¹ وقال لهم : الصدق اقول لكم ،، في الموجودين هانا ناس ما عيموتوش لاما يبسرو مجيئ ملكوت الله تجي بقوة ² وبعد سته ايام بز عيسى بطرس ويعقوب ويوحنا ، وانفرد معاهم على جبل عالي ، واتغيرت هيئته قدامهم ³ ووقعت ثيابه تلمع ببياض قوي، ما يقدرش أي صباغ في الدنيا يبيض مثلها ⁴ وبدا لهم إيليا وموسى، وكانو يحاكو عيسى ⁵ فقال بطرس لعيسى : يا سيد ما احلى اننا هانا، نسوي ثلاث خيام واحد لك واحده لموسى واحده لإيليا ⁶ وكان مشو داري ايش يقول من كثر الخوف اللي وقع بينه هو واصحابه ⁷ وجت سحابه ظللتهم ، وقال صوت من السحابه: هاذا هو ابني الحبيب واسمعو له ⁸ ولاما تلفتو فجأه حولهم، ماابسرو إلا عيسى لوحده ⁹ ولاما كانو نازلين من الجبل ، وصاهم عيسى انهم ما يحاكوش احد باللي ابسروه، إلا لاما يقوم ابن الانسان من بين الموتى ¹⁰ فعلو بوصيته ، ولكنهم جلسو يقولو : ايش معنى قام من بين الأموات؟ ¹¹ وبعدا سألوه: ليش بيقولو الفقهاء ان إيليا عيجي او ¹² لاً فجاوبهم : ايوا يجي إيليا اول شي ويصلح كل شيء ، لكن يقول الكتاب ان اب الانسان عيتوجع قوي ويكرهوه الناس ¹³ لكني اقول لكم: إيليا اقبل ، وفعلو به ساع ما يشتو ، زي ما جا عنه في الكتاب ¹⁴ ولاما رجعو لباقي الطلاب ، ابسرو ناس خيرات عندهم ، وبعض الفقهاءيشارعوهم ¹⁵ ولاما ابسرو الناس عيسى ، اتفاجأو كلهم وسارو يسلمو عليه ¹⁶ وسألهم : ليش هاذي الشريعه؟ ¹⁷ فجاوبهم واحد من الناس : يا سيد اديت لك ابني ، لأن بينه روح نجسه بيخليه اعجم ¹⁸ ولاما يجي له يرجمه على الأرض وتجي له رغوه بفمه ويصقين اسنانه ويتشنج، وقلت لطلابك ان يطردوه وما قدروش ¹⁹ فقالهم : ايها الجيل اللي مش مؤمن ليحين اجلس معاكم؟ ليحين اتحملكم ؟ هاتو لي الولد ²⁰ وادو له الولد ولاما ابسره الروح النجس اصترع الجاهل ونكع على الأرض ويلتوي ويرتغي بفمه ²¹ فسأل عيسى ابو الولد : متى بدأ يجي له هاذا ؟ وقال له : من يوم طفولته ²² وكثير كان يرميه الروح النجس في النار والماء علميد يقتله ، ولو انت قادر اتحنن علينا وساعدنا ²³ فقال له عيسى : لو انت قادر تؤمن ، فكل شي ممكن للمؤمن ²⁴ فصيح ابو الولد على طول: عندي ايمان بس ساعدني علميد اقوي ايماني ²⁵ ولاما ابسر عيسى ان الناس يتجمعو ، صيح على الروح النجس وقال له : ايها الروح الأصنج الأعجم انا أمرك ، اخرج من الجاهل ولاترجعش له ²⁶ وصاح الروح النجس وصرعه قوي وخرج منه ، ورجع الولد ساع الميت ، حتى ان الناس قالو انه مات ²⁷ وشل عيسى يده وقيمه وقام ²⁸ ولاما دخل البيت سأله طلابه على جنب: للمه عجزنا احنا اننا نطرد الروح النجس ²⁹ فجاوبهم : ان هاذا التوع ما ينطردش إلا بالصلاة ³⁰ وخرجو من هاناك ومشيوا بالجليل ، وكان عيسى ما يشتيش احد يدرا به ³¹ لأنه كان يدرس طلابه ويقول لهم : عيتسلم ابن الانسان لأيدي الناس ، ويقتلوه وبعد ما يقتلوه بثلاثة أيام عيقوم ³² وما فهموش هاذا الكلام وافتجعو انهم يسألو عنه ³³ وبعدا وصلو لكفر ناحوم ، ولاما دخلو البيت سأل طلابه : في ايش كنتو تتقالعوا في الطريق؟ ³⁴ وسكتو لأنهم كانو في الطريق يسألو من هو الأعظم فيهم ³⁵ فجلس وصيح للطلاب ال12 وقال لهم : من يشتي يوقع الأول لازم يكون الأخير ويخدم الكل ³⁶ وشل طفل وقومه وسطهم وحضنه لصدره وقال لهم ³⁷ من يقبل جاهل ساع هاذا بأسمي عيقبلني، ومن يقبلني هو مايقبلنيش انا ولكن اللي رسلني ³⁸ فقال له يوحنا : يا سيد .. ابسرنا رجال بيخرج الشياطين بأسمك ومنعناه لأنه ما ينتميش لنا ³⁹ فقال عيسى : لاتمنعوه ! محد يقدر يفعل معجزة بأسمي يتكلم عليا بعدها كلام مش حالي ⁴⁰ اللي مشو ضدنا فهو معانا ⁴¹ ومن شربكم ماء بأسمي لآنكم معي ما عيضيعش أجره ⁴² وقال عيسى : من طرح واحد من هولا الجهال المؤمنين بي في الذنوب،خير له يعلق في رقبته حجر مطحن كبيره ويرتجم في البحر ⁴³ علميد إذا شلتك يدك للذنوب اقطعها ، واحسن لك انك تدخل الحياة ومعك يد واحده احسن من تسير للنار بيدين ⁴⁴ بقعة الدود اللي ما يموتش والنار اللي ما تنطفيش ⁴⁵ وإذا شلتك رجلك للذنوب اقطعها، لأنه احسن انك تدخل الحياة برجل واحده ولا يوقع معك ثنتين وتسير للنار ⁴⁶ بقعة الدود اللي ما يموتش والنار اللي ما تنطفيش ⁴⁷ وإذا عينك في الذنوب اقلعها ، لأنه خير انك تدخل ملكوت الله ومعك عين واحده ولا يوقع معك ثنتين عيون وتسير للنار ⁴⁸ بقعة الدود اللي ما يموتش والنار اللي ما تنطفيش ⁴⁹ لأن كل واحد يملحوه بالنار ⁵⁰ الملح حالي للأكل لكن لو ما بش بينه ملوحه ما نقدرش نرد له طعمه ! اوقعومسالمين بيناتكم البين