7

¹ لا تحكموش على أحد ، وكذيه محد يحكم عليكم ² ساع ماتدينوا تدانوا ، وساع ما تكيلوا يكال لكم

³ للمه تبسر للقشه في عين اخوك ، وما تنتبهش للخشبه اللي في عينك؟ ⁴ كمان كيف تقول لأخوك : خليني أخرج القشه من عينك ، وهو اللوح في عينك انت؟ ⁵ يا منافق ، خرج اللوح من عينك اول شي ، وبعدا تستر انك تخرج القشه من عين اخوك

⁶ لا تدوش الحاجات المقدسه للكلاب ، ولا ترجموش ذهبكم للخنازير علميد تدعسها بأرجلها ، بعد عتبسركم وتقطعكم ⁷ اسألوا تعطوا ، اطلبوا تلاقوا ، دقوا الباب يفتتح لكم ⁸ واللي يسأل يوقع له ، ومن يطلب يلاقي ، ومن يدق الباب يفتح له

⁹ منه منكم لوما يطلبه ابنه خبزه يدي له حجره؟ ¹⁰ او طلبه سمكه يدي له حنش؟ ¹¹ فلو هو انتوا الأشرار عتدوا حاجات صالحه لعيالكم ، فكم اولى انه ابوكم اللي في السماوات يدي الخيرات للي يطلبو منه ¹² عاملوا الثانين ساع م تشتوا انهم يعاملوكم ، تيه خلاصة الشريعه وتعاليم الأنبياء ¹³ ادخلوا من الباب الضيق ، يا ما اوسع الباب واسهل الطريق اللي تودي للتهلكه ، وما اكثر اللي يمشوا فيه ¹⁴ وما اضيق الباب وأصعب الطريق اللي تودي للحياة ، وما اقل اللي يهتدوا لها ¹⁵ اوبهوا من الأنبياء الكذابين ، يجوا لكم وهم ساع لأبرياء ، وفي الصدق هم ذئاب ¹⁶ من ثمارهم تعرفوهم ، هو يصلح اننا نجني من الشوك عنب ولا من العليق بلس؟ ¹⁷ كل شجره سابره تدي ثمار سابره ، وكل شجره شوعه تدي ثمار شوعين ¹⁸ ومابش شجره حاليه تدي ثمار شوعه ومابش شجره شوعه تدي ثمار حاليه ¹⁹ كل شجره ماتديش ثمار حاليه تتقطع وترتجم في النار ²⁰ ومن ثمارهم تعرفوهم ²¹ مش كل من يقول لي : ياسيدي ياسيدي !! يدخل ملكوت الله ، ولكن الل يعمل بما يشتي أبي اللي في السماوات ²² عيقولوا لي ناس خيرات في يوم الحساب : يا سيدي ياسيدي ، مش بأسمك نطقنا بالنبوءات ؟ وبأسمك طردنا الشيطان ؟ وبأسمك فعلنا معجزات خيرات؟ ²³ وانا شاقول لهم : ما اعرفكمش ، ريحولكم مني يا أوغاد ²⁴ فمن سمع كلامي ذيه وعمل به يوقع ساع الرجال العاقل عمر بيته على الحجر ²⁵ ونزل المطر وامتلت السيول وجت رياح قويه على ذيك البيت وما نكعش ، لأن أساسه قوي على الحجر ²⁶ ومن سمع كلامي ذيه وما عملش به يوقع ساع الرجال البليد عمر بيته على التراب ²⁷ ونزل المطر وامتلت السيول وجت رياح قويه على ذيك البيت ونكع قوي

²⁸ ولوما تم عيسى ذيه الكلام ، اتفاجئ الناس من تعليمه ²⁹ لأنه كان يعلمهم ساع من له سلطان ، مش ساع الفقهاء حقهم