8

¹ ولوما نزل عيسى من الجبل ، لحقوه ناس خيرات ² وقرب منه واحد ابرص وسجد له وقال : يا سيدي لو تشتي انت عتستر انك تطهرني

³ ومد عيسى يده ولمسه وقال :(أشتي ، وعد اطهر) وشفي من برصه على طول ⁴ فقال له عيسى :(اوبه انك تجابر احد ، ولكن سير للكاهن ورويه نفسك ، وبعدا ادي القربان اللي أمر به موسى شهاده انك تعافيت ⁵ ودخل عيسى كفر ناحوم وجاء صليه ظابط روماني وجلس يترجاه ويقول له: ⁶ (يا سيد ، خادمي مطروح فوق الفراش في البيت جالس يتوجع قوي وما يسترش انه يتحرك)

⁷ فقال له عيسى :(عد اسير واشفيه)

⁸ فجاوب الظابط :(انا ما استحقش يا سيد انك تدخل تحت سقف بيتي ، ولكن يكفي انك تقول كلمه وعيتعافى الخادم ⁹ انا داري بذيه لأن عليا رؤساء وكمان معي جنود ، اقول لأي حد سير ويسير ، والثاني جي ويجي ، وللخادم افعل ويفعل

¹⁰ واستغرب عيسى من كلامه وقال للي كانوا معه :(اقول لكم الصدق ، ماقد ابسرتش ساع ذيه الايمان في احد من اسرائيل ¹¹ اقول لكم :( عيجوا ناس خيرات من الشرق والغرب ويجلسوا على المائده مع ابراهيم واسحاق ويعقوب في ملكوت الله) ¹² واما اللي لهم المملكه عيجلسوا خارج بين الظلام ، مكان البكاء وصرير الاسنان

¹³ وقال عيسى للظابط :(سير ، وعلى قد ايمانك عيوقع ما طلبت) وتعافى الخادم في تيك الساعه نفسها ¹⁴ ودخل عيسى لبيت بطرس ، وابسر حماة بطرس على الفراش تاعبه من الحمى ¹⁵ ولمس يدها وفلتتها الحمى ، فقامت وجلست تخدمه

¹⁶ وفي الليل جو ناس خيرات من اللي بينهم شياطين ، فخرجهن بكلمه منه ، وشفى كل المرضى ¹⁷ فتم اللي قاله النبي إشعياء

(شل أوجاعنا

وبعد أمراضنا)

¹⁸ وابسر عيسى الناس عنده فقال لطلابه يسيروا للشاطئ في الجهه الثانيه ¹⁹ وقرب منه واحد من الفقهاء وقال له :(يا استاذ ، الحقك وين ماسرت)

²⁰ فجاوبه عيسى :(مع الثعالب بيوت ومع الطيور عشش ، ولكن ابن الانسان مابش معه وين يطرح راسه)

²¹ وقال له واحد من طلابه :(يا سيد ، خليني اسير اول شي ادفن ابي)

²² فقال له عيسى :(خلي الموتى يدفنوا الميتين حقهم) ²³ وركب عيسى القارب ، ولحقه طلابه ²⁴ وجت عاصفه قويه في البحر لوما غطت الأمواج القارب ، وكان عيسى نايم ²⁵ فقرب منه طلابه وصحوه وقالوا له :(نجينا يا سيد احنا عنغرق)

²⁶ فجاوبهم عيسى :(مالكم مفجوعين ياقليلين الايمان؟) وقام وصيح على الرياح والبحر ووقع هدوء قوي

²⁷ واستغرب الناس وقالوا :(من ذيه لوما تسمع كلامه الرياح والبحر؟) ²⁸ ولوما وصل عيسى للشاطئ في الجهه الثانيه في بلاد الجدريين ، استقبله اثنين رجال خرجوا من المقابر ، وبينهم شياطين وكانوا مستوحشين قوي ، وكان محد يقدر انه يمشي من تيك البقعه ²⁹ وجلسوا يصيحوا :(مالنا ومالك يا ابن الله؟ او جيت هانا علميد تعذبنا قبل وقتنا؟)

³⁰ وكان يرتعي عيد من تيك البقعه خنازير خيرات ³¹ فترجوا الشياطين عيسى وقالوا له :(لو طردتنا رسلنا للخنازير)

³² فقال لهم :(سيروا !) وخرجوا وساروا دخلو في الخنازير ، وتداهفت الخنازير من الجبل ونكعوا بين البحر وغرقوا في الماء ³³ وهرب الرعاه حق الخنازير للمدينه وحاكوا الناس باللي وقع وايش وقع بالاثنين الرجال اللي كان بينهم شياطين ³⁴ وخرجوا أهل المدينه كلهم لعيسى ولوما ابسروه طلبوه انه يرحله من بلادهم