوك وامك ، ومن يسب ابوه أو أمه لازم ينقتل ¹¹ وانتو تقولو: لو مع احد منكم أي شي يساعد به أبوه أو أمه يقول: هذا قربان يعني لله ¹² معفي عن مساعدة ابوه وامه ¹³ وهاكذا تبطلو كلام الله بالتقاليد حقكم تتوارثوها ، وبه أمور خيراتساع هاذا ¹⁴ وصيح للناس يجو مرة ثانية وقال لهم: اسمعوني كلكم وافهمو ¹⁵ مابش شي من خارج الانسان لو دخله ينجسه، ولكن اللي يخرج من الانسان هو اللي ينجس الانسان ¹⁶ من معه اذن تسمع ، يسمع ¹⁷ ولاما فلت الناس وضوا للبيت ، سأله طلابه عن هاذا المثل ¹⁸ فقال لهم: هل انتو خضعان ساع ما هم؟ مش عارفين ان اللي يدخل الانسان من الخارج لا ينجسه! ¹⁹ لأنه ما يدخلش لقلبه، ولكن لجوفه بس، وبعدا يخرج من الجسم، وهاكذا أعلن عيسى أن كل الطعام طاهر ²⁰ ووزد قال لهم : اللي يخرج من الانسان هو اللي ينجسه ²¹ لأن من الداخل من قلوب الناس تخرج الافكار الخبيثة، الفسق والسرقه والقتل ²² والزنى والطمع والخبث والغش والفجور والحسد والنميمة والكبرياء والجهل ²³ هاذي الأمور الخبيثه كلها تخرج من داخل الانسان وتنجسه ²⁴ ورحله لنواحي صور، ودخل بيت وكان ما يشتيش احد يدرا به، وماقدرش يتخبي ²⁵ وسمعت عنه مره كان بنتها بينها روح نجسه، وسارت له سريع وارتجمت عند ارجله ²⁶ وتراشته انه يخرج الشيطان من بنتها ، وكانت المره مشهي يهوديه، ومن أصل سوري فينيقي ²⁷ فاجاوبها عيسى : خلي الأولاد اول شي ياكلو، لأنه ما يجوز اننا نبز اكل الجهال ونرميه للكلاب

²⁸ فقالت المره : ياسيدي حتى الكلاب تاكل تحت المايده من فتات الجهال ³⁰ فقال لها : سيري ، بسبة كلامش هاذا قد خرج الشيطان من بنتك ²⁹ فرجعت المره لبيتها ، ولقت بنتها على السرير والشيطان خرج منها ³¹ وبعدا فلت صور، ومشي على صيدا راجع لبحر الجليل ، من اراضي المدن العشرة ³² فجو لعنده بواحد أعجم معقود لسانه، وتراشوه انه يطرح يده عليه ³³ وشله عيسى لحاله ، وطرح أصابعه في اذان الرجال وتفل وعس لسانه ³⁴ ورفع عيونه للسماء وتنهد وقال للرجال إفاتا ،، يعني انفتح ³⁵ وعلى طول انفتحت اذان الرجال وسبرت العقده حق لسانه وتحاكا ³⁶ ووصاهم عيسى انهم ما يحاكوش احد ، وكان كل ما شدد عليهم في التوصيه نشرو الخبر ³⁷ وكانو يقولو بإستغراب قوي: ما احلى أفعاله كلها !! خلا الصم يسمعو والعجم يتكلمو