6

¹ وخرج عيسى من هاناك واقبل لبلدة وطلابه معه . ² وفي السبت بدأ يعلم في بيت العبادة ، واستغرب اغلب الناس لاما سمعوه وقالو :من وين له هاذه؟ وايش هاذي الحكمه اللي معه وهاذي المعجزات اللي بتوقع على ايديه؟ ³ هو النجار ابن مريم ، واخو يعقوب ويوسي ويهوذا وسمعان؟ مش اخوته هانا عندنا؟ وماقبلوش. ⁴ فقال لهم عيسى: مابش نبي بغير كرامة إلا في بلاده ووسط اقاربه وأهل بيته. ⁵ وماقدرش عيسى انه يفعل أي معجزة هاناك، إلا شفى قليل مرضى ، طرح يده عليهم وشفاهم. ⁶ وكان يستغرب من قلة ايمانهم. ⁷ وصيح للطلاب علميد يقبلو ورسلهم على اثنين اثنين علميد بيشرو، وادالهم سلطاناً على الأرواح النجسه.

⁸ ووصاهم وقال: لا تشلوش للطريق إلا اعصي بس ، لا خبز ولا زلط في جيوبكم ولا شي ⁹ والبسوا حذاء ولا تبزوش لبس زيادة. ¹⁰ وقال لهم: واي بيت تدخلوه اجلسو بينه لاما تريحولكم من هاذيك البلده. ¹¹ وأي بقعه اهلها ما يقبلوكمش ولا يسمعو كلامكم ، ريحولكم منها وانفضو التراب من ارجلكم انذار لهم. ¹² وسارو يدعو الناس للتوبة ¹³ وخرجو خيرات من الأرواح النجسة، ودهنو بالزيت خيرات من المرضى وشفوهم. ¹⁴ وسمع الملك هيرودس بأخبار عيسى، لأنه وقع مشهور، وكان بعض الناس يقولو: قام يوحنا المعمدين من بين الأموات ، علميد هاكذا بيفعلو المعجزات على يده ¹⁵ وقالو ناس ثانين انهو إيليا وغيرهم قالو : هو نبي ساع باقي الأنبياء. ¹⁶ ولاما سمع هيرودس قال: هاذا يوحنا اللي قطعت راسه ، قام من بين الأموات! ¹⁷ وكان هيرودس قد مسك يوحنا من قبل وقيدة في السجن، علميد هيرودية اللي تزوجها وهي مرة اخوه فليبس ¹⁸ فكان يوحنا يقوله : ما يجوز لك انك تشل مرة اخوك ¹⁹ علميد هاذا كانت هيرودية حاقدة على يوحنا، تشتي تقتله بس ما استرتش ²⁰ لأن هيرودس كان يفتجع من يوحنا ويحميه لأنه داري انه تقي وقديس ، ولاما كان يستمع له كان يختضل ، ومع هاذا كان يحب يسمعه ²¹ وجت فرصه لهيرودية لاما فعل هيرودس عزومة عشاء للناس الكبار والضباط من الجليل علميد عيد ميلاده ²² ودخلت بنت هيرودية ورقصت، فعجب هيرودس والضيوف ، وقال الملك للبنت : اطلبي اي شي وانا اديه لش ²³ وحلف لها يمين مغلظه قال : شديلش كل ما تتطلبي ولو نصف مملكتي فخرجت البنت ²⁴ وسارت لأمها وسألتها: ايش أطلب؟ وقالت لها امها: راس يوحنا ²⁵ ورجعت سريع للملك وقالت له : اشتيك تدي لي على صحن راس يوحنا ²⁶ وزعل الملك قوي ، ولكنه كان ما يشتيش يرد طلبها لأنه حلف لها قدام الضيوف ²⁷ فرسل على طول عسكري وامره ان يجي براس يوحنا، وسار وقطع راسه في السجن ²⁸ واداه على صحن وسلمه للبنت وشلته البنت لعند أمها ²⁹ وسمعو الخبر طلاب يوحنا واقبلو وبزو جثته وطرحوها في قبر ³⁰ واجتمعو الرسل عند عيسى، وحاكوه بكل شي فعلوه ودريو به ³¹ وكان خيرات من الناس يسيرو ويجو ، وما يخلوش لهم فرصه ياكلو اكلهم ، فقال عيسى : تعالوا انتوا وحدكم لبقعه قفره وريحو شويه ³² وسارو في القارب وحدهم لبقعه محد بينها ³³ ولكن بعض الناس ابسروهم سايرين ، ودرو خيرات منهم لوين سايرين ، وسارو سريع وسبقوهم لتيك البقعه ³⁴ ولاما نزل عيسى من القارب ابسر ناس خيرات، ورحمهم ، لأنهم كانو ساع الغنم بغير راعي ، وجلس يعلمهم حاجات خيرات ³⁵ ومشي عليهم الوقت ، وقربو عنده طلابه وقالو له : هاذي البقعه منعزله والوقت تأخر ³⁶ فقالو قول للناس انهم يسيرو للقرى القريبه والمزارع علميد يشترو لهم اي شي ياكلوه ³⁷ وجاوبهم عيسى: ادو لهم انتو اي شي ياكلوه، وجاوبوه عليه قالو تشتينا نشتري لهم خبز بحق معاش ثمانيه اشهر ونديه لهم ياكلوه ³⁸ فقال عيسى كم معكم خبز؟ سيرو وابسرو! ، واعرفو كم معهم قالو له : خمس حبات خبز وسمكتين ³⁹ وأمرهم يجلسو الناس جماعه جماعه على العشب ⁴⁰ وجلسو مجموعات بعضهم ميه وبعضهم خمسين ^{41 42} وأكلو لاما شبعو ⁴³ وبعدا رفعو البواقي 12 سفرة ، ملان من كسر الخبز وبواقي السمكتينو ⁴⁴ كان اللي اكلو الخبز تقريباً 5000 رجال ⁴⁵ وأمر عيسى طلابه ان يركب القارب ويسبقوه إلى صيدا ، الجهة الثانية من الشاطئ علميد يسيرو الناس ⁴⁶ ولاما راحولهم سار للجبل علميد يصلي ⁴⁷ وفي الليل ، كان القارب في وسط البحيرة ، وعيسى لحاله على البر ⁴⁸ وابسر عيسى ان الطلاب تاعبين من التجديف، لأن الريح كانت عكس، وجا لهم قبل الفجر وهو يمشي على البحيرة، وكان بيمر منهم ⁴⁹ ولاما ابسروه ماشي على الماء ضنو انه شبح وصاحو ⁵⁰ لأنهم ابسروه كلهم وافتجعو ، وكلمهم على طول قلهم : اطمنو ،، انا هو عيسى ، لا تفتجعوش ⁵¹ وطلع القارب عندهم ، وهدأت الريح واستغربو قوي ⁵² لأن معجزة الخبز مافهموش شي منها ، من بلادة قلوبهم ⁵³ وخطيو لاما وصلو لشاطئ جنسرت، وربطوا قاربهم هاناك ⁵⁴ ولاما نزلو من القارب ، عرفو الناس عيسى ⁵⁵ فسارو في كل بقعه ، وبزو لعنده المرضى على الفراش لكل بقعه سمعو انه فيها ⁵⁶ وفي كل بقعه يسيرها عيسى سوا مدن او قرى او مزارع، كان الناس يطرحو المرضى في الساحه ، ويطلبو منهم انهم يلمسو ولو طرف ثوبة ، وكل من لمسه يتعافى طوالي